Кировскай, Маалтааны, Бэрдьигэстээх уонна да атын нэһилиэктэртэн барыта 25 оһуохайдьыт, ол иһигэр 12 оскуола үөрэнээччитэ кэлэн күөн көрсүбүт. Олохтоохтор маннык тэрээһиҥҥэ сыллата эдэр ыччат уонна кырачаан оҕолор кытталлара элбээн иһэрин үөрэ бэлиэтииллэр.Республика киэн туттар оһуохайдьыта Дарья Алексеева көҕүлээһининэн куонкуруһу нэһилиэк дьаһалтата, сынньалаҥ киинэ, культура управлениета тэрийбиттэр. Улахан ааттаах-суоллаах оһуохайдьыттар - 85-тээх Григорий Васильев (Бэрдьигэстээх), Кэптин олохтооҕо, 80-наах Анна Кубарова тэрээһиҥҥэ кыттаннар дьону-сэргэни улаханнык сэргэхсиппиттэр.
Оһуохайдьыт үрдүк аатын ылар иһин күрэстэһии биир күн толору ыытыллыбыт. Дьүүллүүр сүбэҕэ культура управлениетын начальнигын солбуйааччы Софья Алексеева, Орто Суртааҕы Сынньалаҥ киинин директора Ульяна Суханова, ааспыт сыллардааҕы оһуохайдьыттар куонкурустарын кыайыылаахтара Алексей Румянцев уонна Иннокентий Терентьев куонкурустаһааччылар этэр тыллара хомоҕойун, ууһун-уранын, куоластара чөллөркөйүн, дьону түмэ тардыыларын о.д.а. сыаналаабыттар.
Түмүккэ «Аан Дархан этээччи» үрдүк аатын Орто Сурт олохтооҕо, тыа хаһаайыстыбатын үлэтин бэтэрээнэ Петр Сивцев ылан үөрүү көтөллөммүт. Оҕолорго «Кэскиллээх этээччи» аатын Аһыматтан кыттыбыт 6-с кылаас үөрэнээччитэ Сардаана Мухоплева, «Чуор куоластаах этээччи» -- Анжелика Егорова (2-с кылаас, Бэрдьигэстээх) ылбыттар. «Бастын куоластаах этээччинэн» 8 саастаах Ньургун Антонов (Орто Сурт) буолбут. Эдэр ыччакка «Бастыҥ этээччи» аата Киров нэһилиэгиттэн Культура киинин салайаачытыгар Никита Семеновка иҥэриллибит.
Бары оһуохайдьыттарга дохсун ытыс тыаһыгар доҕуһуоллатан бэлэхтэр уонна махтал суруктар туттарыллыбыттар. Оттон тэрээһиҥҥэ кыттыбыттар улаханнык үөрэн, астынан, кэлэр өттүгэр куонкуруска өссө үчүгэйдик бэлэмнэнэр баҕалаахтарын биллэрбиттэр.
Комментарии
Авторизация на сайте через социальные сети