Уйбаан биэс уолуттан үһэ Володя, Вадим, Виталий билигин хаһаайыстыбаҕа быһаччы үлэлии сылдьаллар. Икки уол үлэлэрин быыһыгар кэлэн көмөлөһөн бараллар эбит. Уолаттар үлэ бары ымпыгын –чымпыгын барытын бэйэлэрэ быһаарар буолбуттарыттан аҕа баһылык бүтэйдии үөрэр. Бааһынаҕа комбайынынан моркуоп хомуйа сылдьалларын көрдүбүт. Ол иннинэ, саҥа техникалара хортуоппуй хостоон, хомуйан, суортаан, аҕыс центнердээх куулларга кутар Дьоппуон омук «Тойонаки» комбайына үлэни түмүктээбитэ. «Кэскил» бааһынай хаһаайыстыбатын туруу үлэһитэ И.М.Яндреев кыра уола Виталий үлэ-хамнас уонна аҕатын туһунан бу курдук билиһиннэрдэ: “Сайыммыт олус кураан буолан бааһыналарбытыгар уу ыстаран таҕыстыбыт. Онон, сыыс от уонна эппитим курдук уу ыстаран сайылаатыбыт. Үлэбит хомуур түмүгүнэн биллиэ буоллаҕа”. Аҕаҥ хайдах бу сир үлэтигэр сыһыарбытай?-диэн ыйыппыппар, “Аҕабыт олус үлэһит, кинини кыра эрдэхпититтэн батыһа сылдьан үлэлиир этибит, оннук үргүлдьү үлэҕэ сыстан барбыппыт”,- диир. Иван Михайловиһы көмөлөһөөччүлэринээн тиэргэнигэр сүбүөкүлэ сэбирдэҕин ыраастыы уонна кууллуу сылдьар кэмнэригэр көрүстүбүт, таарыйа былырыын тутан киллэрбит улахан маҥхааһайын көрдүбүт. - Үлэлии үөрэнэн хаалбыт дьоҥҥо, ыһыыбыт тэрээһинэ биирдик барар. Ол гынан баран, быйылгы сайыммыт олус курааннаата, инньэ гынан уматык сэлээркэ бөҕөтүн тутуннубут. Ити гынан, итиитэ куйааһа үүнээйигэ эмиэ үчүгэй буолла. Хортуоппуй быйыл үчүгэй, моркуоптаах, сүбүөкүлэ үүнүүлэрэ ортоһуор. Бу хомуур саҕана, 50 % эрдэттэн төлөбүр оҥорон «Агроснаб» тэрилтэ абыраата. Онон, бу дьону хамнастаан үлэ бара турар. Былырыын туттубут овощехранилищебыт хортуоппуйунан туолла, аны билигин ити моркуобу, сүбүөкүлэни гарааспытыгар иҥин уурарбыт буолуо”,-диир быйылгы быйаҥыттан астынан туран, күлэ-үөрэ Иван Михайлович. «Күһүҥҥү киһи күлбүтүнэн» диэн маны этэн эрдэхтэрэ, хатыҥ чараҥнар саһаран көмүс дуйу бүрүммүттэр. Хоһуун киһи Уйбаан, уолаттарын үлэҕэ уһуйталаан, өлгөм үүнүүнү ылар туһугар сылайары умнан туран сыллата сыралаһар.
Ааптар хаартыскаҕа түһэриитэ.
Комментарии
Авторизация на сайте через социальные сети