Сайыҥҥы лааҕыр аһыллыытыгар СӨ Үлэҕэ уонна социальнай сайдыыга министиэристибэтин, уопсастыбаннай тэрилтэлэр салайааччылара уо.д.а. кытыннылар. «Виктория» аһыллыытын сиэрэ-туома элбэх омуктаах Саха сирин норуоттарын доҕордоһууларыгар ананна. Үҥкүү, ырыа-тойук, оҕолорго соһуччу бэлэхтэр лааҕыр бастакы иитиллээччилэрин оҕо саас алыптаах остуоруйатыгар сирдээн киллэрдилэр. Оҕолору Аан Алахчын айхаллыы көрүстэ. Бүгүҥҥү остуоруйа сүрүн дьоруойдара Катюша уонна Ньургун төрөөбүт-үөскээбит кыраайдарын кэрэтин туһунан кэпсээтилэр.
Лааҕыр сынньанар базатыгар өрөспүүбүлүкэ улуустарыттан 400 оҕо сынньаныаҕа. 21 хонуктаах сменаҕа 200 оҕо ылыллар.
Бастакы сменаҕа от ыйын 1 күнүттэн 21 күнүгэр диэри сынньаныахтара. Оҕолор интэриэһинэй дьону, ситиһиилээх бизнесмэннэри кытары көрсүөхтэрэ. «Дьоҕус бизнес» академия үлэлиэҕэ. Академия араас хайысхаҕа бэйэ дьыалатын аһарга бэлэмниэҕэ.
«Kinder book оҕо саас энциклопедията»диэн ааттаах литературнай-уус уран сменаҕа оҕолор от ыйын 25 күнүттэн атырдьах ыйын 14 күнүгэр диэри сылдьыахтара. Бу смена уратытынан остуоруйа дьоруойдарыгар уларыйыы көмөтүнэн «Оҕо саас энциклопедиятын» кинигэтин оҥоруу буолуоҕа. Ол эбэтэр лааҕырга сынньанааччылар остуоруйалары айарга дьоҕурдарын арыйар кыахтаныахтара. Аныгы кэм суруйааччылара уо.д.а. айар дьон оҕолорго ыалдьыттыахтара.
Лааҕыр 5 утуйар куорпустаах. Куорпустарга барыларыгар мультимедийнай тэриллэр, телевизордар, DVD-плеер уонна музыкальнай киин бааллар.
Оҕолор доруобуйаларын чэбидигирдиигэ уонна ыарыыны сэрэтиигэ анал бырагырааманы толкуйдаабыттар. Онно битэмииннэри туһаныы, физио-арома уонна фитотерапия, кислороднай коктейлы иһии уо.д.а. киллэриллибиттэр. «Медлайн» клиника «узкай» идэлээх быраастара оҕолор доруобуйаларын бэрэбиэркэлииллэр.
Сарсыардааҥы эрчиллии, спорт күрэхтэрэ, киһи этин-сиинин чэбдигирэр дьаһаллар, туристическай походтар уонна чөл олох туһунан лекциялар – бу барыта күннээҕи режимҥэ киирэллэр.
Биир сүрүн ньыманан арттерапия буолар. Арттерапия сүрүн соругунан оҕо психологическай туругар уларыйыылары ситиһии буолар. Чуолаан «валяние» куруоһугар үчүгэй түмүктэр ситиһиллэллэрэ көстөр. Оҕолор бу саҥа техниканы олус интэриэһиргииллэр. Оҕо түүнү кытта үлэлииригэр лоп бааччы, толоругас уонна тулуурдаах буоларга үөрэнэр.
Ону сэргэ социальнай-педагогическай, социальнай-психологическай өҥөлөр оҕо өйүн-санаатын тупсарарга, тулалыыр эйгэҕэ үөрэнэллэригэр, биир саастыылаахтарын кытары эйэргэһэргэ, араас интэриэһи үөскэтэргэ көмөлөөхтөр.
Комментарии
Авторизация на сайте через социальные сети