Ол эрээри... Саха киһитэ үтүмэн үйэлэргэ киэҥ көҕүстээҕинэн, ырааҕы ыраҥалаан көрөр мындыр өйдөөҕүнэн уратылаах. Киһи уйулҕатын үөрэтээччилэр куһаҕан сурах, кэмэлдьи өйү-санааны буомурдарын, доруобуйаны кэбирэтэрин, инники олоххо ыра санааны кэҕиннэрэрин туһунан куруук этэллэр. Оччотугар биһиги тоҕо наар куһаҕан сурахтары эккирэтэ сылдьан, эбэн-сабан, күүркэтэн суруйар уонна кэпсиир буоллубут? Тоҕо туох эрэ мөкү түбэлтэ таҕыста да, ону сиэллээн-кутуруктаан, эбии кыынньаан, уокка тууһу быраҕан биэрэбитий? Францияҕа буолбут террористар кырыктаах быһыыларын кэнниттэн Ватсапка сымыйа-кырдьык аҥардаах «сэрэтиилэр» туола түстүлэр. «Дьон элбэх сиригэр сылдьымаҥ», «Бүгүн ити оскуолаҕа буомба уураллар үһү», «Ол рейсинэн көтүмэҥ», «Хатастыыр трассаҕа аптамааттаах дьон тураллар үһү» уо.д.а. омуннаах сурахтар Ватсап ситимин толордулар. Биллэн турар, сэрэхтээх буолар хаһан баҕарар наада.
Мин санаабар, итинник уйулҕаны хамсатар сурахтар, бастатан туран, чараас дууһалаах оҕолорго дьайаллар. Бу күннэргэ биир дьүөгэм обургу саастаах аймах кыыһа оскуолаҕа соҕотоҕун барбат буолбутун туһунан кэпсээтэ. «Уруккуттан да кыыс оҕо улахан куоракка таҥара илиитигэр сылдьарын билэрим. Оскуола кэнниттэн дьиэтигэр киирэн кэллэҕинэ, мин саҕа дьоллоох киһи суох. Урут оскуолаҕа атаарарбын, илдьэрбин сөбүлэспэт, оҕолор күлүөхтэрэ диэн кыбыстар бэйэтэ, билигин таһырдьа да тахсыан куттанар буолан хаалла. Тоҕо оннук буолбутун ыйыттахха чопчу эппиэти биэрбэт. «Оттон Ватсапка суруйбуттар дии, ханна баҕарар буомба ууруохтарын сөп үһү, арай биһиги бары өлөн хааллахпытына» диэн нэһиилэ турар бэйэбин куттаата. Саамай сөхпүтүм диэн сахалыы кинигэни хаһан да илиитигэр ылан көрбөтөх оҕом «Алдьархай соҕотоҕун кэлбэт», «Куһаҕан кутуруктаах», «Куһаҕан сурах сымыйа буолбат» диэн этиилэри ватсабыгар суруммут» – диэн дьүөгэм аймалҕанын үллэһиннэ.
Оҕо барахсан иллээх дьиэ кэргэниттэн, сылаас уйатыттан тахсан барыа эрэ кэрэх, онто да суох баҕарбытын да, баҕарбатаҕын да иһин олох араас мөкү түгэннэрин көрөр. Ону кини дууһата төһө чарааһыттан, уйаныттан көрөн ылынар эбэтэр утарсар күүһүн туһана сатаахтыыр. Биир алҕас этиллибит тыл киһини өлөрүөн-өһөрүөн, биир сидьиҥ быһыы инникикэ эрэли симэлитиэн сөбүн улахан дьон ама билбэт буолуохпут дуо? Оҕолорбутун «киртэн-хохтон», киһини куттуур, уйулҕаны хамсатар сымыйа сурахтартан харыстыаҕыҥ!
Комментарии
Авторизация на сайте через социальные сети