- Хамаанда салайааччыта Николай Румянцев бэлиэтээбитинэн, кэлиҥҥи сылларга чемпионакка кыттар дойду ахсаана элбээн, хапсыһыы хаачыстыбата тупсан иһэр эбит.
- Үөһээ-бүлүүлэр истэн үөрүөхпут, киэн туттуохпут иһин, Саха сириттэн сүүмэрдэммит уон бөҕөстөн түөрдэ — биһиги улуус ыччата! Кинилэртэн юниордарга Харбалаахтан төрүттээх Дмитрий Донской 70 киилэлээхтэргэ тустан, тэҥнээҕин булбата, аан дойду чемпионун кыһыл көмүс мэтээли түөһүгэр иилиннэ!
- Улахан дьоҥҥо 70 кг диэри ыйааһыҥҥа тустубут Рустам Прокопьев бу сырыыга миэстэлэспэтэ, иранецка хотторон туораата. Кини табаарыһа Рустам Машарипов эмиэ иранеһы кытта хапсыһыытыгар мүччү туттаран иккис миэстэни ылла.
- Оттон 80 кг ыйааһыҥҥа Кырыкыйтан төрүттээх Стас Степановпыт кылбардык тустан бастакы миэстэни эрэллээхтик ылан көбүөр хайааһынынан буолла! Онон бу аан дойду таһымнаах кумахха тустуу түһүлгэтэ быйылгы дьылга Үөһээ Бүлүүбүтүн чахчы да суон сурахтаата.
- Салгыы кэпсиир буоллахха, 80 кг. Денис Сивцев үһүс, 90 кг Ньургун Бугуловпыт иккис миэстэлэри ыллылар. Манна Ньургун үчүгэйдик тустубутун бэлиэтиэххэ наада. Бэйэтинээҕэр төһө эмэ ыарахан ыйааһыннаах күөн көрсүһээччилэрин аҥардас хапсаҕай албастарын туһанан тас уорҕаларынан түһэртээтэ. Түмүк хапсыһыыга тустан киһилээбэт күрэстэһээччитигэр сыыһа-халты туттан хоттордо. Биллиилээх бөҕөспүт Увар Тимофеев, хомойуох иһин, бу сырыыга миэстэлэспэтэ.
- Үерүүлээҕэ баар, бу күрэхтэһиигэ Россия хамаандатыгар икки кыһыл көмүс мэтээли Үөһээ Бүлүүбүт ыччаттара аҕаллылар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети