Быйыл эмиэ «Мин Сахам сирэ XXI үйэҕэ» республикатааҕы үтүө хамсааһын чэрчитинэн 50 миэстэлээх оҕо уһуйаанын таас дьиэтин тутуута саҕаланна. Бэдэрээтчит – урбаанньыт Свинобоев А.И. Балаҕан ыйын 1 к. – Билии күнүгэр 5 киһилээх биригээдэ дьиэ акылаатын тутуутун саҕалаабыта. Билигин алта киһи үлэлии сылдьар, бары олохтоохтор, эркиннэрин таһаара сылдьаллар. Биригэдьиирдэрэ Андрей Булдаков. Тымныы түстэҕинэ сотору үлэлэрин тохтотуохтаахтар.
Томпо оройуонун баһылыга Георгий Герасимов, баһылыгы социальнай боппуруостарга солбуйааччы Петр Новгородов, үп оройуоннааҕы управлениетын салайааччыта Екатерина Лисина, тутуу управлениетын сүрүн специалиһэ Степан Яковлев уонна үөрэх управлениетын ресурсаларынан хааччыйыы отделын начальнига Федор Колодезников састааптаах бөлөх тиийэн үлэни миэстэтигэр быһаарыста.
Оҕо уһуйаанын тутуллар болдьоҕо 3 сыл, онон 2017 с. үлэҕэ киириэхтээх.
Комментарии
Авторизация на сайте через социальные сети