Көрсүһүү кэмигэр Галина Иннокентьевна ыарыһахтары тырааныспарынан таһыы боломуочуйатын СӨ Үлэҕэ уонна социальнай сайдыыга министиэристибэтиттэн Доруобуйа харыстабылын министиэристибэтигэр биэрэргэ быһаарбыта. Оттон материальнай көмө төлөбүрүн оҥоруу боломуочуйата, урукку курдук, Үлэ уонна социальнай сайдыы министиэристибэтигэр хааларын тоһоҕолоон бэлиэтээбитэ.
Ол да буоллар, ахсынньы 15 күнүгэр «Нефро-Лига» бэрэстэбиитэллэрэ СӨ бырабыыталыстыбатын 1 №-дээх дьиэтин иннигэр санааларын этэ таҕыстылар. Чуолаан, диализка куруутун сылдьар инбэлииттэргэ айаннарын төлөбүрүгэр материальнай көмөнү уонна процедура ылар сирдэригэр диэри массыынанан илдьиини оннунан хаалларарга туруорустулар.
Пикет кыттыылаахтара этэллэринэн, диализниктары эмтиир сирдэригэр тириэрдии гемодиализ процедуратыгар киириэхтээх. «Биһиги бэйэбитигэр эрэ аналлаах, кэлээскэлээх инбэлииттэри көтөҕөрдөөх тырааныспар баар буоларыгар, кылаабынайа, диализка тиийэр сирбит төлөбүрүгэр материальнай көмөнү оннунан хаалларарыгар баҕарабыт», – диэтилэр.
Доруобуйа харыстабылын министиэристибэтин салалтата пикеттээччилэри кытары көрүстэ. Миниистир Александр Горохов ыарыһахтарга: «Туруорсубут боппуруостаргыт барыта быһаарыллыбыта. Эһигини кытары хаста да көрсүбүппүт. Онон бүгүҥҥү пикети тэрийэргэ туох да төрүөт баарын көрбөппүн. Мин билэрбинэн, эбии мэктиэни көрдүүгүт. Ону биһиги эһиэхэ биэрэ сылдьабыт, мунаахсыйыа суоххутун сөп. Тырааныспар төлөбүрэ инникитин да оннунан хаалыа. Билигин диализка сылдьааччылары таһыы боломуочуйата Үлэ уонна социальнай сайдыы министиэристибэтигэр баар. Туһааннаах нуорма актата бигэргэннэҕинэ, боломуочуйаны биһиги бэйэбитигэр ылабыт. Онуоха Дьокуускай куораты эрэ буолбакка, өрөспүүбүлүкэни барытын хабыахтаахпыт. Диализ кииннэрэ баар улуустарга ыарыһахтары тырааныспарынан таһыыга эмиэ уустуктары көрсөллөр. Онон боппуруоһу биир кэлимник быһаарыахпыт», – диэтэ.
Миниистир пикет кыттыылаахтарын барыларын интэриэһиргиир боппуруостарын дьүүллэһэргэ кабинетыгар ыҥырда. Онно пикеттээчилэри кытары тырааныспары тэрийии, ону олоххо киллэрии механизмын уонна болдьоҕун сиһилии дьүүллэстилэр. Ону сэргэ санаторийдарга, курортарга эмтэнии (чуолаан Новороссийскайга, Геленджиккэ доруобуйаларын бөҕөргөтүнэллэр), федеральнай клиникаларга бүөрү көһөрүү, улуустарга диализ саҥа кииннэрин аһыы тустарынан интэриэһиргээтилэр.
Миниистир быһаарбытынан, 2014 сыллаахха 204 миэстэлээх гемодиализ амбулаторнай киинэ аһыллан, бүөрү солбуйар терапияҕа уочарат толору суох оҥоһуллубута, онон өрөспүүбүлүкэ доруобуйатын харыстабылын биир сытыы кыһалҕата быһаарыллыбыта. Оттон диализка сылдьааччылар медицинскэй көмө хаачыстыбатыгар улахан сэмэ-суҥха суоҕун туһунан эттилэр.
Михаил Сапожников суруналыыстар уонна уопсастыбаннас ортотугар миниистири кытары кэпсэппиттэриттэн уонна миниистир тус бэйэтэ эрэннэрбититтэн үөрбүтүн туһунан эттэ.
х х х
Иван Иванов, СӨ Доруобуйа харыстабылын министиэристибэтин кылаабынай хирура:
– Ыарыһахтар бу араҥалара СӨ Доруобуйа харыстабылын министиэристибэтин ураты хонтуруолугар тутуллаллар. Кинилэри эмтэнэр сирдэригэр уонна дьиэлэригэр тириэрдии боломуочуйатын уларытыы диализниктары инбэлииттэр уопсай бөлөхтөрүттэн араара тутар соруктаах оҥоһулунна. Ол, биллэн турар, тырааныспарынан таһыы хаачыстыбатын тупсарыаҕа.
Саха сирэ диализниктарга ураты болҕомто ууруллар Россия аҕыйах регионун иһигэр киирсэр. Бастатан туран, олорор дьиэлэрэ суох диализниктар дьиэ арендалаһаллара төлөнөр. Кинилэргэ анаан Дьокуускайга социальнай дьиэҕэ квартиралар бэриллэллэр. Иккиһинэн, тырааныспар ороскуотун сабарга ый аайы 3000 суумалаах төлөбүр көрүллэр.
Өрөспүүбүлүкэҕэ кэнники 5 сылга бүөр ыарыһахтарга медицинскэй көмөнү оҥоруу хаачыстыбата биллэ тубуста. 2009 сыллаахха гемодиализ миэстэтинэн хааччыйыы көрдөрүүтэ 100 тыһыынча нэһилиэнньэҕэ 17,9 буоллаҕына, 2015 сылга ити көрдөрүү 30,8 тэҥнэстэ.
Саха сиригэр гемодиализ 4 отделениета баар, 32 аппарат үлэлиир. 2009 с. искусственнай бүөр 14 аппарата баара, 163 ыарыһах диализ ылара. 2015 сылга ыарыһахтар ахсааннара икки төгүл кэриэтэ элбээн, 292 киһи буолла.
Билигин диализ көмөтүгэр наадыйааччыларга уочарат суох. Ыарыһахтар бюджет суотугар ыарахан сыаналаах эминэн хааччыллаллар.
Комментарии
Авторизация на сайте через социальные сети