- Улуус киинэ Хаандыга 2001 сыллаахха халаан уутуттан улаханнык эмсэҕэлээбитэ, мас таҥара дьиэтэ эмиэ. Ол иһин итэҕэйээччилэр Саха сирин Президенэ Вячеслав Штыровтан саҥа храмы тутарга көрдөспүттэрэ. «АЛРОСА» курдук улахан тэрилтэлэр сиэртибэлээн Павел уонна Петр сибэтиэйдэр таас таҥараларын дьиэтэ тутуллан үлэҕэ киирбитэ. Шахтердар олорор Дьабарыкы Хайа бөһүөлэгин православнай итэҕэллээхтэрэ таҥараҕа тиксэ Хаандыгаҕа кэлэллэрэ. Айанныырга ырааҕа, күһүн-саас суол суоҕа мэһэйдиирэ. Президент Вячеслав Штыров көмөтүнэн бөһүөлэккэ эргэ дьиэни сөргүтэн православнай таҥара дьиэтэ оҥорбуттара.
- Былырыын Дьокуускайдааҕы уонна Ленскэйдээҕи епископ Роман кэлэн барбыта. Кини Кириэс Халдьаайыттан төрүттээх киин балыыһа кылаабынай бырааһа Михаил Охлопков ыалдьааччылар эмтэнэр куорпустарыгар туруорсан астарбыт итэҕэйээччилэр таҥараҕа үҥэр хосторун сибэтии гыммыта. Кинини кытта кэлбит Киево-Печерскэй лавра таҥараһыттара олохтоох уус-уран самодеятельность артыыстарын кытта холбоһук концерт көрдөрбүттэрэ.
- Таҥараһыттар сахалар түөлбэлээн олорор Байаҕантай нэһилиэгин киинигэр - Кириэс Халдьаайыга сылдьыбыттара. Манна 1853 сыллаахха аттынааҕы нэһилиэктэр үптэригэр тутуллан үлэҕэ киирбит, билигин быраҕыллан турар таҥара дьиэтэ баар. Кириэс Халдьаайыга өссө 1913 сыллаахха тутуллубут таҥара дьиэтигэр сэбиэскэй кэмҥэ оскуола интерната үлэлээбитэ, билигин Герой Федор Охлопков аатын сүгэр кыраайы үөрэтэр түмэл буолан турар. Таҥараһыттары түмэл үлэһиттэрэ былыргы саха ыалын олоҕун көрдөрөр инсценировканан, арыылаах алаадьынан, тойугунан, хомус тыаһынан көрсүбүттэрэ. Байаҕантай таҥараларын дьиэтигэр үлэлээбит аҕабыыттар тустарынан уонна түмэллэрин үлэтин кэпсээбиттэрэ. Түмэл салайааччыта, ССРС үөрэҕириитин туйгуна, СР культуратын туйгуна Светлана Матаркина түмэл дьиэтин Дьокуускайдааҕы епархияҕа бэрдэрээри 2012 сылга Никон аҕабыыты кытта көрсүбүтүн, таҥара дьиэлэрин туһунан олохтоох кыраайы үөрэтээччилэр ыстатыйаларын биэрбитэ.
- Көрсүһүү түмүгэр епископ Роман түмэлгэ Марк библиятын уонна кириэс, Светлана Дмитриевнаҕа тус бэйэтигэр кириэс бэлэхтээбитэ. Түмэлгэ православнай итэҕэлгэ сүгүрүйээччилэр сылдьалларыгар хос анаан үлэлэтэллэригэр баҕа санаатын эппитэ. Кулуупка нэһилиэнньэни кытта көрсүһүү буолбута.
- Бу сэлиэнньэҕэ евангельскай христианнар бааллар. Кинилэргэ биир итэҕэллээхтэрэ харчы ыытаннар 2 квартиралаах чааһынай дьиэ аҥарын атыылаһан, онно сылдьаллар.
- Хаандыгаҕа араас омук бэрэстэбиитэллэрэ олороллор, ол иһигэр татаардар, чеченнэр, киргизтэр, таджиктар, узбектар уо.д.а. Кинилэр бэйэлэрэ кыттыһан эргэ мас дьиэни сөргүтэн мечеть аспыттара хаһыс да сыла. Онно Курбан-байрам, Ураза-байрам бырааһынньыктарга эрэ буолбакка намазка сылдьаллар. Маны таһынан Хаандыгаҕа евангельскай христианнар араас салааларын икки дьиэтэ баар.
- Томпо эбээн нэһилиэгин сиригэр, Тополинай сэлиэнньэтиттэн ыраах ХХ-с үйэ саҥатыгар тутуллубут православнай мас чочуобуна баар.
- От ыйыгар мусульманнар Рамаданы, православнай итэҕэллээхтэр Крещение Руси бэлиэтээтилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети