2006 сыл алтынньы 1 күнүгэр Хабаровскай таһыгар баар байыаннай чаастан Кэбээйи улууһуттан төрүттээх рядовой П. сүппүтэ. Онно дезертирдээһин чахчытынан холуобунай дьыала тэриллибитэ, ол күн бүгүнүгэр диэри арылла илик, сүппүт саллаат ирдэбилгэ сылдьар.
Саллаат чугас дьоно силиэстийэни кытта сөпсөспөтөхтөрө, демобилизацияланара аҕыйах ый хаалбыт уол сулууспатыттан күрүүр биричиинэтэ суоҕа. Ону Обутовка эппиттэригэр, Роман Михайлович бэйэтэ ирдиир үлэни ыыппыта, Хабаровскайдааҕы гарнизон силиэстийэлиир отделыгар, байыаннай прокуратураҕа, суукка, чаас салалтатыгар сайабылыанньалары суруйбута. Общественник санаатынан, уолу өлөрөн баран, өлүгүн байыаннай чаас тулатынааҕы ойуурга кистээбит буолуохтаахтар. Онно олоҕуран, кини ИБУо РФ СК байыаннай силиэстийэлиир управлениетын салайааччытыгар Радик Гараевка рядовой П-ну өлөрүү чахчытынан силиэстийэ ыытары туруорсубута. Роман Михайлович этиитин ылынан, ойууру кэрийэн көрүү кэмигэр, кутаа оннуттан умайбыт уҥуохтары булбуттар. Криминалистар бу киһи уҥуохтара буолалларын, өтөрдөөҕүтэ уматыллыбыттарын быһаарбыттар. Билигин өлүөхсүт ким буоларын быһаарыыга экспертиза ыытыллар.
Өскөтө, Обутов сэрэйиитэ бигэргэннэҕинэ, байыаннай чаастан дезертирдээһиҥҥэ тэриллибит холуобунай дьыала киһини өлөрүүгэ уларытыллыаҕа. Арай бу байыаннай чаас 2009 сыллаахха расформированиеҕа барбыта, сорох докумуоннара сүппүттэрэ силиэстийэни ыытыыны уустугурдуохтарын сөп.
«Сахамедиа РИИХ»ААУо салалтата Роман Обутовка Хабаровскайга тиийэн дьыаланы миэстэтигэр быһаарсарыгар харчынан көмө оҥордо.
Ким үбүнэн көмөлөһүөн баҕалаах харчыгытын Р.М.Обутов счетугар ыытыҥ: № 42307810176060023722 в филиале сбербанка №8603/061 г. Якутск ул. Чиряева, д.5. БИК 049805609 ИНН 7707083893 к/с 30101810400000000609 р/с30301810776000607600.
Комментарии
Авторизация на сайте через социальные сети