ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
2 сентября 2015, 11:18

«Сүрэхтэр кэпсэтэр кэмнэрэ» республикатааҕы ырыа куонкурсун кыайыылааҕынан Петр Сергучев буолла


«Дэҥҥэ көстөр дэгиттэр талааннаах, дьоҥҥо-сэргэҕэ хатыламмат кэрэ ырыалары кынаттаабыт Аркадий Алексеев төрөөбүт дойдутугар, 1-кы Тыыллыма нэһилиэгэр саҥа кэлэммит, кэрэ айылҕатын сөхтүбүт уонна кини маннык үтүө сиргэ төрөөбүт буолан, айар үлэ абылаҥар куустарбыт эбит дии санаатыбыт», ‒ диэн атырдьах ыйын 28 күнүгэр Аркадий Алексеев ырыаларынан иккис сылын ыытыллар «Сүрэхтэр кэпсэтэр кэмнэрэ» республикатааҕы куонкуруска Уус-Алдантан кытта кэлбит Мария Петухова эттэ.
photoByWidth&id=43346&width=1000
Ыраах Бүлүү улууһуттан сылдьар Иван Данилов Аркадий Михайлович бары ырыалара киһи дууһатын курдаттыы таарыйар аналлаахтар, олус үчүгэй тыллаах-өстөөх хоһооннору талар талааннаах буолан, матыыптара ордук табыллаллар, эриэккэстэр, онон норуот кини ырыатын уоһуттан түһэрбэккэ ыллыыр уонна инникитин ыллыы да туруоҕа диэтэ. Лоомтука олохтооҕо Иван Назаров өлбөт-сүппэт тыыннаах ырыалар аҕа көлүөнэ дьоҥҥо эргиллибэт эдэр саастарын өрүү саната туруохтара, оттон ыччакка олоҕу таптыырга угуйа, сырдыгынан сыдьаайа туруохтара диэн санаатын үллэһиннэ.
Аркадий Алексеев аатынан Тыыллыматааҕы сынньалаҥ киинигэр республикаҕа соҕотох аҕа көлүөнэ дьоҥҥо аналлаах «Сүрэхтэр кэпсэтэр кэмнэрэ» куонкуруска быйыл 30 киһи: биһиги улууспутуттан, Уус-Алдантан, Тааттаттан, Амматтан, Хаҥаластан, Бүлүүттэн, Үөһээ-Бүлүүттэн уонна Кэбээйиттэн ааттаан-суоллаан кэлбиттэр. Бу күн Сынньалаҥ киинин үрдүк сценатыттан «күһүҥҥү серенада» кэриэтэ иэйиилээх, киһи сүрэҕин ортотунан ааһар, дууһатын нарыҥнык таарыйар кэрэ ырыалар иһилиннилэр.
photoByWidth&id=43347&width=1000
Куонкуруска кыттааччылартан кими ордук бэлиэтии көрдүгүнүй диэн ыйытыыга Аркадий Михайлович уруккуттан ыллыыр, олохторун ырыа абылаҥар анаабыт уопуттаах, үрдүк таһымнаах кыттааччылар бэйэлэрэ туспа суоллаахтар-иистээхтэр, онон саҥа саҕалыыр ырыаһыттарга курдук кими да ордук чорбоппоппун диэтэ.
‒ Киһини киһи үтүктэрэ диэн соччото суох быһыы буолар. Ырыаларбын ыллыыр киһи бэйэтин көрүүтүнэн, толкуйунан миигиттэн атыннык ыллыырын мин хайгыыбын. Автор киһи буоларбынан, бэйэм ырыаларбын истэммин эдэр сааспын санаан кэллим. Төһө кыаҕым баарынан дьоҥҥо айа сатаатым дии сананабын уонна дьон санаата өрө көтөҕүллэр кэмигэр, үбүлүөйдэргэ, урууларга ырыаларым ылланалларыттан ордук үөрэбин.
Аркадий Алексеев төрөөбүт нэһилиэгэр сураҕырбыт ааттаах, сүдү дьон: атыыһыт Манньыаттаах, академик Владимир Ларионов, общественнай деятель Семен Борисов, график-уруһуйдьут Валериан Васильев уо.д.а. үөскээбит сирдэрин үтүө аатын сураҕырдар санааттан араас программалары олоххо кииллэртэрэр баҕа санаалааҕын кэпсээтэ.
‒ Урут өрүү таптаан бултуур-алтыыр алааспар инникитин ыраахтан-чугастан кэлбит дьон астынан баралларын курдук күрүөлээн-хаһаалаан, сахалыы быһыыга-майгыга көрсөргө программа толкуйдуубут. Биһиги нэһилиэктэн төрүттээхтэр түмсэммит элбэх үлэни ыытаары олоробут. Дойдубут дьонун санаатын көтөҕөр сыалтан, нэһилиэк сайдарын туһугар үлэлэһэр дьоҥҥо анаан граннары олохтуур былааннаахпыт. Бу сыл ахсынньы 30 күнүгэр, Саҥа 2016 сылы көрсө эдэр ыччакка аналлаах студиям ырыаһыттарын манна дойдубар, Лоомтукаҕа таһаараммын, граммын туттарыахтаахпын, дьоҥҥо-сэргэҕэ көрдөрүөхтээхпин.
photoByWidth&id=43348&width=1000
«Сүрэхтэр кэпсэтэр кэмнэрэ» ырыа куонкурсун Гран –при хаһаайынынан Хорообуттан Петр Сергучев буолла уонна 30 тыһыынча солкуобайынан наҕараадаланна. Лауреаттарынан Екатерина Яковлева (Амма), Иван Данилов (Бүлүү), Владимир Кузьмин (Аллараа Бэстээх), дипломаннарынан Иннокентий Птицын (Дьокуускай), Николай Макаров (Хаҥалас), Петр Васильев, Иван Назаров (Лоомтука) буоллулар. Аркадий Алексеев ырыаларын бастыҥ толорооччу аатын Иван Назаров, «Ымыылаах ырыаһыт» аатын Иван Аргунов (Майа), «Ылбаҕай ырыаһыт» ‒ Василий Петухов (Уус-Алдан), «Абылаҥнаах ырыаһыт» ‒ Анна Федорова (Уус-Алдан), «Дьиэрэй куолас» ‒ Спартак Харитонов (Хаҥалас) уонна көрөөччүлэр биһирэбиллэрин Тааттаттан сылдьар Валерий Слепцов ылла.
Үгэскэ кубулуйан сыл аайы ыытыллар куонкуруска эһиилги өртүгэр кылаан бириис 50 тыһыынча солкуобайга тэҥнэһиэҕэ. Эһиил өссө элбэх кыттааччы кэлэн ырыа түһүлгэтин киэргэтиэҕэ диэн эрэнэбит.
При частичном или полном использовании материалов гиперссылка на сайт ysia.ru обязательна.
Категория: Культура Просмотров: 805 Источник: ЯСИА Автор: Виктория Белолюбская Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ