Дьэ, онон кылгастык сыаналары ырытан көрүөх. Обургу оҕо кроссовката – 1500 солк., алын сүһүөх кылаас оҕотун кроссовката – 1200 солк.. кыыс куоптата – 800-1000 солк., алын сүһүөх кылаас кыыһын оскуолатааҕы формата -- 1500 солк., уол ырбаахыта – 800 солк., бант – 150 солк, маҥан колготка – 200 солк..
Сорох сиргэ кыыс куоптатын бары размера – 1000 солк., уол ырбаахыта – 600 солк. Оскуола сарапаана – 900 солк., обургу уол оскуолатааҕы көстүүмэ – 3500 солк.
Мин биир обургу уол эдьиийин кытта сылдьарын көрсөн кэпсэттим. Миша Яковлев Мэҥэ-Хаҥалас Хаптаҕайыттан кэлэ сылдьар.
-- 1300 солк. 37 размердаах түүпүлэ атыыластым. Тэтэрээт уонна уруучука атыыласпаппын. Барыта бэйэбит маҕаһыыммытыгар баар. Сыаната эмиэ маннык курдук – 15-25 солк., -- диэн кэпсиир Миша. Оскуолата наадалаах учебнигынан толору хааччыйар буолан, уолчаан кинигэ көрдөөһүнүгэр бириэмэтин эмиэ ыыппатах.
Атыы-эргиэн баһаарыгар сорох туочукаларга 50% чэпчэтиилээх акция буола турар. Ол эбэтэр 1000 тыһ. солк. үөһээ суумалаах табаары атыыластаххына, 10% чэпчэтиинэн туһанаҕын. “Оскуола баһаарыгар” элбэх табаар эмиэ сыаната биллэ түһэр. Ол курдук, 8-10 саастаах уол оҕо көстүүмэ 500 солк. тиийэ түспүт. “Оскуола баһаара” сабыллыыта сыана олох да түһүүһү.
Канцелярскай табаар маҕаһыыннара эмиэ бааллар. Холобура, “Акварель” маҕаһыын атыылыыр балааккытыгар киһи талбытын булан тахсар. Манна таһырдьа турар атыытааҕар канцелярскай табаарга сыана биллэ намыһах. Арай үөрэнээччи рюкзага олус ыарахан: таһырдьа 1500 солк. буоллаҕына, манна ортотунан -- 4000 солк.
Маҕаһыыҥҥа эдэр дьон толору. “Туохха наадыйаҕын?” диэбитинэн сүүрэн кэлэллэр. Бу тустаах хамнаска устудьуоннар стажердуу сылдьаллар эбит. Ыйга 25-28 тыһ. солк. аахсаллар. Бу туһунан биир устудьуон кыыстыын кэпсэтэ турдахпына, биир нуучча дьахтара обургу уолунаан кэлэн: “Саха тыла” тэтэрээт баар дуо?” – диэн ыйыттылар. Мин дьиктиргээн стажер кыыс диэки көрбүппэр, устудьуонум хап-сабар:
-- Саха тылын оскуолаларга эбэһээтинэй предмет быһыытынан киллэрбиттэр. Аны бу предмеккэ сотору экзамен туттараллар үһү. Оҕо үксэ предметтэринэн анал тэтэрээттэри атыылаһар. Холобура, “Биология”, “История”. Ол иһин ити “Саха тыла” тэтэрээти ыйыталлар, -- диэн хоруйдаата. Онон билбэппин эмиэ билэн таҕыстым.
Ити курдук, “Оскуола баһаарыгар” араас улуустартан кэлэн, биир сиргэ түмүллүбүт буолан, ким туох наадалаҕын барытын булан тахсар “дойдута” эбит. Төһө да кириисис кэмэ ыган турдар, сыана биллэ удамыр диэн көрдүм. Буолумуна, ырыынак бэйэтэ туспа сокуоннаах буоллаҕа.
Комментарии
Авторизация на сайте через социальные сети