Европа оонньуулара: Бүгүҥҥэттэн Кристина Тимофеева, оттон сарсыҥҥыттан Виктор Лебедев, Владислав Андреев күрэстэһэллэр

Азербайджан киин куоратыгар буола турар Европа оонньууларыгар континент 50 дойдутуттан 6200 спортсмен спорт сүүрбэ көрүҥэр ким чулуутун быһаарсар. Онтон уон бииригэр 2016 сыллааҕы сайыҥҥы Олимпийскай оонньууларга путевкалар оонньонор буоланнар, хас биирдиилэригэр күрэстэһиилэр олус хатыһыылаахтык бараллар. Үһүс күн түмүгүнэн мэтээл аахсыытыгар Россия хамаандата, хаһаайыттар иннилэригэр түһэн, инники күөҥҥэ таҕыста.

Бары билэргит курдук, бу бастакы Оонньууларга Саха сириттэн үс спортсмен кыттар — Кристина Тимофеева (Россия, оҕунан ытыы), Виктор Лебедев (Россия, көҥүл тустуу) уонна Владислав Андреев (Белоруссия, көҥүл тустуу).
Бүгүҥҥэттэн охчуттар күрэхтэһиилэрэ саҕаланар. Күрэс олимпийскай программанан барар. Манна былырыын ыытыллыбыт сүүмэрдиир күрэхтэһиилэргэ эр дьоҥҥо, дьахталларга 64-түү охчут талыллыбыта. Россия чиэһин бу көрүҥҥэ Александр Кожир, Баир Цыбекдоржиев, Белигто Цынгуев, Инна Степанова, Кристина Тимофеева, Наталья Эрдыниева көмүскүөхтэрэ. Охчуттар бастаан 70 миэтэрэттэн ытыахтара. Сарсыарда квалификация буолуо, онтон киэһэ хамаанданан ытыыга финал 8/1 саҕаланыа.
- Бу Оонньууларга дойду сүүмэрдэммит хамаандата сүрүн састаабынан кыттар. Европа оонньуулара улахан суолталаах күрэхтэһии. Ол эрэн биһиги спортсменнарбыт бэлэмнэрэ от ыйын 26 — атырдьах ыйын 3 күннэригэр Копенгагеҥҥа (Дания) буолар аан дойду чемпионатыгар муҥутуу ситэрин курдук былааннаах үлэлиибит, - диэн эттэ «Весь спорт» агенствоҕа биэрбит интервьютугар РФ оҕунан ытыыга федерациятын президенэ, Россия сүүмэрдэммит хамаандатын сүрүн тренерэ Владимир Ешеев. Кини охчуттарбытыгар билиҥҥитэ биирдиилээн күрэхтэһэр уопут тиийбэтин ыйан туран, Оонньууларга бэйэлэрин кыахтарынан киирсэн хамаанданан ытыыларга үс иһигэр киирэр сорук туруоруллубутун эттэ.

Охчуттарбытыгар сүрүн утарсыыны Германия, Италия, Украина спортсменнара оҥоруохтарын сөп.
Эмиэ бүгүн 57, 65, 74, 97 кг диэри ыйааһыҥҥа тустар бөҕөстөр ыйааһыны ааһыахтара. Оттон сарсыҥҥыттан 57 киилэлээхтэр хапсыһыылара буолуоҕа. Бу ыйааһыҥҥа Саха сирин икки бөҕөһө — аан дойду икки төгүллээх чемпиона Виктор Лебедев уонна аан дойду призера Владислав Андреев - тустар. Хапсыһыылар Дьокуускай бириэмэтинэн күнүс 14 чаастан саҕаланыахтара.