Ол курдук, былырыын муус устарга диализ амбулаторнай киинэ ити ньыманан тутуллан үлэҕэ киирбитэ. Бу киин аһылларын өрөспүүбүлүкэ ыарыһахтара, кинилэр аймахтара, чугас дьоно төһөлөөх күүттүлэр этэй? Саҥа дьиэ тутуллан үлэҕэ киириитэ элбэх кыһалҕаны суох оҥорбута саарбаҕа суох. Инбэлииккэ тахсыы аҕыйаабыта, эмтэнэр дьон толору олоҕунан олороллоругар кыах бэриллибитэ. Ол эрээри, ыарыһахтар кыһалҕалара син биир аҕыйаабат. Ону эмп сыаната үрдүгүн уонна уочарат уһунун утарсан элбэх пикеттэр буолбуттара да туоһулуур.
Баар кыһалҕалары соторутааҕыта СӨ премьер-министрэ Галина Данчикованы кытары көрсүһүүгэ дьүүллэстилэр.
Билигин диализ тиһиктээх көмөтүгэр наадыйар дьон ахсаана Дьокуускайга – 294, Жатай бөһүөлэгэр баар амбулаторияҕа 230 киһи буолла.Кинилэри эмтэнэр сирдэригэр илдьэргэ-аҕаларга баара-суоҕа түөрт массыына сүүрэрэ инбэлииттэри таһыы хаачыстыбалаах буоларын кыайан хааччыйбат. Диализка сылдьар инбэлииттэри тырааныспарынан хааччыйыыны тупсарар туһуттан бу боломуочуйаны СӨ Доруобуйа харыстабылын министиэристибэтигэр (анал медицинскэй көмөнү оҥоруу быһыытынан) биэрэр ордук көдьүүстээх буолуоҕун туһунан этилиннэ.
Онон гемодиализ процедуратын кэмигэр ылыыны СӨ бырабыыталыстыбата ураты хонтуруолга ыларын учуоттаан, тырааныспарынан хааччыйыыны 2016 сылтан СӨ Доруобуйа харыстабылын министиэристибэтигэр биэрэргэ быһаарылынна. Ол гынан баран, ыарыһахтарга материальнай көмөнү оҥоруу боломуочуйата СӨ Үлэҕэ уонна социальнай сайдыыга министиэристибэтигэр хаалла. Диализка куруук сылдьар инбэлииттэргэ айаннарын төлөбүрүгэр 3000 суумалаах материальнай көмө оҥоһуллар.Доруобуйа харыстабылын министиэристибэтэ өрөспүүбүлүкэ улуустарыгар тырааныспар өҥөтүн хаачыстыбатын тупсарарыгар сонун этиилэри киллэриэхтээх. Ону сэргэ министиэристибэ диализниктары эминэн хааччыйыы туһунан толору информацияны биэрэн иһэргэ уонна тустаах көмөнү оҥорорго бэлэмин туһунан иһитиннэрдэ.
Комментарии
Авторизация на сайте через социальные сети