Тыа хаһаайыстыбатын исписэлиистэрин өрөспүүбүлүкэтээҕи 1-кы сүлүөттэрин күрэхтэһиилэригэр мэҥэ-хаҥаластар кыайыы көтөллөннүлэр

Тыа хаһаайыстыбатын исписэлиистэрэ Хаҥалас улууһугар, «Орто Дойду» туристическай комплекска буолбут өрөспүүбүлүкэтээҕи 1-кы сүлүөттэрин иккис күнүгэр илии-атах оонньуутугар күрэстэстилэр.


- Физкультурник күнүн иннинэ, бу тыа үлэһит дьоно үлэни уонна сынньалаҥы дьүөрэлээн илии-атах оонньууларыгар түөрт көрүҥҥэ хапсаҕайдаһан тустууга, мас тардыһыытыгар, алта түһүмэхтээх эстафетаҕа уонна хамаанданан ханаат тадыһыытыгар кытта сылдьаллар. Сүлүөт кыттыылаахтара үчүгэй бэлэмнээх кэлбиттэр, - диэтэ Хаҥалас улууһун спорка управлениетын сүрүннүүр исписэлииһэ Р.Д.Протодьяконов.
Хапсаҕайдаһан тустууга ыарахан ыйааһыҥҥа бастаабыт Мэҥэ-Хаҥалас улууһуттан сылдьар Спартак Попову кыайыытынан эҕэрдэлээтим уонна аҕыйах тылы этэригэр көрдөстүм:
- Төрдүм — Нөөрүктээйи. Үөрэхпин бүтэрэн баран былырыыҥҥыттан Хаатылымаҕа тахсан тыа хаһаайыстыбатын исписэлииһинэн үлэлиибин. Оҕо эрдэхпиттэн мас тардыһыытынан дьарыктаммытым уонна СӨ спордун маастарын нуорматын толорбутум, - диэн үөрүүтүн үллэһиннэ тыа хаһаайыстыбатын эдэр үлэһитэ.
Сүлүөт күрэхтэһиилэригэр олус кыахтаах эдэр дьон кытыннылар, бэрт үчүгэй хапсыһыылар, хамсаныылар буоллулар. Манна спорт маастарын нуорматын толорор таһымнаах уолаттар элбэхтэр эбит.

Хапсаҕайдаһан тустууга 80 кг диэри ыйааһыҥҥаДьулус Стручков (Мэҥэ-Хаҥалас) бастаата. Иккис миэстэҕэ Николай Исаков (Горнай) уонна үһүс бириистээх миэстэҕэ Данил Дьяконов (Нам) таҕыстылар.
80 кг үөһэ ыйааһыннаахтарга Спартак Попов (Мэҥэ-Хаҥалас) кыайыылааҕынан буолла, иккис призерунан Олег Иринеев (Хаҥалас) уонна үһүс бочуоттаах миэстэни Ефим Гоголев (Нам) ылла. Бу иккис, үһүс буолбут бөҕөстөр Хаҥалас уонна Нам улуустарын тыатын хаһаайыстыбатын салайар дьон спорка да, тэрийэр үлэҕэ да эргиччи дэгиттэр кыахтаахтарын көрдөрдүлэр.
Оттон мас тардыһыытыгар үлэ дьоно туппут мастарын биэрбэт курдук дьирээлэһэн туран кииристилэр. 80 кг диэри ыйааһыннаахтарга Василий Окороков (Мэҥэ-Хаҥалас) бастакы, Константин Аржаков (Чурапчы) иккис, Алексей Корякин (Нам) үһүс буоллулар. 80 кг үөһэ ыйааһыннаахтарга Спартак Попов (Мэҥэ-Хаҥалас), Семен Семенов (Бүлүү) бастакы, иккис миэстэлэри ыллылар. Үһүс бириистээх миэстэни Хаҥалас улууһун тыатын хаһаайыстыбатын эдэр үлэһитэ Валентин Иванов ылан дьонун-сэргэтин үөртэ.
Хамаанданан күрэстэргэ - алта түһүмэхтээх эстафетаҕа Уус-Алдан бастакы, Нам улууһа иккис, горнайдар үһүс миэстэҕэ тахсан үөрүүлэрэ үрдээтэ. Ыһыылаах-хаһыылаах ханаат тардыһыытыгар уус-алданнар кими да тулуппатылар. Иккис миэстэҕэ Амма улууһун хамаандата таҕыста. Үһүс миэстэҕэ Мэҥэ-Хаҥалас үлэһит дьоно тигистилэр уонна уопсай түмүккэ 1-кы сүлүөт күрэхтэһиилэрин кыайыылаахтарынан буоллулар.