Бииргэ үлэлээһин уонна доҕордуу сибээс сайдыытын биир көрүҥүнэн куораттар сибээстэрэ – бырааттаһыылара буолар. Саха Республиката Хэйлунцзян провинцияны кытары ыкса хардарыта сыһыаны олохтуур. КНР чопчу куораттарын кытары ааспыт сылларга сибээс олохтоммут. Хардарыта барыстаах сөбүлэһиилэри Амма, Үөһээ Бүлүү, Мэҥэ Хаҥалас, Нам, Нерюнгри, Таатта, Чурапчы оройуоннара уонна Дьокуускай к. илии баттаспыттар. 2016 с. сөбүлэһиилэри Уус Алдан, Өймөкөөн, Ленскэй уонна биһиги оройуоммут илии баттыырга бэлэмнэнэллэр. Хэйлунцзян провинциятын Шауаньяшань куорат мэриятын вице-мэрэ Ваг Зишаны кытта билсиһии буолла. Бу чох хостуур провинция эбит, Кытай хотугу-илиҥҥи өттүгэр сытар. Кытай кээмэйинэн улахана суох – 1,5 мөл. киһилээх куорат. Ванг Зишан биһиги делегациябытын барыллааһын боротокуолун илии баттыырга бэйэтин куоратыгар ыҥырда. Биһиги хардары киниэхэ Хаандыга үбүлүөйүгэр делегациянан кэлэригэр ыҥырдыбыт.
Томпо оройуонун баһылыга Георгий Герасимов сырыыта, бастатан туран, «Томпо хайа-промышленнай оройуон» бырайыак презентациятын кытта дьүөрэлэстэ. Онно анаан кытай тылынан бырайыагы билиһиннэрэргэ аналлаах буклет бэлэмнээбиттэрэ. Онно хайа-хостуур салааҕа биһиги оройуоммут кыаҕын, тыа хаһаайыстыбатын, инфраструктура сайдыытын көрдөрбүттэрэ. Буклеттар түргэнник тарҕаннылар, онон интэриэһиргээбит инвестордар сотору биллэриэхтэрэ диэн эрэнэбит.
Иккис бырайыакпыт «Нежданинскай минеральнай уута». Сыаната 64 мөл. солк. быһаарыллыбыта. Биһиэхэ бу бырайыак олоххо киириитигэр бизнесменнэр тастан эрэ буолбакка, бэйэбит оройуоммутуттан интэриэстээх дьон наадалар.
Кытайга интэриэс аан дойду үрдүнэн улаатан иһэр. Бу сырыы олус интэриэһинэй уонна элбэҕи көрдөрөр. Аныгы сырыыбыт биһиги экономикатыгар, оройуоммут сайдыытыгар үчүгэй түмүктэрдээх буолуон сөп.
Комментарии
Авторизация на сайте через социальные сети