Историяттан кэпсээтэххэ, бу маннык илин эҥэр суол үлэһиттэрин спартакиадата уруккуттан ыытыллар этэ эрээри, тэрилтэлэр уларыйар-тэлэрийэр кэмнэригэр тохтуу сылдьыбыта. Дьэ, быйыл бэс ыйын 12-13 күннэригэр тоҕус сыл тохтоон баран сөргүтүллэн, иккис тыынын ылан, бастакытын Мындаҕаайыга Күөх Хочо сиригэр-уотугар ыытылынна. СР суол управлениетын эдэр салайааччыта Николай Сивцев бэйэтэ этии киллэрэн, тэрээһинигэр көмөлөһөн, спартакиада бэрт сэргэхтик, өрө күүрүүлээхтик барда. Бэйэбит да олус астынныбыт.
СР суолун хаһаайыстыбатын уонна транспорын миниистирэ Семен Винокуров, СР суолун управлениетын генеральнай дириэктэрэ Николай Сивцев, суол уонна транспорт департаменын салайааччытын эбээһинэһин толорооччу Татьяна Игнатьева, СР суолун хаһаайыстыбатын уонна транспорын миниистирин солбуйааччы Ираида Гермогенова, «Росдортехнология» Хабаровскайдааҕы филиалын бэрэстэбиитэлэ Сергей Колягин, Чурапчы улууһун баһылыгын тутуу боппуруостарыгар солбуйааччы Владислав Пермяков күндү ыалдьыттарынан буоллулар, ыһыылаах-хаһыылаах күрэхтэһиилэри дуоһуйа көрдүлэр.
Алта көрүҥҥэ илин-кэлин түсүһүү буолла. Хапсаҕай (абсолютнай), мас тардыһыы (абсолютнай, дьахталларга эмиэ), ыстаҥа «үс төгүл үс» (абсолютнай), футбол, волейбол уонна ханаат тардыһыыта. Барыта 5 хамаанда кытынна: Амма улууһуттан икки: «Амма суол» ХЭТ (салайааччы Константин Слепцов), «Амгаавтодор» ААО (Александр Окороков), Уус-Алдантан «Дороги Усть-Алдана» ААО (Геннадий Сивцев), Дьокуускай куораттан СР суолун управлениетын сүүмэрдэммит хамаандата уонна олохтоох Чурапчы улууһун «Дорожник» ХЭТ (Гаврил Владимиров).
Волейболга өрүү күүстээх «Амма суол» хамаандата, оттон футболга Уус-Алдан хамаандата иннилэрин кимиэхэ да биэрбэтилэр. Кыайыылаахтарга хас биирдиилэригэр 9-туу, 6-лыы, 3-туу тыһ.солкуобайдаах маҕаһыынтан сертификат туттарылынна.
Биирдиилээн көрүҥнэргэ муҥутуур кыайыылааҕы быһаарар күрэхтэһиилэр олус өрө күүрүүлээхтик, тыҥааһыннаахтык бардылар. Хапсаҕайга, мас тардыһыытыгар, дьахталларга эмиэ, ыстаҥаҕа барытыгар Уус-Алдан ыччаттара кыайыы көтөллөнөн дойдуларыгар бардылар. Кыайыылаахтарга сыаналаах станоктар, циркулярдар туттарылыннылар.
Икки күннээх ардаҕы аннынан сыралаах күрэхтэһии түмүгэр «Амма суол» бастакы, «Дороги Усть-Алдана» - иккис, СР суолун хаһаайыстыбатын управлениетын хамаандата үһүсбуоллулар.
Тэрийээччилэр ааттарыттан Болугур нэһилиэгин баһылыгар Илья Николаевка уонна кини эдэр, эрчимнээх хамаандатыгар саҕаланыаҕыттан бүтүөр диэри күүс- көмө буолбуттарыгар барҕа махталбытын тиэрдэбит.Өрүүтүн маннык түмсүүлээх, көхтөөх, инникигэ сирдиир таһымҥытын ыһыктыбакка үлэлээҥ-хамсааҥ диэн баҕа санаабытын тиэрдэбит.
Ити курдук, суол үлэһиттэрэ өй-санаа, күүс-күдэх, айылҕаттан сэниэ ылынан, күүстээх үлэлэригэр турунуохтара буоллаҕа. Республикабыт Ил Дархана ыытар политикатыгар бэйэлэрин кылааттарын киллэрсэн, инникигэ эрэллээх тарҕастылар.
Комментарии
Авторизация на сайте через социальные сети