“Нуучча” арыыта үс күн иһигэр аан дойдутааҕы Бизнес-кииҥҥэ кубулуйда. Быһа холуйан ааҕыынан форумҥа 3 триллион солк. сууммалаах 250 бырайыак көрүлүннэ. Тэрээһиҥҥэ 24 тас дойду кыттыыны ылла.
Урутаан сайдар территорияларга – ураты болҕомто
РФ президенэ Владимир Путин Илиҥҥи экономическай форум аһыллыытыгар Уһук Илин субъектарыгар урутаан сайдар территорияларга үлэлиир бизнес-партнердарга ураты болҕомто уурулларын тоһоҕолоон бэлиэтээтэ. Ол курдук, нолуокка уонна саҥа производствоны тэрийиигэ чэпчэтии, бизнес-инфраструктураны сайыннарыыга административнай өйөбүл оҥоһуллуоҕа. Уһук Илин уокурукка 9 урутаан сайдар территория үлэлиэҕэ: Саха сиригэр, Приморскай, Хабаровскай кыраайдарга, Амур уобалаһыгар, Чукоткаҕа уонна Камчаткаҕа. Маннык территориялары Владивосток “Нуучча”, Уссирийскай “Улахан” арыыларыгар эмиэ аһарга былаанныыллар.
Кытайдар самолет оҥоруохтара
Омук бизнесменнэрэ үптэрин урутаан сайдар территорияларга угары наадалааҕынан аахтылар. Ол курдук, форум кэмигэр биир суолталаах сөбүлэсиһиинэн дойду илиҥҥи сайдыытын министиэристибэтэ уонна Кытай Өрөспүүбүлүкэтин бөдөҥ бизнес-хампаанньалара самолеттары оҥорууга бииргэ үлэлээһиҥҥэ сөбүлэҥ түһэрсиилэрэ буолла.
Салгынынан айан транспорын – көтөр аалы Хабаровскай кыраай Комсомольскай куоратыгар баар урутаан сайдан территорияҕа оҥоруохтара. Быһа холуйан инвестиция кээмэйэ – 100 мөл. доллар. Кытай бизнесменнэрэ сылга 50-ча самолету оҥорон таһаарары былаанныыллар.
Өлүөнэни туоруур муостаны тутуу
Саха сирин олохтоохторо форумтан ордук Өлүөнэ өрүһү туоруур муоста тутуллуутун быһаарыллыытын кэтэспиппит. Бу суолталаах бырайыагы өрөспүүбүлүкэ делегацията Кытай бизнесменнэригэр билиһиннэрдэ.
Экономика миниистирэ Валерий Максимов бэлиэтээбитинэн, инвестордары бу бырайыак олоххо киириитин усулуобуйата, дойду салалтата тутуу хаамыыта ыһыллыбатын туһугар туох гарантияны биэрэрэ, үбүлээһин болдьоҕун механизма ордук интэриэһиргэттэ.
Кэпсэтии түмүгүнэн экономика миниистирэ Валерий Максимов:
-- Экономическай форум Өлүөнэҕэ муоста тутуллуутун быһаарыы боппуруоһугар кытай бизнесменнэрин кытта кэпсэтиигэ олус табыгастаах былаһаакканан буолла, -- диэн бэлиэтээтэ.
Сибиинньэ комплекса – дьоһуннаах бырайыак
Өлүөнэ өрүһү туоруур муостаны тутууну таһынан, Илиҥҥи экономическай форумҥа көрүллүбүт биир сүрүн бырайыагынан Мэҥэ-Хаҥалас улууһугар 50 тыһ. төбөлөөх сибиинньэ комплексын тутуу буолла.
Бу боппуруоска уопут атастаһаары Ил Дархан Егор Борисов Владивостокка тиийээт, Приморскай кыраай агропромышленнай объектарыгар сырытта. Өрөспүүбүлүкэ аҕа баһылыга бу сырыытын кэнниттэн санаатын маннык үллэһиннэ:
-- Приморскай кыраайга 540 тыһ. төбөлөөх сибиинньэ комплексын тутарга былаанныыллар. Пиморьелар Сахалинскай уобаласка маннык 120 тыһ. төбөлөөх сибиинньэ комплексын туппуттар эбит. Биһиги өрөспүүбүлүкэбитигэр Мэҥэ-Хаҥалас улууһугар сибиинньэ комплексын тутуу боппуруоһугар кэпсэтии ыыттыбыт. Маны таһынан, аҥардас эт бородууксуйатын оҥорон таһаарыы эрэ буолбакка, бэйэ бурдугун оҥорон таһаарар хаһаайыстыбалары кытта бииргэ үлэлээһин боппуруоһа эмиэ көдьүүстээхтик быһаарыллыан сөп эбит.
Комментарии
Авторизация на сайте через социальные сети