Теплай Ключка биэс квартиралаах дьиэни тутууга бэдэрээтчитинэн урбааньыт Александр Свинобоев үлэлиир. Николай Ефимов салайар биригээдэтигэр Николай Ефимов, Сергей Свинобоев, Евгений Тарскай, Иннокентий Кычкин уонна Максим Павлов үлэлииллэр. Металлическай турба акылааттаах 8х6 м уопсай иэннээх дьиэ тутулунна. Муостатыгар бетон кутулунна, ититилиннэ. Тас истиэнэлэрэ 20 см халыҥнаахтар, базальтынан ититилиннилэр, үрдүн гипсокартонунан бүрүйдүлэр. Дьиэ тас өттө профлииһинэн бүрүлүннэ, кырыыһата - тимир черепица, түннүктэрэ - стеклопакеттар. Биир хостоох квартиралар киирэр ааннара уонна кирилиэстэрэ туспа буолаллар. Хас биирдии квартираҕа хос, куукуна, туалет уонна ваннай бааллар.
Сантехникатын, ититэр ситимин, электрическэй ситимнэрин тардыы, түннүктэрин уонна ааннарын блоктарын туруоруу, ис өттүн нарылааһын үлэлэрэ хаалбыттар. Тутуу матырыйаалларын аҕалбыттар.
Дьиэни былаан быһыытынан быйыл ахсынньы ыйга туттарыахтаахтар, ол эрээри бэдэрээтчит үлэни алтынньыга бүтэрэргэ былаанныыр. Бу дьиэҕэ Развилкаттан үс, Теплай Ключтан икки ыал көһөн киириэхтэрэ.
Комментарии
Авторизация на сайте через социальные сети