Манна биhиги техникуммутуттан эдэр кэскиллээх үлэһит Роман Харахов кытынна.
Күрэс кыттыылаахтара уонна кинилэр тренердэрэ «Триумф» спортивнай комплекска олордулар, араас тэрээһиннэргэ сырыттылар. Куорат промышленнай тэрилтэлэригэр, музейдарыгар сылдьан көрсүһүүлэри тэрийдилэр. Манна даҕатан эттэххэ, бу күрэс чэрчитинэн, Борис Неустроев-Мандар Уус 70 сааһын бэлиэтиир көрсүһүүгэ өрөспүүбүлүкэ уустара кэлэн мунньахтаан, санаа үллэстэн, биллиилээх маастар тылын-өһүн истэн бардылар. Бу көрсүһүүгэ орто анал үөрэх кыһаларын маастардара эмиэ сырыттылар.
Түөрт күннээх күрэс түмүгүнэн «Уһулуччулаах УМК» номинация кыайыылааҕынан Намнааҕы техникум маастара Тимофей Сметанин буолла. «Город мастеров» номинация Жатай техникумун маастарыгар Людмила Куриловичка тигистэ. «Уһулуччулаах кылаас таһынан дьарык» номинация 6-с №-дээх профлицей маастарыгар Кирилл Дубиниҥҥа, «Уhулуччулаах аһаҕас уруок» номинация Дьокуускайдааҕы индустриальнай-педагогическай техникум маастарыгар Марианна Толкачеваҕа, «Сыл маастара» номинация кыайыылааҕынан Дьокуускайдааҕы технологическай техникум маастара Римма Дмитриева буоллулар.
Ити курдук, өрөспүүбүлүкэбит орто үөрэхтээһин кыһаларын маастардара хас да күннээх күрэскэ кыттан бэйэлэрин тургутан көрдүлэр, доҕор-атас булуннулар, санаа, уопут үллэһиннилэр.
Роман Ильич туһунан аҕыйах тылынан билиһиннэрдэххэ, кини орто анал үөрэхтээх, тыа хаһаайыстыбатын маастардарын үөрэтэр-такайар, үөрэнэр кэмнэригэр ийэ-аҕа оруолун толорор, элбэх талааннаах-дьоҕурдаах киһи. Дьокуускайга буолбут күрэскэ кыттыбытыттан астынар, дьону-сэргэни кытта билсэн бэйэтин кыаҕын тургутан көрдөҕө. Роман Ильич маннык тэрээһиннэргэ өссө да кыттан, миэстэлэһэн биһиги улууспутун, техникуммутун ааттатыа диэн эрэнэбит.
Анастасия СЕМЕНОВА, техникум преподавателэ
Комментарии
Авторизация на сайте через социальные сети