- Улууспут быһалыга Николай Архипов, баһылыгы бастакы солбуйааччы Петр Лебедев, социальнай боппуруостарга солбуйааччы Парасковья Емельянова, тутууга уонна инфраструктураҕа солбуйааччы Дмитрий Иванов уонна бэтэрээннэр улуустааҕысэбиэттэрин бэрэссэдээтэлэ Александра Шестакова "Амма олоҕо" хаһыакка 2016 сыл аҥарыгар биэстии киһини сурутан, туһааннаах дьоҥҥо бэлэх ууннулар. Уонна нэһилиэктэр баһылыктарын бу бычыымы өйүүллэригэр ыҥырдылар.
- Улуус баһылыгын бастакы солбуйааччыта Петр Лебедев: "Амма олоҕо" хаһыат улууспут олоҕун бары өрүттэрин киэҥник сырдатар. Хас биирдии Амма олохтооҕо улууска ыытыллар үлэлэри, ситиһиилэри, итэҕэстэри билэ олоруохтаах. Итиниэхэ сытар биһиги хаһыаппыт суолтата. Хаһыат ситиһиилэри эрэ сырдатар буолбатах, баар итэҕэстэри, кириитикэни кытта суруйар. Онон хас биирдии улууспут олоҕун-дьаһаҕын интириэһиргиир, инники сайдыытыгар кыһаллар киһи суруйтарыахтаах, улуус сонуннарын билиэхтээх дии саныыбын. Түгэнинэн туһанан бу акцияҕа кыттыбыт бары салайааччыларга, биирдиилээн дьоҥҥо уонна урбаанньыттарга махталбын тиэрдэбин. Чуолаан биир дойдулаахпыт, меценат-урбаанньыт Руслан Федотовка. Кини 10 киһиэхэ анаан улууһун хаһыатын суруттарда",- диэн санаатын үллэһиннэ.
- Акцияны кытта тэҥинэн "Амма олоҕо" хаһыат быйыл ааҕааччытын көҕүлээн "Амма-кард" диэн саҥа сүүрээни киллэрдэ. Улуус хаһыатыгар сыл аҥарыгар биитэр биир сылга толору суруппут хас биирдии ааҕааччы атыы-эргиэн өҥөтүгэр чэпчэтиилээх картаны тутуоҕа. Бу саҥа саҕалааһыны үтүө санаалаах урбаанньыттарбыт Л.Е. Куприянова, Р.Е. Федотов, Н.И.Шишигина, И.П. Степанова, Е.Н. Никитина, Нь.П. Константинова, В.В. Максимов, А.В. Любчич, Д.А. Бубякин өйөөтүлэр. Кинилэр салайар маҕаһыыннара уонна "Креатив" реклама өҥөтүн оҥорор мастарыскыай "Амма-кард" ситимигэр киирэннэр, "Амма олоҕо" хаһыаты суруттарбыт ааҕааччыларга үстэн биэскэ диэри бырыһыаннаах чэпчэтиилэри оҥоруохтара.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети