Бу түбэлтэ туһунан өрөспүүбүлүкэ бэчээтигэр, ордук социальнай ситимнэргэ, ватсаабынан араас суруйуулар тахсыбыттара. Сунтаардарга, Мииринэйтэн чугас олорорбут быһыытынан, ити түбэлтэ улахан интэриэһи тарпыта. Ол иһин, ахсынньы 4 күнүгэр оройуон Сэбиэтин бэрэссэдээтэлэ Михаил Максимов салайааччылаах бөлөх ити буолбут түбэлтэни миэстэтигэр баран көрөр-билэр, тустаах салайааччылары кытта сирэй көрсөн быһаарсар сыаллаах Мииринэйгэ тиийэ сырытта.
Бөлөххө оройуон Сэбиэтин тыа хаһаайыстыбатыгар, сир, баай-дуол сыһыаннаһыыларыгар, экологияҕа комиссиятын бэрэссэдээтэлэ Гаврил Михайлов, улуус Общественнай палаататын бэрэссэдээтэлэ Клара Иванова уонна бу строкалар автордара бааллара.
Биһиги тиийиибитигэр суолу бүөлүү өрөһөлөммүт боруоданы ыраастааһыҥҥа, уот ситимэ быстыытын чөлүгэр түһэриигэ араас техника үлэлии сылдьара. Биһиги хойутаан да соҕус буоллар, били, саха истибитин итэҕэйбэт, уу хараҕынан көрдөҕүнэ эрэ астынар дииллэринии, уонтан тахса метр үрдүктээх алмаас таас сиидэлэнэн ылыллыбыт боруодатыттан, тулатынааҕы хаартан Дьокуускайга бэрэбиэркэҕэ ыытарга диэн анаан боруоба ыллыбыт. Онтон куоракка киирэн, «АЛРОСА» АК Мииринэйдээҕи ХБК айылҕа харыстабылыгар отделын начальнигын Анастасия Габрашитованы кытта көрсөн кэпсэттибит. Анастасия Владимировна эһиги айманаргытын, долгуйаргытын өйдүүбүн диэн туран, бэрт элбэҕи быһааран кэпсээтэ. Ити түбэлтэ тахсыбыт биричиинэтэ билиҥҥитэ чуолкай биллибэт, тустаах уорганнар дьарыктана сылдьаллар диэтэ. Кини аһара долгуйар наадата суоҕун, итиннэ киһиэхэ, кыылга-сүөлгэ ханнык даҕаны кутталлаах эттик суоҕун эттэ.
Оттон биһиги аны саас, уу-хаар тахсыыта, өссө биирдэ тиийэн ууттан боруоба ылан, хос бэрэбиэркэлэтиэххэ наада диэн син-биир сэрэхэдийэр санаалаах эргилиннибит.
Комментарии
Авторизация на сайте через социальные сети