- Саҥа нүөмэргэ прозаны таптааччылар народнай суруйааччы Николай Лугинов «Айгылла», Куорсуннаах «Аар тиит уонна хахсаат тыал», Данил Макеев «Үөлээнниилэр» диэн кэпсээнин ааҕан, саха киһитин олоҕун, тыйыс дьылҕатын кытта билсиэххит. Федора Дьячковская ааҕааччыны долгутар «Сибиэн сырыыта», «Аччык оҕо санаата», «Сүтүк», «Дьол» уонна «Таайым туһунан» кэпсээннэрин ааҕааччы дьүүлүгэр таһаарыаҕа. Поэзияны сөбүлээччилэр народнай поэттар Наталья Харлампьева уонна Иван Мигалкин иһирэх иэйиилээх хоһооннорун астына-дуоһуйа ааҕыахтара. Ону таһынан Байаҕантай, Зинаида Архипова уонна Былаас Аргыс хоһооннорун кытта билсиэхтэрэ.
- Литература сылын түмүктэниитинэн Саха сирин Суруйааччыларын сойууһун бэрэссэдээтэлин солбуйааччы Гаврил Андросов «Литература сылын чыпчааллара уонна хапчааннара» ыстатыйатын уонна Иван Осипов «Үрүҥ хаар алгыһа» поэзия аан дойдутааҕы фестивалын кыттыылаахтарын кытта кэпсэтиитин ааҕыаххыт.
- «Тылбаас» рубрикаҕа народнай суруйааччы, аксакал Семен Руфов Чинчиз Айтматов «Муора кытылынан сүүрэр эриэн ыт» диэн сэһэнин туһунан ыстатыйатын уонна бу айымньыны Ил Түмэн спикерэ Александр Жирков тылбааһыгар билсиэххит.
- Ааҕааччы «Очерк уонна публицистика», «Биһиги юбилярбыт», «Критика уонна библиография», «Н.Д. Неустроев төрөөбүтэ 120 сылыгар» рубрикаларынан тахсыбыт матырыйааллартан классик суруйааччыбыт Николай Неустроев айар олоҕун туһунан ахтыыны, Софрон Данилов «Сүрэх тэбэрин тухары» романа билиҥҥи ааҕааччыга дьайыытын туһунан ыстатыйаны, Айыына Степанова уонна Елена Кузьмина билиҥҥи суруйааччылар айымньыларын туһунан санааларын кытта билсиэҕэ.
- Нүөмэри Уйбаан Ойуур түһэртээбит хаартыскалара, улахан айымньыга иллюстрацията уонна «Сахабэчээт» автономнай тэрилтэ рекламалара киэргэтиэхтэрэ.
- «Хас биирдии саха ыала ууруна сылдьан ааҕар, эһиил 90 сааһын туолар «Чолбон» сурунаалга сурутуҥ. Сахалыы тыын, сахалыы эйгэ кэҥээн-тэнийэн барыытыгар дьоһун кылааккытын киллэрсиҥ!» -- диир сурунаал сүрүн редактора Данил Макеев.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети