Нөөрүктээйи нэһилиэгэ саҥа тутууларынан киэркэйэр

Мэҥэ-Хаҥалас улууһун Нөөрүктээйи нэһилиэгэр күн бүгүн 2,5 тыһыынча киһи олорор. Павловскай күн-түүн улаатан, тупсан, киэркэйэн иһэр. Ол биир сүрүн туоһутунан олохтоохтор өр кэтэспит ыралара ‒ саҥа таас оскуола тутуллуута буолар.


Павловскай киинигэр чугас эргин ханна да суох бырайыактаах, сүүнэ улахан, 350 миэстэлээх оскуоланы хос бэдэрээтчит быһыытынан «Электромонтаж» ХЭТ үлэһиттэрэ туталлар. Биһиги сылдьыбыт күммүтүгэр онно 100-чэкэ киһи үлэлии сылдьара. Тэрилтэ салайааччыта Василий Пинигин үлэ хаамыытын билсэ кэлбит этэ. Биһиги кинини кытта тутуу туһунан ыйыталастыбыт.
‒ Оскуола тутуутун бэйэбит күүспүтүнэн, баҕабытынан, үбэ-харчыта суох кулун тутар бүтүүтүттэн саҕалаабыппыт. Онтон государственнай сакаасчыты кытта сөбүлэһии түһэрсэн, куонкуруска кыттыбыппыт. Куонкуруспут от ыйын 7 күнүгэр түмүктэннэ, матырыйаалларбытын сакаастаан, күннэри-түүннэри үлэлээн көҥдөйбүт бүтэн эрэр, ‒ диэтэ кини.
Бырайыагынан оскуола куполлаах буолуохтаах, билигин тутааччылар үлэ уустук өртүн саҕалаабыттар. Үлэ хайдах баран иһэрин сайын устата хаста да Тутуу министерствотыттан кэлэн көрбүттэр, үчүгэйинэн сыаналаабыттар.
‒ Иккис куонкуруспут атырдьах ыйыгар саҥа түмүктэннэ. Инньэ гынан үппүтүгэр кыпчыттараммыт, үлэбит дьэ тэтимирдэ диэххэ сөп. Сотору түннүктэрбит, фасадпыт матырыйааллара кэлиэхтээхтэр. Оскуола бырайыага чыҥха атын. 6 миэтэрэ үрдүктээх колонналардаах, куполлаах буолар. Онон биһиги санаабыт бөҕөх, эрэлбит улахан. Былаан быһыытынан бу сыл ахсынньы 20 күнүгэр диэри бүтэриэхтээхпит, ‒ диэн салгыы салайааччы сэһэргээтэ.

2005 сыллаахтан үлэлиир «Электромонтаж» ХЭТ республикаҕа уопсайа 41 оскуолаҕа, ол эбэтэр сыл аайы түөртүү, биэстии оскуолаҕа кыттыһан үлэлэһэллэр. Ону сэргэ тэрилтэ Хорообут саҥа оскуолатыгар хос бэдэрээтчит быһыытынан эмиэ үлэлиир.
Павловскай, культурнай киинин аттыгар, Иванов аатынан уулуссаҕа 29 квартиралаах, 3 мэндиэмэннээх таас дьиэ «Хаарбах дьиэ» программанан тутулла турар. Дьиэни Петр Никифоров салайааччылаах «Арктика-строй» ХЭТ тутар. Тутааччылар дьиэни быйыл үлэҕэ киллэрэр былааннаахтар.
Бөһүөлэккэ, ордук Кушнарев аатынан уулуссаҕа, бииртэн биир тупсаҕай, аныгылыы моһуоннаах, бэйэ-бэйэлэригэр майгыннаспат дьиэлэр, ардах кэнниттэн тэллэй тахсарын курдук, элбии тураллар. Эдэр ыаллар Анна уонна Иван Капитоновтар быйыл туттубут икки мэндиэмэннээх саҥа дьиэлэрэ ыраахтан киэркэйэн көстөр, хайдах эрэ, бэйэтигэр угуйар. Улахан оһуора-мандара суох, ол эрээри аныгылыы уурбут-туппут курдук үтүөкэн, бөҕө-таҕа оҥоһуулаах улахан дьиэни хаһаайыттар өссө тупсарыахтаахтар. Эдэр ыал дьиэтин тэлгэһэтигэр олус үчүгэй баанньык тутулла турар, таас билиитэлэринэн тротуардаахтар, гаражтарын киириитэ эмиэ асфалынан бүрүллүбүт.
Нөөрүктээйи нэһилиэгэр кэлиҥҥи кэмҥэ элбэх эдэр ыччат олохсуйан эрэрэ үөрдэр. Эдэр ыаллар дьиэлэрин-уоттарын сайдыылаах дойдулартан туох да итэҕэһэ суох тутталларын, үчүгэйгэ, үрдүккэ тардыһалларын астына көрдүбүт.