Бу туһунан СИА-ҕа оскуола директора Дария Егоровна Иванова иһитиннэрэр:
«Биһиги “Ситим” диэн элбэх хайысхалаах лааҕырдаахпыт. Ол үлэтин сыллата кэҥэтэргэ дьулуһабыт. Лааҕырбыт биир сүрүн хайысхатынан оҕуруот аһын олордуунан дьарыктаныы буолар. Манна саас эрдэттэн 10 үөрэнээччи рассада олордуутугар сүрдээх эппиэтинэстээхтик үлэлэстэ. Ол түмүгэр, былааннаабыппыт курдук, сирбитин-уоппутун кэҥэтэн, быйыл 3 га сиргэ - хортуоппуй, 2 гаҕа хаппыыста олордулунна. Оттон билигин оҕуруоту көрүүгэ-харайыыга уопсайа 15 оҕо үлэлии сылдьар. Дарбасова Нарыйа Гаврильевна салайар Таатта улууһунааҕы Дьарыктаах буолуу киинин кытта сыллата дуогабар түһэрсэммит, оҕуруокка үлэлиир оҕолорбут хамнас аахсаллар. Онон бу Киин биһигини кытта тиһиктээхтик үлэлэһэригэр махтаныах кэриҥнээхпит. Оҕолор сүрдээх эппиэтинэстээхтик көрөн, бүөбэйдээн күһүн балачча үүнээйини хомуйан үөрдэллэр. Ол барыта оскуолабыт остолобуойугар туттарыллан, үөрэнээччилэрбитин аһатарбытыгар эбилик буоларыттан үөрэбит, киэн туттабыт.
Маны сэргэ сынньалаҥы тэрийии, айылҕаны кэтээн көрүү уонна эмтээх оту хомуйуу лааҕыра оҕо билиитин-көрүүтүн хаҥатара саарбахтаммат. Лааҕырга үөрэнээччилэр төрөөбүт сирдэрин үүнээйитин үөрэтэллэр. Манна сылдьыан баҕалаах сыллата элбээн иһэриттэн үөрэбит.
Оттон уруһуй лааҕырыгар сылдьар оҕолор төрөөбүт айылҕаларыттан арахпаттар. Уруһуйдуулларын сэргэ үүнээйи арааһын үөрэтэллэр, айылҕа дьиктитин кэпсэтэллэр, элбэҕи билэргэ-көрөргө дьулуһаллар. Нэһилиэк кэрэ-бэлиэ сирдэригэр сылдьаллар.
Ааҕыы лааҕырыгар сылдьааччылар суруйааччылар олохторун-дьаһахтарын, үлэлэрин-хамнастарын туһунан сэргээн истэллэр. Талан ылбыт айымньыларын арыт бииргэ дорҕоонноохтук ааҕаллар, арыт дьиэлэригэр аахпыттарын ырытыһаллар, санааларын үллэстэллэр. Бу лааҕыр үөрэххэ туһалааҕын бэлиэтээччи манна элбэх”, -- диэтэ кини.
Директор быһаарбытынан, оҕуруоту көрүүгэ-харайыыга 14-тэн үөһэ саастаах оҕолор үлэлииллэр. Онтон атын хайысхаларга 1-9 кылаас оҕолоро сайын ахсын астына, дуоһуйа сынньаналлар.
Комментарии
Авторизация на сайте через социальные сети