Куонкурус кыттыылаахтара ыарыһаҕы көрүүгэ-истиигэ бэйэлэрин билиилэрин, сатабылларын көрдөрдүлэр. Ыарыһахтарга үтүө сыһыаннара, кинилэри кытары сатаан кэпсэтэ үөрэниилэрэ барыта учуоттанна.

Кыттааччылар үлэлэрин Медицина национальнай киинин, өрөспүүбүлүкэтээҕи 2 №-дээх балыыһа уонна куорат поликлиникаларын үлэһиттэрэ сыаналаатылар.

«WorldSkills Russia» историятыгар аан бастаан Дьокуускайдааҕы колледжка «Ортопедическай стоматология» идэни билиһиннэрии буолла. Чемпионат чэрчитинэн хас да маастар-кылаас ыытылынна.

Регионнааҕы чемпионакка Дьокуускайдааҕы медицинскэй колледж кэнэҕэски эмчиттэри бэлэмнээһиҥҥэ үрдүк таһымнааҕын өссө төгүл бигэргэттэ. Бириистээх миэстэлэри Алена Мартынова (Дьокуускайдааҕы медицинскай колледж), Наталья Наумова (Нерюнгритааҕы медицинскэй колледж) уонна Василина Колодезникова (Дьокуускайдааҕы медицинскай колледж) таҕыстылар.

Кыттааччыларга барыларыгар регионнааҕы чемпионакка кыттыбыттарын туоһулуур сертификаттар уонна сыаналаах бириистэр туттарылыннылар.

2014 с. ыытыллыбыт чемпионакка бастакы миэстэни ылбыт «Сиэстэрэ дьыалата» отделение 3-с куурсун студентката Любовь Садовникова Саха Өрөспүүбүлүкэтин сүүмэрдэммит хамаандатыгар киирбитэ. Кини Казаҥҥа өрөспүүбүлүкэ чиэһин ситиһиилээхтик көмүскээн үһүс миэстэни ылан, Бразилияҕа WorldSkills International-2015 аан дойду чемпионатыгар кыттар быраабы ылбыта.

Ыспыраапка

WorldSkills – оробуочай идэҕэ кэрэхсэбили үрдэтэр уонна профессиональнай үөрэхтэһиини сайыннарар аан дойдутааҕы хамсааһын. Идэҕэ маастарыстыба Бүтүн Россиятааҕы бастакы куонкуруһа 2013 с. Тольяттига буолбута. Билигин дойду 60 региона WorldSkills хамсааһыҥҥа кыттар.