ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
10 ноября 2015, 14:34

Өрөспүүбүлүкэ бастыҥ участковайа Сунтаарга олорор


Оҕо сылдьан, 60-с сыллардааҕы киинэ дьоруойун, участковай Анискин туһунан бэркэ сэргээн көрөр этим. Федор Иваныч дэриэбинэтигэр ханна хаһан туох буолбутун, хас биирдии олохтооҕун сирэй көрөн билэр, ким тугунан тыынарын эндэппэт – оччотооҕу милииссийэ участковайдарын бастыҥ хомуур уобарастара этэ. Оттон аныгы “анискиннар” бааллар дуо?

Соторутааҕыта “Народный участковый-2015” диэн сылын аайы ыытыллар Бүтүн Россиятааҕы куонкурус иккис түһүмэҕэ түмүктэммитэ. Бу куонкурус сыалынан-соругунан полиция үлэтэ аһаҕас буолуутун ситиһии, кини нэһилиэнньэни кытта ыкса алтыһыытын үрдэтии буолар. Иккис түһүмэх түмүгүнэн, биһиги өрөспүүбүлүкэбитигэр бастыҥ участковай боломуочунайынан Сунтаартан полиция капитана Петр Гороховааттаммыта. Куонкурус бүтэһиктээх түһүмэҕэ сэтинньи 1-10 күннэригэр ыытыллан, бүгүн түмүктэниэхтээх.

Петр Горохов Дьааҥы улууһун Улахан-Күөл сэлиэнньэтиттэн төрүттээх. 1984 сыл от ыйын 12 күнүгэр элбэх оҕолоох ыалга алтыс оҕонон күн сирин көрбүт. Табалаах орто оскуолатын 2001 сыллаахха бүтэрэн, ити сыл Дьокуускайдааҕы Тыа хаһаайыстыбатын академиятыгар «Бухгалтерский учет, анализ и аудит» диэн идэҕэ үөрэнэ киирбит.

- Петр, эн бухгалтер идэтин ылбыт киһи, хайдах эмискэ ис дьыала уорганнарыгар сулууспалыырга быһаарыммыккыный?

- Үөрэхпин бүтэрэн баран, кылгас кэмҥэ “Якутпроект” тэрилтэҕэ үлэлии сылдьыбытым. Онтон 2005 сыл күһүнүгэр ыал буолан, 2008 сыл сайыныгар Сунтаар Элгээйитигэр көһөн кэлбитим. Онно баһылык Александр Миронов миигин спортсаала дириэктэринэн уонна спортинструкторынан үлэлэппитэ. Ити кэмҥэ Сунтаардааҕы Ис дьыала отделын уопсастыбаннай куттал суох буолуутун (МОБ) начальнига Александр Семенов “участковайынан кэлэн үлэлээ” диэн ыҥырбытыгар, сөбүлэспитим уонна күн бүгүнүгэр диэри үлэлии сылдьабын.

- Эһиги, участковайдар, полиция атын сулууспаларыттан үлэҕит туох уратылааҕый дии саныыгын?

- Уратыта диэн – эн манна ГИБДД инспектора, силиэдэбэтэл, дознаватель, оперативник, сааны-саадаҕы бэрэбиэркэлээччи – барытын түмэн үлэлиигин, дэлэҕэ даҕаны, участковайы “ходячий отдел” диэхтэрэ дуо? Саамай сүрүнэ – дьону кытта быһаччы алтыһар үлэ, олох үчүгэйин-куһаҕанын күннэтэ көрө сылдьаҕын. Түүн-күнүс ыҥырыыга, көмөҕө тиийэргэ бэлэм буолаҕын.

- “Универсальнай полицейскайы”, ол эбэтэр, участковайы бары сирэй көрөн билиэхтээхтэр диэн этэллэр. Оттон бэрээдэктээх, сокуону кэспэт гражданнар хайаан да билэллэрэ наадата суох ини, маныаха эн санааҥ?

- Дьон бары көрөн билиэхтээх дии саныыбын. Оттон участковай ханнык аадырыска хайдах ыал олорорун эндэппэккэ билиэхтээх.

- Петр, эн күннэтэ араас дьону кытта алтыһаҕын, саанар-суоһурҕанар, үөхсэр түбэлтэлэрэ бааллар этэ дуо?

- Оннук баар буолааччы, “дьиэҕэр тиийиэхпит” эҥин диэн саанааччылар. Үксүгэр дьиэтигэр садыамныыр-айдаарар эбэтэр уулуссаҕа итирик туруктаах тутуллубут дьон оннук тыллаһар. Ол эрэн, төһө да үөҕүстэллэр, хаһыытааталлар-ыһыытаталлар, үчүгэйдик, холкутук кэпсэттэххэ, уоскуйаллар, тохтууллар.

- Үлэҕиттэн аралдьыйар-сынньанар дьарыктааххын дуо? Ыллыыр-үҥкүүлүүр диэн истибитим...

- Оскуолаҕа үөрэнэр кэммэр ансамбылга ыллаабыт-үҥкүүлээбит буолан, билигин кэнсиэрдэргэ, улууска ыытыллар тэрээһиннэргэ, спортивнай күрэхтэһиилэргэ куруук кыттабын. Бэһис кылаастан сааны туппут киһи, күһүн-саас бултуурбун сөбүлүүбүн.

- Эһиэхэ, быраабы араҥаччылыыр уорганнарга сулууспалыыр дьоҥҥо, дьиэ кэргэн оруола сүҥкэн. Бэйэҥ дьиэ кэргэниҥ туһунан билиһиннэрэ түһүөҥ дуо?

-  Оннук -- тыылыҥ үчүгэй буоллаҕына, үлэҥ да тахсыылаах буолар. Мин олоҕум аргыһа Мария Кобельянова суруналыыс идэлээх, Сунтаар улууһун култуураҕа, духуобунай сайдыыга управлениетын начальнига. Уолбут Айаан маҥнайгы кылааска үөрэнэр. Кэргэним миигин куруук өйүүр буолан, бигэ тирэхтээхтик сананабын.


Бу дьыл алтынньы 22 күнүгэр, киэһэ 20 ч 20 мүн. Сунтаар полициятын дьуһуурунай чааһыгар “суһал көмө” диспетчериттэн иһитиннэрии киирбит. Бүлүү өрүс сиикэйигэр биир киһи түспүтүн, көмөҕө ыҥыран хаһыытыырын туһунан.

Быһылаан тахсыбыт сиригэр тутатына полицейскайдар Петр Горохов, Иван Сарафанов тиийбиттэр. Сунтаар сэлиэнньэтиттэн 3 км сиргэ, өрөмүөннүүр техническай станция оройуонугар өрүс кытылыгар сылдьар дьахтары көрбүттэр. Уолуйбут дьахтар кэпсээниттэн өйдөөбүттэрэ – доҕорунаан уу баһа кэлбиттэр, киһитэ өрүс сиикэйигэр түһэн, мууска илиитэ халтарыйан, кыайан тахсыбакка сылдьар эбит. Полицейскайдар тута рациянан эбии нэрээт ыҥырбыттар, быа аҕалалларыгар эппиттэр. Ол эрэн, ууга харбыалаһа сылдьар киһи субу тимириэн сөбүн өйдөөн, формаларын кууркатын устан, сиэхтэриттэн баайан баран, киниэхэ сыыллыбыттар. Сарафанов Иван чугаһаан баран, сиэхтэн тутуһарыгар эппит, онтон кинини атаҕыттан Петр Горохов тутан, ороон таһаара сатаабыттар. Ити кэмҥэ ОВО нэрээтэ -- Амбросий Гуринов уонна Михаил Васильев – кэлбиттэр уонна фаранан сырдатан, быһыы-майгы хайдаҕын көрөөт, Гуринов ууга сылдьар киһиэхэ сыыллан тиийэн, быаны бырахпыт. Ол эрэн, муустаах ууга өр сылдьыбыт киһи кыайан туппат буолбутун көрөн, бэйэтин быанан баанан, өссө чугаһаан, киһини саҕатыттан уонна сиэҕиттэн соһон таһаара сатаабыт. Онтон атыттар быаттан тардан, сыралаһан, дьэ, киһилэрин соһон таһаарбыттар уонна балыыһаҕа илдьибиттэр. Ити кэмҥэ таһырдьа -7 кыраадыс тымныы, өрүс мууһа халыҥыы илик буолан, полицейскайдар бэйэлэрэ эмиэ уу анныгар барар кутталлаахтара.

Киһини ууттан быыһаан, дьоруойдуу быһыыны оҥорбуттарын иһин, бу полицейскайдар бары наҕараадаламмыттара, Петр Горохов - СӨ Ил Дарханын Махталынан.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 767 Источник: ЯСИА Автор: Вера Макарова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ