- Айаал, бастатан туран, ыраах айанна туруммут сыалгын-соруккун сиһилии кэпсээ эрэ. Үлэҕитин туохтан саҕалаан эрэҕитий?

- Биһиги куораттан кулун тутар 17 күнүгэр айаҥҥа туруммуппут. Өлөөн уонна Анаабыр улуустарыгар үлэлиэхпит диэн эрдэ былааннаммыппыт. Тоҕо диэтэргин, мин кэтээн көрүүбүнэн, хоту дойду эдэр ыччатыгар аналлаах устуу билиҥҥэ диэри суох. Өлөөҥҥө табаһыттар сүлүөттэрин уһуллубут. Оскуола үөрэнээччилэрин кытары көрүстүбүт, үҥкүүлэрин уһуллубут, ол кэннэ «Бураннарынан» Харыйалаахха таба ыстаадатыгар тахсаммыт көс олохтоох Колодезниковтар дьиэ кэргэннэрин уһуллубут. Сарсыныгар Анаабырга кэлэммит Үрүҥ Хайа нэһилиэгэр барбыппыт. Онно оскуола үөрэнээччилэрин кытта көрүстүбүт. Ыстаадаҕа тахсыахтаах этибит да, буурҕа түһэн Сааскылаахха төнүннүбүт. Манна Сааскылаах орто оскуолатын үөрэнээччилэригэр КВН-ҥа маастар-кылаас ыыттыбыт, ол кэннэ оҕолорго дискотека тэрийбиппит.

Биһигини кытта фотограф Алексей Павлов кэлистэ. Кини «Народные мастера Якутии» диэн улахан бырайыактаах. Биһиги билэрбитинэн, Анаабыр улууһун Үрүҥ Хайа нэһилиэгэр аатырбыт икки норуот маастара, иистэнньэҥэ баар. Кинилэри устуохпутун баҕарабыт. Уонна кини Хоту дойду дьонун олоҕун-дьаһаҕын, табаһыттарын эмиэ хаартыскаҕа түһэриэҕэ. Маны таһынан табаһыттартан интервью ылыахпыт, комментарий хомуйуохпут. Төннөн иһэн «Анаабыр Алмаастара» тэрилтэ Моргогор учаастагар тохтооммут «пентагону» устан ааһыахпыт. Онтон Дэлиндэҕэ тиийэммит «Долбор» ансаамбыл үҥкүүлэрин устуохтаахпыт.

- Клип сүрүн суолтата уонна ис хоһооно туохханый?

- Клиппыт аата-суола «Хоту уолаттара» диэн. Аата да этэринии, Хоту дойду дьонун олоҕун-дьаһаҕын, долган уонна эбэҥки норуоттарын культуратын, төрүт дьарыктарын, таҥастарын-саптарын, кэрэ айылҕатын билиҥҥи ыччат хараҕынан көрдөрүү буолар. Бу маны барытын ыччат тылынан-өһүнэн ыллаан-туойан, хоһуйан дьоҥҥо тиэрдиэхпитин баҕарабыт. Сааскылаахха брейкер уолаттар бааллар эбит. Олортон икки уолу ыллыбыт. Оһуор үҥкүүтүн уһулабыт.

- Былааҥҥыт сүрдээх киэҥ эбит. Үлэҕитин хаһан таһаарар былааннааххытый?

- Куоракка тиийдибит да, монтажербыт Айсен Сергеев таҥан оҥоруоҕа. Быһа холоон, муус устар ый бүтүүтэ тахсыаҕа.

- Эһиги айаҥҥытын ким уйунарыйй?

- Саха Өрөспүүбүлүкэтин Культураҕа уонна духуобунаска министиэристибэтин, Анаабыр уонна Өлөөн улууһун дьаһалталарын көмөлөһөллөр. Түгэнинэн туһанан салайааччыларга улахан махталбытын тиэрдэбит. Суоппарбыт - тимир көлөнү сөбүлүүр дьоҥҥо аналлаах «Drоm.ru» диэн интернет-сайт блогера Владимир Попов. Кини «УАЗ-ПАТРИОТ» массыынаны хоту дойду тыйыс усулуобуйатыгар сүүрдэн көрөр, үөрэтэр сыаллаах кэлистэ. Киниэхэ эмиэ махталбытын этэбит.

- Бэйэҥ туһунан кыратык сырдата түс эрэ.

- Мин Дьокуускай куоракка күн сирин көрбүтүм. Оҕо сааһым аҕам дойдутугар Аммаҕа ааспыта. Оскуоланы Өймөкөөн улууһун Уус-Ньара бөһүөлэгэр бүтэрбитим. Ол кэннэ ХИФУ «Реклама уонна общественноһы кытары сибээс» салаатыгар үөрэммитим. Устудьуоннуу сылдьан КВН-на кыттар этим. Ону таһынан Интернеккэ «100500+» диэн Сахабыт сирин араас муннуктарыгар уһуллубут приколлары ырытар, комментарийдыыр этим. 20-чэ выпуск оҥорбутум. Эдэр ыччакка сүрдээх популярнай этэ. Онтон доҕотторбун кытта «ИДЕЯФИЛЬМ» уус-уран холбоһук тэриммиппит. Видеолары устабыт, хаартыскаҕа түһэрэбит. Ааспыт сайын уоппускаҕа сылдьаммын, тугу да гынара суох буоламмын, «Злой мамбет» диэн аат ылынаммын дэриэбинэ дьиҥ олоҕун көрдөрөр сыаллаах «Мой хотон свеж» диэн клип устаммын Интернет нөҥүө киэҥ эйгэҕэ таһаарбытым. Дьиҥэр Сахабыт сиригэр эрэ көрүөхтэрэ дии санаабыппыт, клибы бүтүн Россия үрдүнэн көрбүттэр. Ютубка 1500000 көрүү бэлиэтэммит. Критика да баар, ол эрэн сөбүлээбит дьон элбэх. Иккис клибым «Үҥкүүлэ бүппэккэ» диэн. Онно араас идэлээх дьону үҥкүүлэппиппит, боростуой тырахтарыыстан саҕалаан Дьокуускай куорат мэригэр, ХИФУ ректорыгар тиийэ биһигини өйөөн клиппытыгар үҥкүүлээбиттэрэ. Эмиэ дьон биһирэбилин ылбыта.

- Олус интэриэһинэй кэпсээниҥ иһин махтал. Ылсыбыт үлэҕэр ситиһиини. Үчүгэй ис хоһоонноох клиби эрэнэ күүтэбит.