"Биһиги икки хоту регионнар майгыннаһарбыт элбэх. Государство экономическай кыаҕар биллэр кылааты киллэрэбит. Ямалга, Саха сиригэр үлэһит, эр санаалаах, дойдуларын муҥура суох таптыыр дьон олороллор. Бииһигини полярнай эргимтэ, доҕордуу сыһыан ыкса ситимниир. Бу сибээһи биһиги өссө дириҥэтиэхпитин уонна кэҥэтиэхпитин баҕарабыт.  Региоҥҥа паламент сайдыытыгар кыттыбыт бииргэ үлэлиир коллегаларым ортолоругар Сергей Харючига Саха сирин парламенын Бочуотунай грамотатын уонна саха көмүһүттэн кутуллубут чаһыыны туттарыахпын баҕарабын», - диэтэ Александр Жирков уонна Ямал парламенын спикерин наҕараадалаата.

"Саамай кэрэ чолбон сулус, Арктика дуолугар үйэлээх олох бэлиэтэ — дьоһун хотугу таба биһигини ситимниир», - диэн эттэ бу наҕарааданы тутарыгар уон түөрт сыл Ямал парламенын салайбыт Сергей Харючи.

"Күн бүгүҥҥэ диэри харыстыыр уонна ытыктыыр норуоттарбыт былыргы үгэстэрэ, хотугу айылҕаҕа уйан сыһыаммыт, Ямалга көстүбүт Люба — мамонт, Саха сиригэр булуллубут Дима — мамонт өссө биһигини ыпсары сибээстиир", - эбэн эттэ Александр Жирков.

"Биһигини уонна биһигини солбуйа кэлээччилэри туох күүтэрий? Ону ким да сабаҕалыыр кыаҕа суох.  Ямал улуу инникилээх. Бу күн Ямал олохтоохторугар бука барыларыгар сайдыыны, чэчирээһини баҕарыах этим. Оттон биһиэхэ сокуону оҥорууга саҥа, сонун санааны, ситиһиилэри уонна кыайыылары», - диир Ямал парламенын председателэ Сергей Харючи.