Уоппуска кэмигэр айан ороскуотун төлөттөрөр бырааптаахтар:
– Судаарыстыбаннай аккредитациялаах үрдүк уонна орто профессиональнай үөрэх кыһаларыгар кэтэхтэн үөрэххэ ситиһиилээхтик үөрэнэр үлэһиттэр.
Аккредитациялаах үөрэх кыһаларыгар кэтэхтэн үөрэнэр үлэһиттэргэ айан ороскуота үөрэх дьылыгар сылга биирдэ төлөнөр. Орто профессиональнай үөрэххэ барааччыларга үөрэх дьылыгар биир төгүл, ол эрээри айан ороскуотун 50 бырыһыана эрэ төлөнөр.
Үлэлиир устудьуоннар айаннарын ороскуота үлэ командировкатын быраабылаларынан ааҕыллар. Ол быраабылалары үлэни биэрээччи олохтуур уонна кэллэктиибинэй дуогабарга эбэтэр нуорма актатыгар (холобур, тэрилтэ салайааччытын туһааннаах бирикээһигэр) ыйыллар.
– Уһук Хотугу сиргэ уонна онуоха тэҥнээх сирдэргэ олорор уонна федеральнай бюджеттан үбүлэнэр тэрилтэлэр үлэһиттэрэ, ол иһигэр дьиэ кэргэнин үлэлээбэт чилиэннэрэ.
– Уһук Хотугу сир усулуобуйатыгар уонна онно тэҥнээх сирдэргэ бюджет тэрилтэтигэр үлэлээччилэр уоппускаҕа барар айаннарын төлөбүрэ 2 сылга биир төгүл төлөнөр. Үлэһит үлэҕэ ылыллыбыт сылыттан айаны төлөтөр бырааба мэктиэлэнэр.
– Уоппуска кэмигэр айан ороскуотун сэргэ 30 киилэттэн элбэҕэ суох таһаҕас ороскуота төлөнөр.
Үлэһиккэ уонна кини дьиэ кэргэнин чилиэннэригэр айан уонна таһаҕас ороскуоттара кинилэр бииргэ олорор эрэ буоллахтарына уйунуллар. Бииргэ олорооччуларга кэргэнэ уонна кинилэр сокуоннай саастарын ситэ илик оҕолоро киирсэллэр.
Өскөтүн кинилэр уоппуска кэмигэр атын сиргэ бэйэлэрин транспордарынан айанныыр буоллахтарына, төлөбүр айан кэмигэр туһаныллыбыт оттук сыанатыттан көрөн оҥоһуллар. Онуоха заправкалыыр станциялар чектэрэ баар буолуохтаах.
Айан ороскуота үлэһит айаҥҥа турунуон иннинэ барыллаан ааҕыынан төлөнөр. Уоппускаттан таҕыстаҕына, ороскуота барыта төлөнөр.
Комментарии
Авторизация на сайте через социальные сети