Бүлүү куорат олохтоохторо, ыалдьыттара бу тэрээһин быйыл ордук таһаарыылаахтык ыытыллыбытын, бородууксуйа арааһа, ахсаана элбээбитин бэлиэтииллэр.
Мунньахха улууска быйыл тиксэриллибит былаан үгүс өттө туолбута, сорох өттө аһардыллыбыта бэлиэтэннэ. Маны таһынан тыа хаһаайыстыбатын бородууксуйатын оҥорууга саҥа сүүрээннэр киирбиттэрэ, олохтоох сыыры оҥоруу, мүөттээх ыҥырыаны үөскэтии дьон-сэргэ биһирэбилин ылыан ылла. Быйыл Бүлүү оройуонун өрүс уҥуор өттүгэр угут сыл туран ттооһуҥҥа ыарахаттары көрсүбүттэр, быйылгы кыстыгы туорааһыҥҥа от тиийбэтэ улахан уустугу үөскэтэр. Эбии аһылыгы, оту улуус тас өттүттэн булууга-аҕалыыга аҥардас улуус, нэһилиэк таһымыгар кыаллар кыаҕа суоҕун бэлиэтииллэр. Маны таһынан улуус салалтата тыа хаһаайыстыбатын сайдыытыгар 12 мөл. кэриҥэ үбү көрүммүтүн, ону тэҥэ нэһилиэктэр 400 тыһ. тиийэ көрүммүттэрин бэлиэтээн ааһыахха наада. Быйылгы дьылга 10 тыа хаһаайыстыбатын объега муниципальнай, государственнай программалар нөҥүө уонна хаһаайыстыбалар бэйэлэрин үптэрин кыттыһыннаран үлэҕэ киллэриллибиттэр.
Мунньаҕы үрдүк ситиһиилээх, таһаарыылаах үлэлээх дьону чиэстээһининэн түмүктээтилэр. Ол курдук наҕараадалары туттулар:
- «Саха Өрөспүүбүлүкэтин тыатын хайаайыстыбатын туйгуна» аат:Дмитриева Галина Николаевна - «Бөтүҥ»ТХПК зоотехнига, Доргонова Анна Владимировна – «Лөкөчөөн нэһилиэгин» баһылыга, Федоров Альберт Егорович –«I Күүлэт»ТХПК үлэһитэ, Сергеева Галина Афанасьевна – «Мастаах»ПК ыанньыксыта.
- «Саха Өрөспүүбүлүкэтин тыа хаһаайыстыбатын бэтэрээнэ» аат: Шамаев Дмитрий Егорович – Дьөккөн нэһилиэгэ, Григорьева Маргарита Егоровна – Тааһаҕар нэһилиэгэ, Бадаев Прокопий Николаевич –Чернышевскай нэһилиэгэ,Степанов Владимир Спиридонович – 2-с Күүлэт нэһилиэгэ.
- Саха Өрөспүүбүлүкэтин Тыатын хаһаайыстыбатын уонна аска-үөлгэ политикатын министерствотын бочуотунай грамотата:Алексеев Василий Гаврильевич – «Мастаах» ПКүлэһитэ, Сергеева Муза Александровна – Бүлүү улууһунааҕы тыа хаһаайыстыбатын департаменын кылаабынай экономиһа, Львов Афанасий Афанасьевич –«Хаҕын»ПК тракториһа.
- Саха Өрөспүүбүлүкэтин Тыатын хаһаайыстыбатын уонна аска үөлгэ политикатын министерствотын махтал суруга:Никитин Николай Семенович –«Ампаардаах» ХЭУо тракториһа, Борисова Александра Ивановна – Чернышевскайдааҕы ветеринарнай пуунветвраһа, Никитин Григорий Григорьевич –«Тыымпы»ПК биригэдьиирэ.
- «Бүлүү улууһа тыа хаһаайыстыбатыгар өҥөлөрүн иһин» бочуот бэлиэтэ:Кононов Николай Федорович - идэлээх союзтар уонна тыыл бэтэрээннэрэ, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Саха Өрөспүүбүлүкэтин бочуоттаах бэтэрээнэ, Чернышевскай нэһилиэгин бочуоттаах олохтооҕо, Васильева Надежда Алексеевна – РСФСР Үрдүкү Сэбиэтин 11 ыҥырыылаах мунньаҕын дьокутаата, Саха Өрөспүүбүлүкэтин тыатын хаһаайыстыбатын туйгуна, Бүлүү куорат уонна Халбаакы нэһилиэгин бочуоттаах олохтоохторо, Новиков Айал Петрович – 1 Күүлэт нэһилиэгин баһылыга, Матвеева Елизавета Ивановна – тыа хаһаайыстыбатын бэтэрээнэ, Кыргыдай нэһилиэгэ, Львова Тамара Дмитриевна - «Хаҕын»ПК ыанньыксыта, Абрамова Степанида Степановна – Саха сирин тыатын хаһаайыстыбатын бэтэрээнэ, Дьөккөн нэһилиэгэ, Васильев Федор Игнатьевич – Саха сирин тыатын хаһаайыстыбатын бэтэрээнэ, Халбаакы нэһилиэгэ, Семенов Илья Ильич – «1 Күүлэт»ТХПК тракториһа.
Бу күн бааһынай хаһаайыстыбылар ортолоругар «Улуус бастыҥ бааһынай хаһаайыстыбата» диэн күрэс үрдүк таһаарыылаахтык ыытылынна. Манна 10 бааһынай хаһаайыстыба кыттыыны ылла. Күрэс сүрдээх тыҥааһыннаахтык, күүрүүлээхтик барда. Хаһаайыстыбалар уонна нэһилиэк дьаһалталара күүстээхтик тэринэн киирбиттэрэ харахха быраҕыллар. Маны таһынан хаһаайыстыбалар бородууксуйаларын аукциона буолбута интэриэһи үөскэттэ. Бу күрэскэ Степанов Юрий Семенович (Кыргыдай) саҥа саҕалааччы бааһынай хаһаайыстыбата кыайыылааҕынан таҕыста.
Нөҥүө күнүгэр, Бүлүү улууһун Бороҕон нэһилиэгин Чай сэлиэнньэтигэр Тыа хаһаайыстыбатын күннэрин бэлиэтээһин буолан ааста. Тэрээһин иһинэн саҥа саҕалааччы бааһынай хаһаайыстыба Фомин В.М. 50 төбөлөөх саҥа хотону үлэҕэ киллэрэр сиэрэ-туома ыытылынна. Бу хотон тутуута аныгы матырыйаалынан оҥоһуллубут, киэҥ-куоҥ, сыһыары тутуулаах. Ынах сүөһү толору киирэн турар. Бу хотону тутууга Фомин В.М. бэйэтин үбүн кыттыннаран, Тыа хаһаайыстыбатын уонна аска-үөлгэ политикатын министерствотын иһинэн ыытыллар «Поддержка начинающего фермера» гранын кыайан ылбыт үбүнэн, Бүлүү улууһун дьаһалтатын, тыатын хаһаайыстыбатын департаменын, Бороҕон нэһилиэгин дьаһалтатын үбүлээһиннэринэн уонна олохтоохтор көмөлөрүнэн кыстык саҕаланыыта үлэҕэ киирдэ.
Маны таһынан «Саха Өрөспүүбүлүкэтин агропромышленнай комплексын сүбэлиир-методологическай киинэ» автономнай тэрилтэ тэрээһининэн нэһилиэк олохтоохторун, тыа хаһаайыстыбатын бородууксуйатын оҥорон таһаарааччыларын, тыа хаһаайыстыбатын специалистарын, нэһилиэктэр баһылыктарын, улуус тыатын хаһаайыстыбатын департаменын улэһиттэрин, улуус дьаһалтатын салайааччыларын кытары «төгүрүк остуол» ыытылынна. Бу тэрээһиҥҥэ биһиги специалистарбыт Филиппов Д.Д., Шарин П.П., Никифоров В.С. анал лекциялары аахтылар уонна араас ыйытыыларга хоруйдаатылар. Түмүккэ, Тыа хаһаайыстыбатын уонна аска-үөлгэ политикатын министерствотыгар, «Саха Өрөспүүбүлүкэтин Агропромышленнай комплексын сүбэлиир-методологическай киинэ» автономнай тэрилтэҕэ, улуус уонна олохтоох дьаһалталарга махтал тыллары эттилэр.
Бороҕон нэһилиэгин олохтоох дьаһалтата тыа хаһаайыстыбатын үлэһиттэригэр анаан сынньалаҥ киэһэтин ыытан, кырдьаҕастарын чиэстээн, бочуоттаан санааларыгар санаа, күүстэригэр күүс эбэн түмүктэннэ.
Түмүккэ этиэҕи баҕарыллар, улуус салалтата, нэһилиэктэр дьаһалталара тыа хаһаайыстыбатын сайыннарыыга улахан болҕомто уураллара, инникигэ кэскиллээх былааннары туруоруналлара, саҥа көрүҥнэри олоххо киллэрэллэрэ инникитин кэскиллээх буолуоҕа.
Никифоров В.С. «СР агропромышленнай комплексын сүбэлиир-методологическай киинэ» тэрилтэ кылаабынай специалиһа.
Комментарии
Авторизация на сайте через социальные сети