Индигир өрүс туругун көрө-истэ ыам ыйын 23 күнүгэр ыксаллаах быһыы-майгы вертолета Уруҥ-Хайа - Кэбэргэнэ - Хонуу маршрутунан көттө. Билиҥҥи туругунан, өрүс инники кирбиитэ кыраныыссаны ааһан, Кэбэргэнэттэн 90 км-даах сиргэ баар. Эбэбит уута кыра таһымнааҕын специалистар бэлиэтииллэр.

Бу көтүү хардарыта туһалаах буолла. Ол курдук, үрүҥ хайаттан уонна Кэбэргэнэттэн иллэрээ күн баһаартан эмсэҕэлээбит хонуу олохтоохторугар харчынан, таҥаһынан-сабынан көмө тиэрдилиннэ. Төннөрүгэр, былырыыҥҥы халаан уутугар эмсэҕэлээбит Кэбэргэнэ олохтоохторугар анаммыт гуманитарнай көмөнү, аара Муомаҕа хаалбытын тиэйдилэр.

Көмөнү туппут Кэбэргэнэ олохтоохторо үөрүүлэрэ муҥура суох.

Ити курдук, туһааннаах сулууспа, ону сэргэ Уруҥ Хайатааҕы аэропорт улэһиттэрэ балаһыанньаны өйдөөн, күнүстэри-түүннэри, өрөбүллэри аахсыбакка түбүктээхтик үлэлии сылдьаллар. Оттон олохтоохтор, эбэбит барахсан, хаатыттан тахсыбакка, аргыый наллаан устарын долгуйа күүтэллэр.