Кэнсиэргэ кэлбит дьону аан айаҕар «коробейниктар» бөрүөгүнэн айах тутан көрүстүлэр, омуктарын үгэстэринэн ыалдьыты көрсөр сиэри-туому толорон арчылаатылар.
Саалаҕа киирээт нуучча остуоруйатыгар түбэспиттии сананныбыт. Нуучча оһоҕо, иһитэ-хомуоһа, олбуор маһыгар ыйанан турар «лапти» атах таҥаһа, подсолнух сибэкки, дьэрэкээн ойуулаах былааттар — ол барыта норуот олоҕун-дьаһаҕын, үгэһин-итэҕэлин ураты тыынын биэрэр. Итинник кэрэ эйгэҕэ түбэһэн, санаабыт көтөҕүллэн, биэчэр саҕаланыытын долгуйа күүттүбүт.
Кэнсиэр «Курочка Ряба» диэн нуучча норуотун остуоруйатын матыыптарыгар олоҕурбут уус-уран көрдөрүүттэн саҕаланна. Биир бэйэм оҕобун илдьэ кэлбэтэхпиттэн хомойбутум - маннык үчүгэй уус-уран көрдөрүүнү буор-босхо кэриэтэ чугастыы ханна булан көрөөрү! Артыыстарбыт олус дьоҕурдаах буолан биэрдилэр: мимикалара, туттуулара-хаптыылара — киһи эрэ сөҕүөх! Ити курдук «Коробейниктар» ырыаны эрэ баһылаабыт дьон буолбатахтарын дакаастаатылар. Устунан кэнсиэр сүрүн чааһыгар үктэннибит.
Көрөөччү иннигэр дьэрэкээн ойуулаах таҥаһынан симэммит кэрэ аҥардар сыанаҕа тахсан баян доҕуһуолунан алыптаах нуучча норуодунай ырыатын ыллаатылар. Нуучча омуга былыр-былыргыттан ураты уйан дууһатынан, үтүө майгытынан аатырар. Ырыалара эмиэ биир оннуктар — киһи уйулҕатын аймыыр, долгутар аналлаахтар. Ол сиэринэн көрөөччүлэр ырыаһыты кытары тэбис-тэҥҥэ долгуйан да, уйадыйан да ыллыбыт.
«Коробейниктар» ансаамбыл тэриллэн үлэлээбитэ, айбыта-туппута номнуо сүүрбэттэн тахса сыл буолбут. Утум салҕааччы, үүнэр көлүөнэни иитээччи быһыытынан хайҕанар. Ону кэнсиэр кыттааччылара туоһулууллар. Ол курдук, ансаамбыл кырдьаҕас кыттыылааҕа, Ленскэй нэһилиэк бочуоттаах олохтооҕо, сцена бэтэрээнэ Ф.А. Чумаевская сэргэх ырыатынан, «Коробейники» оҕолор ансаамбыллара, баянистар С. Андреев, А.Татаринов, ону сэргэ «Далбар», «Үргэл» үҥкүү коллективтара уо.д.а. кыттыыны ыллылар.
Кэнсиэр түмүктэнээтин кытта аттестациялыыр хамыыһыйа «Коробейниктар» коллектив «норуодунай» ааты көмүскээбитин туһунан иһитиннэрдэ.
Маннык буолуоҕар биир бэйэм саарбаҕалаабат этим. Мин саныахпар, маннык истиҥ, аймахтыы сыһыаннаах коллектив аныгы олоххо ахсааннаах да буолуо. Дьарыктанар хосторо эмиэ туһунан тыыннаах. Киирдиҥ да сылаас дьиэ тыына саба охсор — куруутун астаах-үөллээх остуол, сылабаардаах итии чэй, бурдук ас. Сыанаҕа кэтэр таҥастарын чааһыгар киирдэххэ — барыта илиинэн тигии. Билиҥҥи ырыынак үйэтигэр иистэнэргэ таҥас, онтон да атын бытархайдар сыаналара ыарахана биллэр. Ону үксүн бэйэлэрэ атыылаһан тигэллэр, киэргэтэллэр. Ыллыыр баҕаттан сорохторо Хомустаахтан дьарыктана кэлэллэрэ эмиэ элбэҕи этэр. Бу барыта коллектив түмсүүлээҕин, бэйэ иннигэр эппиэтинэстээхтэрин, салайааччы кыһамньылааҕын туоһута.
Комментарии
Авторизация на сайте через социальные сети