ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
11 августа 2015, 10:41

Ил Түмэн Бэрэссэдээтэлэ Александр Жирков уонна парламент тутууга уонна дьиэ-уот коммунальнай хаһаайыстыбаҕа сис комитетын бэрэссэдээтэлэ Александр Романов Мэҥэ-Хаҥаласка тахсан үлэни-хамнаһы кытта билистилэр


Сокуону олохтуур былаас ситэриилээх былааһы кытта тэҥҥэ үлэлэһэр бириинсибин тутуһан, республикабыт Государственнай Мунньаҕын (Ил Түмэн) Бэрэссэдээтэлэ Александр Жирков уонна парламент тутууга уонна дьиэ-уот коммунальнай хаһаайыстыбаҕа сис комитетын бэрэссэдээтэлэ Александр Романов атырдьах ыйын 10 күнүгэр Мэҥэ-Хаҥаласка тахсаннар, Чүүйэтээҕи сүөһү комплексыгар уонна Хорообут нэһилиэгэр тутулла турар таас оскуолаҕа үлэ-хамнас хайдах баран иһэрин көрдүлэр-иһиттилэр, билистилэр.

Улууспут депутаттарын кытта бу күн улуус баһылыга Николай Старостин, оройуон Сэбиэтин бэрэссэдээтэлэ Андрей Находкин, тыа хаһаайыстыбатын управлениетын начальнига Иван Аргунов уонна үөрэх управлениетын начальнигын эбээһинэһин толорооччу Ирина Черкашина үлэлэстилэр.

Александр Жирковка хаһаайыстыба үлэтин-хамнаһын салайааччы Святослав Кириллин билиһиннэрдэ. Ил Түмэн Бэрэссэдээтэлэ, хаһан да буоларын курдук, коллектив туһунан, үлэһиттэр хайдах үлэлии сылдьалларын, сүөһү аһылыгын састаабын, сүөһүлэр атыыга төһө баралларын, сиэмэлээһин үлэтин туһунан ымпыгар-чымпыгар тиийэ ыйыталаста.

Билиҥҥи туругунан, «Чүүйэ» хаһаайыстыбаҕа 70 ынах ыанар эбит. 16 «Елочка» ыыр аппараат үлэлэтиллэр. Гааска быйыл холбонуохтаахтар. Сайыҥҥы күннэргэ, үлэлииллэригэр сынньалаҥ соҕус буоллун диэн, иккилии ыанньыксыты биирдии күнүнэн солбуһуннаран үлэлэтэ сылдьаллар эбит. Биллэн турар, ол хамнас аахсалларыгар охсуулаах буолара сэрэйиллэр. Улуус хаһаайыстыбалара, биирдиилээн ыаллара истиэп кыһыл боруодатынан олохтоох симментал хаанын саҥардарга интэриэстээхтэр, ол иһин ордук хото оҕустары атыылаһа сатыыллар. Оттон сиэмэлээһин үлэтигэр улуус салалтата Тыа хаһаайыстыбатын министерствотыгар бу хайысха сүрүн боломуочуйалары улууска уонна нэһилиэктэргэ биэрэр туһунан этии киллэрбитин баһылык Николай Старостин спикергэ иһитиннэрдэ.

photoByWidth&id=41656&width=1000

Хорообут нэһилиэгэр тутулла турар саҥа таас оскуола уопсай иэнэ 3880 кв. миэтэрэ. Тутуу 1,2 гектар иэннээх сиргэ барар. «П» буукубалыы быһыылаах оскуола 220 оҕо үөрэнэригэр суоттаныллар. 2014 сыл төрдүс кварталыгар саҕаламмыт тутуу 2015 сыл төрдүс кварталыгар, кыалларынан, үөрэх дьыла саҕаланыытын да көрсө, бэлэм буолуохтаах. Ону Александр Жирковка тутууну быһаччы хонтуруоллуур салайааччы, кылаабынай бэдэрээтчит ‒ «Адгезия» хааччахтаммыт эппиэтинэстээх тэрилтэ директорын бастакы солбуйааччы Павел Васильев эрэннэрдэ. Тутуу биир уратытынан үлэ араас-араас хайысхалара тэҥҥэ ыытылла тураллара буолар эбит. Ол курдук, көҥдөйө ситэриллэрин сэргэ, бастакы этээскэ электро-уотун ситимэ тардыллыбыт, иккис этээскэ тардыыта саҕаланыахтаах. Истиэнэтин нарылааһын эмиэ саҕаланыахтаах. Түннүктэрин туруораллар, ититэр ситим тардыллар. Оскуола бэйэтэ туспа хочуолунайдаах буолар. Ол эмиэ тэҥҥэ тутулла турар.

Ил Түмэн Бэрэссэдээтэлэ тутууну бытаардыбат, ыйыллыбыт болдьоҕор бүтэрэр соругу туруорда. Сэлиэнньэҕэ Суола үрэҕи туоруур мас муосталара эргэрэн, тутуу матырыйаалын тиэммит массыыналар оломунан туорууллар. Ити сэрэхтээх балаһыанньаҕа Александр Жирков болҕомтотун уурда. Онон, наада буолар тутуу матырыйаалын сайынын таһан кэбиһэр сорук тутааччылар иннилэригэр турар.

photoByWidth&id=41658&width=1000

Салгыы Александр Жирков уонна Александр Романов Суола үрэх Хорообуттааҕы быһыттарын ситимигэр сырыттылар. Нэһилиэги абыраан турар ситим 6 быһыттан турарын олотоох баһылык Валерий Колосов спикергэ быһаарда. Быһыттар бары эргэрэннэр, сорохторо ууну туппат буоланнар, барыларыгар өрөмүөн үлэтэ эрэйиллэр эрээри, сөптөөх үп-харчы мелиорация сулууспатыгар көрүллэ илигэ хорообуттары дьиксиннэрэр. Хас сайын аайы өлгөм үүнүүнү ылалларыгар сүрүн тирэх буолар халытан нүөлсүтүү (лиманнай) республикаҕа ураты ситимэ саҥардыыны эрэйэрэ ырааппыта биллэр. Парламент Бэрэссэдээтэлэ миэстэтигэр кэлэн балаһыанньаны билсибитэ, олохтоохторго кэлэр сылга Хорообут быһытын ситимин оҥорууга сөптөөх үп-харчы көрүллүө диэн эрэл санааны үөскэтэр.

Александр Жирков уонна Александр Романов салгыы Дьаҥхаады нэһилиэгэр тиийэннэр, оҕо саадын таас дьиэтин тутуу үлэтин кытта билистилэр.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 795 Источник: ЯСИА Автор: Аркадий Иннокентьев Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ