ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
23 июня 2015, 11:20

Аммаҕа доруобуйа харыстабылыгар анаммыт кинигэ сүрэхтэниитэ буолла


Дойду үрдүнэн бэс ыйын үһүс өрөбүлүгэр дьон доруобуйатын араҥаччылыыр үтүө дьоммут идэлээх күннэрэ бэлиэтэнэр. Быйыл бу дьоро күн ордүк өрө көтөҕүллүүлээхтик бэлиэтэннэ.
photoByWidth&id=37578&width=1000
Тэрээһин сарсыарда 10 чаастан улуус салалтата быраастары кытта көрсүһүүтүттэн саҕаланна. Улуус кылаабынай бырааһа Николай Тихонов улууска доруобуйа харыстабылын туругун туһунан иһитиннэрии оҥордо. Быраастар салалта иннигэр үлэлэригэр көрсөр кыһалҕалары ыйдылар уонна улууска дьону эмтээһин сайдар өрүттэрин торумнастылар. Кэпсэтии „төгүрүк остуол“ киэбинэн дьыалабыай быһыыга барда, элбэх этиилэри дьүүллэстилэр. Түмүккэ управлениелар салайааччылара Юрий Шишигин, Аиза Чемезова, Роман Алексеев, Макар Тимофеев, ФКУ начальнигын солбуйааччы Илья Жирков уонна ыччат отделын салайааччы Максим Андреев улууска доруобуйа харыстабылыгар үлэлиир бары үлэһиттэри истиҥник эҕэрдэлээтилэр уонна уопсастыбаҕа үрдүк суолталаах, улахан эппиэттээх үлэлэригэр ситиһиилэри баҕардылар. Көрсүһүүнү улуус баһылыгын социальнай боппуруостарга солбуйааччы Парасковья Емельянова салайда.
photoByWidth&id=37579&width=1000
Ол кэнниттэн Култуура киинигэр улууска доруобуйа харыстабылын үлэһиттэрин туһунан „На страже здоровья. Годы и люди“ диэн улууска доруобуйа харыстабылын үлэһиттэрин туһунан бастакы улахан кинигэ сүрэхтэниитэ буолла. Литэрэтиирэ сылын көрсө РФ уонна СӨ доруобуйатын харыстабылын туйгуна, СӨ доруобуйатын харыстабылын үтүөлээх үлэһитэ Клавдия Стручкова бу кинигэни суруйан, бэчээттэтэн биир идэлээхтэригэр дьоһун бэлэҕи утары уунна. Халыҥ тастаах, 240 ыстатыйалаах, 850 хартыскалаах кинигэ „Бичик“ кинигэ кыһатыгар 500 экземплярынан бэчээттэннэ. Кинигэҕэ Амма улууһугар доруобуйа харыстабылын историята уонна балыыһа үлэһиттэрин династиялара киэҥник сырдатылынна. Айымньыны киэҥ араҥаҕа таһаарар үөрүүлээх тэрээһини киин библиотека кыраайы үөрэтэр салаатын салайааччы Вероника Стручкова ыытта. Ааптары эҕэрдэлээн улуус баһылыгын социальнай боппуруостарга солбуйааччы Парасковья Емельянова „Амма улууһугар култуура уонна духуобунас сайдыытыгар кылаатын иһин“ бэлиэни, СӨ профсойуустарын рескомун аатыттан профком бэрэссэдээтэлэ Петр Табунанов „Профсойууска киллэрбит кылааттарын иһин“ мэтээли Клавдия Стручковаҕа туттардылар. Салгыы киин балыыһа кылаабынай бырааһа Николай Тихонов, „Бичик“ кинигэ кыһатын кылаабынай редакторын солбуйааччы Линда Иванова, доруобуйа харыстабылын бэтэрээннэрэ Алексей Слободчиков, Егор Карамзин, хирург Иван Чириков, династиялар ааттарыттан Екатерина Нестерова, Евдокия Кириллина уо.д.а кинигэни кэрэхсээбиттэрин биллэрдилэр уонна Клавдия Ивановнаҕа махтанан истиҥ тылларын эттилэр.
photoByWidth&id=37582&width=1000
Клавдия Ивановна сүүрбэттэн тахса сыл балыыһа месткомун уонна профсоюһун бэрэссэдээтэлэллэринэн үлэлээн, элбэх киһини кытта алтыһан, кинилэр үлэлэрин, ситиһиилэрин чугастык билэр буолан, киниэхэ дьон доруобуйатын туһугар олохторун анаабыт эмп үлэһиттэрин сырдатар, кэлэр көлүөнэҕэ история кэрэһитин хаалларар үтүө санаа киирдэҕэ, ол туһунан маннык кэпсээтэ:
- Мин доруобуйа харыстабылын эйгэтигэр 1967 сыллаахтан үлэлиибин. Бастаан үлэбин фельдшеринэн Чокурдаахха саҕалаабытым. Салгыы быраас идэтигэр үөрэнэн, 1979 сыллаахха Алтан учаастактааҕы балыыһатыгар бырааһынан анаммытым. Онтон 1981 сылтан харыс да сири халбарыйбакка, Аммаҕа үлэлии сылдьабын. Ол тухары элбэх дьону кытта бииргэ алтыһан уонна салайар үлэбэр үтүө сүбэһит дьону көрсөммүн дьоллоохпун дии саныыбын. Ааттыам этэ, П.Н. Тихоновы, М.Е. Федорованы, Т.Д. Тимофееваны. Балыыһа профсойууһун салайар кэммэр доруобуйа харыстабылын үлэтин сырдатан, үлэһиттэри эҕэрдэлээн олохтоох хаһыакка суруйар этим. Онуоха биир идэлээх дьонум „Ити ыстатыйаларгын хомуйаҥҥын кинигэтэ суруй,“- диэбиттэрэ. Миэхэ итинэн сиэттэрэн дьон доруобуйатын туһугар үлэни идэ оҥостубут династиялары, балыыһаҕа саҥа кабинеттары, пууннары саҕалаабыт фельдшердэри уонна быраастары үйэтитэр кинигэни суруйарга санаа киирбитэ. Өр кэмҥэ ыра санаа оҥостубут сыалым, дьэ туолан олус үөрэн турабын. Бу кинигэ түөрт сыллаах үлэбит түмүгэ буолар, аҥардас хаартыската 1200 устуука хомуллубута, онтон кинигэҕэ 850-нэ киирдэ. Кинигэм тахсыытыгар көмөспүт, сүбэ-ама буолбут бука бары дьоҥҥо барҕа махталбын тиэрдэбин. Чуолаан Серафима Сергеевна Слободчикова кыыһыгар Ирина Викторовнаҕа уонна Мартынов Федор Никаноровичка. 2017 сылга киин балыыһабыт 120 сылын бэлиэтиэхпит, ону көрсө Амма улууһугар доруобуйа харыстабылын историятын толору кэпсиир, энциклопедическай киэптээх кинигэни суруйар санаалаахпыт.
photoByWidth&id=37580&width=1000
Күнүстэн киэһэ доруобуйа харыстабылын үлэһиттэрэ Амма нэһилиэгин сынньалаҥ пааркатыгар ыһыах ыстылар. Үгэс быһыытынан ыһыах алгыһынан саҕаланна. Алгыс сирин-туомун Мария Бурцева толордо. Онтон салгыы улуус салалтатын аатыттан Парасковья Емельянова, киин балыыһа кылаабынай бырааһа Николай Тихонов, балыыһа профсойууһун бэрэссэдээтэлэ Петр Табунанов ситиһиилээх үлэһиттэргэ, уопсастыбаннай үлэ активистарыгар наҕараадалары туттардылар.
Ыһыах кэмигэр элбэх куонкурустар ыытылыннылар. Кыайыылаахтар сыаналаах бириистэринэн уонна сертификаттарынан бэлиэтэннилэр. Маны таһынан профсойуус Сочига баран сынньанар үс путевканы оонньотто. Бука бары дуоһуйа сынньанан астынан тарҕастылар.
photoByWidth&id=37581&width=1000
При частичном или полном использовании материалов гиперссылка на сайт ysia.ru обязательна.
Категория: Территория Просмотров: 839 Источник: ЯСИА Автор: Иван Дьячковскай Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ