Томпоҕо Улуу Кыайыы 70 сылыгар анаммыт тэрээһиннэр түмүктэннилэр

Тэрээһиҥҥэ Байаҕантай, Мэҥэ Алдан, Теплай Ключ, Саһыл, Ыҥаа нэһилиэктэриттэн уонна Хаандыга бөһүөлэгиттэн сэрии уонна тыыл ветераннарын, сэрии огдооболорун, салайааччылар делегациялара кыттыыны ыллылар. Кыайыы Болуоссатыгар Аҕа дойду Геройдарын бэлиэтиир күҥҥэ үбүлүөйдээх сылы түмүктүүргэ аналлаах миитин буолла. Кэлбит дьон сэриигэ охтубуттары кэриэстээн биир мүнүүтэ чуумпуран турдулар.

Хаандыга бөһүөлэгин баһылыга Михаил Алексеев, Хаандыга орто оскуолатын үөрэнээччитэ Александр Сонтоев, техникум студентката, СР Ил Дарханын бириэмийэтин стипендиата, үөрэх туйгуна Татьяна Павлова сэрии уоттаах сыллара дьон өйүгэр-санаатыгар үйэлэргэ хаалыаҕа диэн этиилэрэ иһирэхтик иһилиннэ. Герой Федор Охлопков пааматынньыгар, Америка самолеттарын көтүппүт летчиктар, Советскай Союз Геройа Владимир Лонгинов уонна Иван Околович мемориалларыгар ыччаттар венок уурдулар.
Тэрээһин салгыыта Хайа-геологическай техникумҥа ыытылынна. Тэрээһини оройуон баһылыга Георгий Герасимов аста. РСФСР оскуолаларын үтүөлээх учуутала, Томпо оройуонун бочуоттаах олохтооҕо Прокопьева Надежда Осиповнаны 85 сааһын туолбут үбүлүөйүнэн, Роман Романович уонна Марфа Васильевна Тарабукиннары кыһыл көмүс сыбаайбаларынан эҕэрдэлээтилэр.

Оройуон үөрэххэ управлениетын начальнигын солбуйааччы Лидия Роббек эппитинэн, 2014-2015 сс. оройуон оскуолаларыгар гражданскай-патриотическай иитии сылынан биллэриллибитэ. Ол кыайыылаахтара уонна номинаннара быһаарылыннылар. "Утренник бастыҥ сценарийа" - "Солнышко" оҕо саада (В.А. Романенко), Хаандыга орто оскуолатын "ШКИД" оҕо тэрилтэтэ үтүө дьыалалар акцияларын ыытыыга бастыҥ, "АЛРОСА" СКК "Сэриитэ суох аан дойду" (И.Н. Плюхина) фото-быыстапката бастыҥ аатын ыллылар. Гимназистар "Бэтэрээннэр тыыннаах куоластара" диэн сэрии туһунан бастыҥ киинэни оҥорбуттар. Кириэс Халдьаайы орто оскуолатын сүүмэрдэммит хамаандата үөрэх үлэһиттэрин оройуоннааҕы спартакиадатыгар кыайыылааҕынан таҕыста. Кириэс Халдьаайы "Сырдыкчаана" оҕо саада (А.А. Николаева) эйэ туһунан бастыҥ уруһуйун уонна бастыҥ уус-уран киинэ устубутун иһин бэлиэтэннэ. Мэҥэ Алдан орто оскуолатын үлэһиттэрэ "Хордар киирсиилэрэ" ырыа куонкуруһугар бастаабыттара. Мэҥэ Алдантан "Кыымчаан" оҕо саада, Үөгэн сүрүн оскуолата, Хаандыгатааҕы оҕо искусствотын оскуолата "Бастыҥ фасад баннердара" көрүҥҥэ бастаатылар. Кыайыылаахтар кубоктарын уонна дипломнары "Колокольчик" оҕо саада (О.А. Немцева) уонна Хаандыга орто оскуолатын (Л.И. Сохибова) коллективтарыгар туттардылар.

"Ол улуу сылларга сүгүрүйэбит" кинигэни таһаарыы көҕүлээччитэ – райсовет председателэ Илья Шадрин. Оройуоҥҥа 372 сэрии оҕото баар, кинилэр кыайыыга киллэрбит кылааттара элбэх. Бу күн сорохторугар - М.Е. Власоваҕа, А.А. Болотоваҕа, В.И. Приваловка, Т.Г. Мокрушинаҕа, А.И. Галактионоваҕа, Е.Д. Мушниковаҕа мэтээллэр уонна дастабырыанньалар туттарылыннылар.
Үбүлүөйдээх сылы бэлэмнээһиҥҥэ уонна ыытыыга элбэх дьон кыттыбыта. Оройуон баһылыгын уонна оройуоннааҕы Сэбиэт бэрэссэдээтэлин махтал суруктарын тэрилтэлэргэ уонна урбаанньыттарга туттардылар. Тэрээһиннэри ыытыыга актыыбынайдык кыттыбыттар Бочуотунай грамоталарынан наҕараадаланнылар.

Үөрүүлээх тэрээһин кыттааччыларын СР культуратын туйгуна Тамара Лапина, "Сударушка" ансаамбыл, "Ахтылҕан" эр дьон ансаамбыла (салайааччы А. Захаров), Лидия Борисова салайааччылаах хомусчуттар ансаамбыллара эҕэрдэлээтилэр.