Малааһын сиэригэр-туомугар олохтоохтор иннилэригэр «Орончикаан» оҕо үнкүү ансаамбыла дьон үөрүүтүн үксэттэ, сүргэтин көтөхтө. Оройуон дьаһалтатын аатыттан саҥа дьиэҕэ киирээччилэргэ баһылыгы бастакы солбуйааччы Спартак Илларионов эҕэрдэ тылыгар, улууспутугар тутуу салаатыгар дьаныардаахтык үлэлэһэн, олоҕу кытта тэҥҥэ хаамсан толору хааччыллыылаах дьиэлэр элбээн иһэллэрин, маныаха бэйэлэрин истэриттэн кыһамньылаах старостаны талан, харахтарын харатын курдук харыстаан, ыраастык тутан олороллоругар баҕа санаатын эттэ. Салгыы Дьокуускайтан кэлбит 
Платон Васильев эҕэрдэ тылыгар маннык диэтэ: «Мин санаабар, бу нэһилиэк дьаһалтата өрөспүүбүлүкэ бырабыыталыстыбатын, тутуу министиэристибэтин кытта ыкса ситимнээхтик, күүскэ үлэлээннэр, докумуон, үп-харчы боппуруоһун кэмигэр сүүрэн-көтөн быһаарбыттарын түмүгэр толору хааччыллыылаах, саҥа дьиэ кылгас кэм иһигэр киирдэ. Онон, бастатан туран дьаһалта үлэһиттэригэр махтаныахтаахпыт. Маны сэргэ оройуон чааһынай предпринимателлэрэ эмиэ улаханнык көмөлөстүлэр. Прораб Прокопий Гаврильевич уонна тэрээһин бооппуруостарыгар уҥа илиибит Жирков Егор Ильич, суоппардар, механиктар туруулаахтык үлэлээтилэр. Бу уолаттар дьиэлэрин-уоттарын быраҕан туран, үс сылы быһа эһиги улуускутугар тутууга үлэлээтилэр. Онон, кинилэргэ махтаныаххайыҥ» – диэн баран 12 квартиралаах дьиэ символическай күлүүһүн дьиэ хаһаайыныгар Өлөөн нэһилиэгин дьаһалтатыгар туттарда. Бу кэннэ Адгезия тэрилтэтигэр нэһилиэк дьаһалтатын аатыттан өйдөбүнньүк бэлэхтэри баһылыгы солбуйааччы Саргылана Алексеева бэлэхтээтэ. Онтон Спартак Илларионов квартира күлүүстэрин үөрэн-көтөн туран ытыс дохсун тыаһыгар дьиэ саҥа хаһаайыннарыгар биирдии–биирдии ыҥыран туттартаабытын кэннэ генбэдэрээчит Платон Васильевтыын аалай кыһыл лиэнтэни быһа кырыйдылар. Бу кэннэ бүгүҥҥү күн буруйдаахтара үөрэн-көтөн, долгуйан туран хаартыскаҕа түстүлэр.
Итиинэн илгийэр сырдык ыраас дьиэлэргэ киирэн билистибит. Үлэ бэтэрээнэ Топорова Татьяна Васильевна саҥа дьиэтин киирэн кэрдэ-иһиттэ, хаһаайка быһыытынан бастаан куухунатыгар ааста. Кини 10-ча сиэн, хос сиэннэр эйэҕэс эбээлэрэ. Манна кыра кыыһын кытта олорордуу оҥостор. «Эргэ дьиэлээхтэр бары дьиэлэннибит. Дьиэ ис-тас бараана олус үчүгэй, махтанабын» - диир.
Оттон эдэр ыаллар Еленалаах Евгений ийэлэрин Дегтярева Александра Егоровна олоруохтаах квартиратын көрө сылдьаллар. Хата кииҥҥэ кэлбиппит олус үчүгэй, оҕо саада, оскуолабыт, култуурнай сынньалаҥ дьиэтэ чугас тураллар. Биһиги урукку өттүгэр пуорт таһыгар олорор этибит. Ол иһин кииҥҥэ кэлбиппититтэн үөрэбит. Итии уулааҕа, ванналааҕа олус бэрт. Манна түөрт буолан олоруохпут. Олохтоох дьаһалтаҕа уонна тутааччыларга хаарбах дьиэттэн көһөрбүттэригэр барҕа махталбытын тиэрдэбит. Ити эрээри, дьиэбит иэнинэн кыра эбит. Дьиҥэр, киэҥ кэҥэс эбитэ буоллар...
Платон Васильев, Адгезия ХЭТ генеральнай дириэктэрин солбуйааччы
– 12 квартиралаах дьиэ тутуута көһөрүллүү программатынан тутулунна. Бу дьиэни аан бастаан саҕалыырбытыгар өрөспүүбүлүкэ тутууга министиэристибэтэ 70 бырыһыан харчытын көрбүтэ. Бырайыактары бэйэбит тэрилтэбит көҕүлээн оҥорон аналлаах программанан олоххо киллэртэрэммит үлэлиибит. Саха сирин баһылыга Е.А. Борисов ыраах сытар суола-ииһэ суох оройуоннарга уонна нэһилиэктэргэ аныгы, толору хааччыллыылаах социальнай тутуулары уонна элбэх дьон олорор дьиэлэрин былааннаахтык тутууну хааччыйарбытыгар тутааччыларга соруктары туруорбута. Онон сибээстээн Хотугулуу илиҥҥи федеральнай университет базатыгар тутуу бастыҥ технологиятын быһаарар Кластер тэриллибитигэр бииргэ үлэлэһэн барбыппыт. 2012 сыллаахха Аллараа Халыма оройуонугар Андрюшкино сэл. 12 квартиралаах олорор дьиэлэри тутууттан саҕалаабыппыт. Билигин Өлөөн улууһугар бу төрдүс дьиэбитин туттубут.
Дьиэ тутуутугар үһүс сылын улэлиир «Адгезия» ХЭТ прораба Прокопий Левин маннык кэпсиир:
«Канадскай бырайыагынан, аныгы технологиянан түргэнник уонна хаачыстыбалаахтык туттубут дии саныыбын. Дьиэ тутуутугар уопсайа 15 киһи үлэлээтэ. Материалларын олунньу ыйтан аҕалан баран тутуутун муус устартан саҕалаабыппыт. Сүрүннээн саха уолаттара үлэлээтилэр. Олохтоох уолаттар сантехникатыгар, сварка өттүгэр үлэлэстилэр. Былырыын үс дьиэни туппуппут, билигин биир буолан наһаа ыксаабатыбыт. Олорор, үлэлиир усулуобуйабытын табыгастаахтык көрбүттэригэр оройуон баһылыга Александр Ивановка, нэһилиэк баһылыга Василий Романовка биригээдэ аатыттан махталбытын тиэрдэбит. Кыһалҕалаах боппуруостар үөскээтэхтэринэ, барытыгар күүс-көмө буолан истилэр. Маны сэргэ ОДьКХ, Электростанция тэрилтэлэрэ эмиэ барытыгар көмөлөстүлэр.
Быйыл оройуоммут дьаһалтата тутуу эйгэтэ сайдарыгар бары кыаҕын ууран былааннаах үлэни тэрийэн, дьон олорор маннык дьиэлэрэ кылгас кэм иһигэр дьэндэйэн тахсаллар. Оттон биһиги өттүбүтүттэн бу кыһамньыны өйдөөн эппиттэрин курдук, хара бастакыттан ыраастык тутан, харыстаан, эйэ-дэмнээхтик олороллоро ирдэнэр.
Комментарии
Авторизация на сайте через социальные сети