Бүгүн, балаҕан ыйын 2 күнүгэр, киһи аймах историятыгар уһулуччу кыа хаан тохтуулаах сэрии бүппүтэ 70 сыла буолла. Сир ийэни атыйахтыы аймаан урусхаллаабыт, уодаһыннаах сэрии 40 судаарыстыба сирин-уотун хаппыта. Алта сыл устата барбыт сэриигэ 61 судаарыстыба кыттыбыта, 110 мөл. киһи армияҕа ыҥырыллыбыта. Аан дойду иккис сэриитигэр 50 мөл. тахса киһи сиэртибэ буолбута. ХХ үйэҕэ сотуллубат хара мэҥи хаалларбыт сэрии уотун сэбиэскэй норуот тохтотон, сомоҕо күүһүнэн кыайыыны ситиһэн, ыаллыы судаарыстыбаларга көҥүлү аҕалбыта.
Саха сириттэн Аҕа дойду көмүскэлигэр 62 тыһ. киһи туруммута, кинилэртэн улахан аҥардара кыргыһыы толоонуттан эргиллибэтэхтэрэ. Биһиги биир дойдулаахтарбыт фронт бары хайысхатыгар сэриилэспиттэрэ, Европаны босхолоспуттара, Берлиҥҥэ тиийбиттэрэ. Тыһынчаттан тахса саха милитаристыы Японияны утары туруммута, Квантунскай армияны бас бэриннэрбитэ.
Дьыл-хонук аастаҕын ахсын сындалҕаннаах алта сыл устата Улуу Кыайыыны уһансыбыт хоодуот буойуттарбыт, оҕотуттан кырдьаҕаһыгар тиийэ аас-туор олоҕу аахсыбакка, тыылга килбиэннээхтик үлэлээбит дьоммут-сэргэбит хорсун быһыыларын суолтата улаатан-үрдээн, дириҥээн иһэр. Кинилэр сырдык ааттарын, саха норуота бэйэтин кэрэйбэккэ Кыайыыны туруулаһыыга киллэрбит сүдү кылаатын үйэтитэр хас биирдиибит ытык иэһэ көлүөнэттэн көлүөнэҕэ салҕаннын.
Күндү сэрии, тыыл ветераннара! Тус бэйэҕитинэн аҕалсыбыт Өрөгөй күҥҥүтүгэр модун санааҕытыгар сүгүрүйэбит, эйэлээх олохпут иһин махтанабыт! Нус-бааччы, дьоллоохтук, уһуннук олоруҥ, ытык дьоммут.
Саха Өрөспүүбүлүкэтин Ил Түмэнэ
Комментарии
Авторизация на сайте через социальные сети