Виктор бөлөҕөр Олимпиада призера Синичи Юмото (Япония), аан дойду призердара Владислав Андреев уонна Асадулла Лачинов (Белоруссия) курдук күүстээх бөҕөстөр бааллара. «Белорустар» финал 1/8 бэйэ-бэйэлэрин кытта хапсыһыыларыгар Лачинов утарылаһааччытын ыраастык кыайан, бу соторутааҕыта Белоруссия чемпионатыгар хотторбут «иэһин» боруостаата. Ол эрээри салгыы В.Лебедевка тахсан туох да күттүөннээх утарсыыны оҥорбокко, очукуонан ыраастык баһыйтарда. Финал аҥарыгар В.Лебедев бу иннинэ Япония ааттаах-суоллаах бөҕөһүн баһыйа туппут биир дойдулааҕа Ньургун Скрябины кытта хапсыһыытыгар уочараттаах кыайыытын сурунна.

Спорду сэҥээрээччилэр иккис бөлөхтөн Нариман Исрапилов биитэр Артем Гебеков финалга тахсыахтара диэн сабаҕалааһыннара туолбата. Исрапилов бастакы хапсаһыытыгар Россия призера Омак Сюрюҥҥа баһыйтарда. Оттон Гебеков утуу-субуу бурят Алдар Бальжинимаевы (9:0), саха Владислав Петрову (5:0) уонна казах Расул Калиевы (11:8) хотуталаан баран, биир дойдулааҕар Исмаил Мусукаевка хоттордо (2:7). Бу хапсыһыы түмүгэ үгүстэргэ соһуччу соҕус да буолла. Ол эрээри Хасавюрка ыытыллыбыт Континеннар икки ардыларынааҕы кубок финалыгар Нариман Исрапиловы бүдүрүппүт Дагестан эдэр бөҕөһө Ярыгин түһүлгэтигэр кыайыыга чарыпчаланар кыахтааҕын Гебековы сэргэ американц Тони Рамосы, саха Виктор Рассадины уонна монгол Бехбаяр Эрденебаты хотон итэҕэттэ.

Онон бу ыйааһыҥҥа кыайыылааҕы быһаарар хапсыһыыга Виктор Лебедев уонна Исмаил Мусукаев күөн көрүстүлэр. Бастакы түһүмэххэ кимиилээхтик тустубут саха бөҕөһө утарсааччытын илиилээх-атахтаах оҥорбото – 6:0 ахсаанынан баһыйа тутта. Иккис түһүмэххэ Мусукаев араастаан киирэ сатаата эрээри ытыс сотунна, нэһиилэ биир эрэ очукуону ыһыгыннарда, ону да сэрэтиинэн. Хапсыһыы 7:1 ахсаанынан Виктор Лебедев туһатыгар түмүктэннэ.

"Иван Ярыгин-2015" турнир 57 киилэҕэ диэри ыйааһыҥҥа кыайыылаахтара

1. Виктор Лебедев (Саха сирэ)
2. Исмаил Мусукаев (Дагестан)
3. Бехбаяр Эрденебат (Монголия)
3. Ньургун Скрябин (Саха сирэ)