Быйылгы тэрээһин үлэтин-хамнаһын туһунан Өлүөхүмэ улууһун ыччат политикатыгар отделын кылаабынай специалиһа Ирина Большедворская кэпсиир:
«Ыччат форумугар улууспут нэһилиэктэриттэн, Ленскэй, Мэҥэ-Хаҥалас улуустарыттан, Дьокуускай куораттан барыта 60-ча ыччат кытынна. Тэрээһин түөрт күн устата былааннаммыт хайысхаларынан тигинэччи үлэлээтэ. Маныаха ыҥырыылаах ыалдьыттар ыччакка анаан олус интэриэһинэй лекциялары аахтылар. ХИФУ ЕНИ экологияҕа кафедратын доцена Галина Васильева “21-с үйэ аныгы экологическай кыһалҕата”, БГУЭП научнай-чинчийэр отделын начальнига, менеджмент кафедратын доцена Анна Сыроватская бизнеһи былааннааһын сүрүн тосхоллорун, пиар туһунан, СР Культураҕа уонна духуобунай сайдыыга министерствотыттан Гаврил Терентьев культурнай нэһилиэстибэ объектарын харыстааһын, Өлүөхүмэ улууһун үөрэнээччилэрин айар дьоҕурдарын сайыннарар киин директора Ольга Юрьевна Рожкова «Общественнай экологическай мониторинг» туһунан лекцияларын эдэр ыччат олус сэргээтэ, элбэх ыйытыы киирдэ, бэйэлэрин көрүүлэрин дьүүллэстилэр. Ол кэнниттэн салҕаммыт дьыалабыай оонньууга хамаандаларынан арахсан бырайыактары суруйан көмүскээтилэр, ыйытыыларга хоруйдаатылар.
Эдэр дьоҥҥо “Образ моего будущего” диэн бэртээхэй тренинг буолла. Ыччаттар ыра санааларын дохсуннук сайдан иһэр олоҕу тэҥнии тутан көрдүлэр, ырыттылар, санааларын үллэһиннилэр. Брейн-ринг күрэхтэһии ураты сэргэх буолла. Манна кыттааччылар история, туризм, экология боппуруостарыгар билиилэрин-көрүүлэрин тургутустулар.
Билиини-көрүүнү хаҥатыыны сынньалаҥы кытта дьүөрэлэһиннэрбиппит үчүгэй түмүктэри аҕалла. Ол курдук, “Суруктаах хайаны” көрүү-истии бэйэтэ туспа сэргэхсийиини таһаарда. Өбүгэлэрбит олорон ааспыт олохторун, үлэлэрин-хамнастарын, кинилэр айылҕаны кытта алтыһыыларын сэһэргээһини ыччаттар сыыска-буорга түһэрбэккэ сэргээн иһиттилэр. Салгыы мустубут ыалдьыттар өбүгэ үгэһинэн, айылҕаҕа тахсыбыттарын бэлиэтигэр арчыланнылар. Улууспут кэрэ миэстэлэрин көрдүлэр, Токкоҕо сөтүөлээтилэр, сибиэһэй салгынынан дуоһуйа тыыннылар».
Кылаабынай специалист бэлитээбитинэн, форум сүрүн сыала - ыччат төрөөбүт дойдутугар бэриниилээх буоларыгар, төрөөбүт сирин-уотун туһугар ис сүрэҕиттэн кыһаллан үлэлииригэр, кыайыылаах-хотуулаах үчүгэй үлэһит буола үүнэн-сайдан тахсарыгар туһаайыллар. Манна мустубут ыччаттар ыкса доҕордоһоллор, түмсүүлээх буолаллар. Ол инникитин ким идэтин таларыгар, ким үлэлииригэр бигэ олугу уурара саарбахтаммат.
Форуму тэрийээччилэр кэлэр өттүгэр элбэх улууһу ыҥыран кытыннарар баҕалаахтарын эттилэр. Маны сэргэ, араас куонкурустарга, күрэстэһиилэргэ, граннарга о.д.а. көхтөөхтүк уонна тиһиктээхтик кыттыыны тэрийэр баҕалаахтарын биллэрдилэр. Манна даҕатан эттэххэ, ыччаттар дьон-сэргэ дуоһуйа сынньанар “Сылаас Өлүөхүмэ” диэн күөх пааркатын тэрийэр, инфраструктураны сайыннарар, бренд оҥорор баҕалаахтарын эппиттэр. Итини сэргэ санаа арааһа, этии эгэлгэтэ этиллибит. Тэрийээччилэр бэлиэтииллэринэн, бу форум сайдарын, далааһына кэҥиирин, туһата улаатарын туоһута.
Комментарии
Авторизация на сайте через социальные сети