Ол биир туоһутунан Үөһээ Бүлүү олохтооҕо Василий Прокопьев холобура буолар. Василий Васильевич биэс сыллааҕыта бэйэ дьыалатын тэриммит. Кини сүрүннээн тутуу маһын таҥастааһынынан дьарыктанар. Бэйэ дьыалатын тэриниэн иннинэ МЧС-ка инспекторынан үлэлээбит. Былырыыҥҥыттан ыла предприниматель дьоҕус бизнес саҥа көрүҥүн -- сыбаалканы оҥорууга ылсыбыт.
-- Оннун буллардахха,сыбаалка -- кэскиллээх дьыала.Былааннаабыппыттан үс гыммыт биирэ эрэ оҥоһулунна. Бөҕү наардаан тоҕор ирдэбили туруордум. Ол эбэтэр тимир туспа тутуллар, инчэҕэй уонна кураанах бөх-сыыс анал сирдээхтэр. Бастаан утаа, үөрэммэккэлэр, уруккулуу тоҕоору гыналлара. Сыбаалка күрүөлэнэн-хаһааланан бүттэҕинэ, сотору кэминэн дьон бөхтөрүн аналлаах сирдэргэ сүөкүүр буолуохтара, -- диэн кэпсиир Василий Прокопьев.
Кырдьык, тимир кутуллар сирэ номнуо чопчуланан, сыбаалка олох атын көрүҥнэммит. – Тэрилтэлэргэ тимир бөҕө мунньуллан сытар. Онутуһаныан баҕалаах үгүс. Ылан бырысыап да оҥостооччу баар. Онон сыыйа тимиртэн босхолонон иһиэхпит, -- диэн быһаарар предприниматель.
Сыбаалка сирэ бэрт киэҥ эбит. Былырыыҥҥа диэри бу манна туох да киирбэт-тахсыбат бөҕө буолан, айылҕаны буортулуу сыппыта буолуо дии санаабаккын. Барыта күрдьүллэн, ыраастанан турар, онон киһи манна аны аҕыйах сылынан бэрээдэк олохтонуоҕар бүк эрэнэр.
--"Айылҕаны харыстааҥ, бэйэҕитин көрүнүҥ" диэн ис хоһоонноох суруктары оҥорторо сылдьабын.Сырыы аайы бу суругу-бичиги көрө сылдьар киһи кэлин бэйэтигэр быраабыла оҥостон кэбиһиэҕэ. Мин бу иһин биир биэс харчыны көрдөөбөппүн ээ. Хонтуруолтан ханна тугу тоҕоллорун ыйыттыннар, -- диэн кэпсиир Василий Васильевич.
Мин киниттэн дьиктиргээн ыйытабын: "Плакаттарыҥ суруга-бичигэ бардырҕас сыыһа дии. Бу сыыһаларгын дьон туох да диэбэт дуо?".
-- Ити мин соруйан дьон болҕомтотун тардар ньымам. "Үөрэҕэ суохтар дуу", дииллэр. Дьон саҥарар тылынан соруйан нууччалыы-сахалыы булкуйан суруйабын. Быраабыланан буолбакка, бэйэтэ саҥарар тылынан дьон үчүгэйдик өйдүүр. "Оччо ыстараап, бачча ыстараап" диэн суруйаллар дии. Үөрэнэн, хал буолан хаалан, ким да ону өйдөөн көрбөт. Төттөрүтүн: "Мусоры отходун аҕалбыт дьон кытыыга илдьэн тоҕуҥ", -- диэн суругу болҕомтолоохтук ааҕыахтара уонна этиллибити толоруохтара. "Бөх" диэн куһаҕан баҕайытыкиһиллэр. Онон дьон туттар тылынан суруйабыт. Норуокка тиийэрэ түргэн. Омос көрүүгэ балысхан сыыһалаах сурук-бичик дьону "үөрэтэ", "үлэлии" турар.
Василий Прокопьев саамай наадалаах докумуонун -- лицензияны эккирэтиспитэ иккис сылыгар барда.
-- Лицензиябын ыла иликпин. Анал докумуоннааҕым буоллар, манна тэрилтэлэр харчыга киирэн кутуо этилэр. РЭК-кэ (региональный экономический комитет) сыана быһар тариф оҥотторуом этэ. Үлэбин олохтоохтук саҕалыырбар лицензия "күөх уоту" уматыа этэ. Харабыл-тырахтарыыс ставкатыгар үс киһини ылаары сылдьабын. Тэрилтэлэри кытта дуогабардаһарга буҕаалтыр уонна юрист ылыам.
Лицензия ылыыта олус эрэйдээх эбит. Сокуон уларыйара элбэҕэ бэрт. Ол курдук, бастаан саҕалыырбар үлэм көрүҥэ "сыбаалка" диэн этэ. Аны "полигон" дэнэр буолбут. "Сыбаалка" уонна "полигон" ирдэбиллэрэ атын-атын эбит. Мин ылсан эрэр үлэм көрүҥэ -- "полигон" дэнэр. Ол эбэтэр анал кылаастарынан араарыллар: 1-кы кылаас -- аккумулятордары харайар сир, 2-с – нууччалыы эттэххэ,"отработанныйматериал" (массыына арыыта, инчэҕэй эттик), 3-с -- люминисцентнай лампа. Ити эппитим урут барыта биир категориянан барара эбитэ үһү. Билигин быраабыла кытааппыт, -- диэн кэпсиир Василий Прокопьев.
-- Бу сири мин 49 сылга дуогарбардаһан ыллым. Былааным киэҥ. Сыыйа "Хааччахтаммыт эппиэтинэстээх тэрилтэҕэ" тиийэ үүнэн, дьыалабын уолаттарбар хаалларыам. Ыччаттарбын бэйэбин кытта илдьэ сылдьан бу үлэҕэ үөрэтиэм, -- диэн санаатын үллэстэр предприниматель.
"Граннарга, араас куонкурустарга кыттан, туох үбүлээһининэн туһанаҕыный?" -- диэн ыйытыыбар Василий Прокопьев:
-- 13 мөл. солкуобайдаах сметаны оҥоттордум. Бөҕү-сыыһы уматар, кремационнай (өлүгү уматар) оһохтор наадалар. Люминисцентнай лаампалартан ртутун араарар оһох сыаната 4 мөл. 100 тыһ. солк. Ити өссө былырыыҥҥы сыаната. Онон инвест-бырайыакка киирдэххэ, өйүө этилэр. Сметабын бэлэмнээбитим, -- диэн кэпсиир.
Сайдыылаах омук сирдэригэр сыбаалканы көрүү-истии биир саамай дохуоттаах үлэ быһыытынынан биллэр. Онон Үөһээ Бүлүү предпринимателэ сыбаалкаттан дохуот киллэринэн, өрөспүүбүлүкэҕэ бастыҥ уопуту тарҕатыаҕар эрэнэбит.
Комментарии
Авторизация на сайте через социальные сети