Норуот ырыаларын куонкуруһугар 25 киһи кытынна. Биһиги үөрүөхпүт иһин, манна биир дойдулаахпыт Юрий Кузьмин кыайыылааҕынан таҕыста. Кини аан бастаан оҕо эрдэҕинэ норуот ырыаларын ыллыыр буолбута. Онно кинини оскуолатын учуутала Фекла Еремеева бастаан сыһыарбыта. Кириэс Халдьаайы оскуолатыгар үөрэнэр сылларыгар киниэхэ Екатерина Охлопкова, Анастасия Лугинова уонна Сахасталина Колесова үөрэппиттэрэ. Ааспыт сыллаахха Ыччат ыһыаҕар Бүлүүгэ үһүс буолбута, Таатта уонна Мэҥэ Хаҥалас оройуонун бэрэстэбиитэллэригэр эрэ баһыйтарбыта. Бу сырыыга дьүүллүүр сүбэ сыаналааһыныгар түөрт ырыаттан турар попуррины толорбута, ол иһигэр «Ат таптала», «Сиэр аппынан» уонна «Айан ырыата» бааллар. Юрийга ЖК-телевизор туттардылар. Бу кини бастакы эрэ ситиһиитэ буолбатах, дэгэрэҥ ырыаны толорууга Христофор Максимов аатынан куонкуруска, «Ахтылҕан» ансаамбыл састаабыгар Москубаҕа уонна Дубай кк. норуоттар икки ардыларынааҕы куонкурустарга Гран-при хаһаайынынан буолуталаабыта.
Хомус – бу саха норуотун сүрүн музыкальнай инструмена, онон ыһыахха туспа куонкурус тэрилиннэ. Биирдиилээн уонна бөлөҕүнэн оонньоотулар, сорохтор ырыа уонна атын музыкальнай инструменнар доҕуһуоллаах, оннооҕор рэп стилигэр, толордулар. Дьүүллүүр сүбэ бэрэссэдээтэлэ Василий Данилов Нам, Чурапчы оройуоннарын уонна студеннар маӨнайгы сүһүөх профсоюзнай тэрилтэлэрин бэрэстэбиитэллэрин чорботон бэлиэтээтэ. Бириистээх миэстэлэри Мэҥэ Хаҥаластан сылдьар Аксинья Степанова уонна ыччат бырабыыталыстыбатыттан Вероника Лыткина ыллылар. Кинилэргэ Мэҥэ Алдан маастара Александр Рудых оҥорбут хомустарын туттардылар. Сүүрбэттэн тахса кыттааччыттан Уус Алдан уола Алдан Рожин кыайыылааҕынан таҕыста. Бэйэтин кыттыытын туһунан маннык кэпсээтэ:
- Мин Дүпсүнтэн сылдьабын, сааһым 19, культура уонна искусство Арктическай государственнай институтун 2-с кууруһун бүтэрдим. Хомуска 4-с кылаастан ыла оонньуубун, 10-11-с кылаастарга күүскэ дьарыктаммытым, Мария Соловьева салайар «Кэскил» бөлөҕөр сылдьыбытым, билигин соҕотоҕун оонньуубун. Кыайыы элбэх. 2015 с. бу мин иккис улахан ситиһиим. Ол курдук, Чурапчыга Олоҥхо ыһыаҕар Гран-прины ылбытым. Манна икки композицияны: «Алаас кыыһа» уонна «Дьөһөгөй» диэни толордум. Томпоҕо арыый эрдэ кэлбиппит. Маннааҕы сири-уоту эрдэ билбиппит көмөлөстө. Биһигини Кэскил с. олохтоохторо олус үчүгэйдик көрүстүлэр, аһаттылар.
Оһуохай таһаарааччыларга темата көҥүл этэ. Араас оройуоннартан үчүгэй этээччилэр бааллара. Дьүүллүүр сүбэ быһаарыытынан Ньурба оройуонуттан кэлбит Марфа Платонова кыайыылаах буолла. Кини бэйэтин туһунан манныгы кэпсээтэ:
- Мин Күндээдэттэн сылдьабын, сааһым 19, культура колледжын 3 кууруһугар таҕыстым. Этно-художественнай айымньы хотугу салаатыгар үөрэнэбин. Миигин кыра эрдэхпиттэн ийэм Альбина Дмитриевна оһуохайга сыһыарбыта. Манна төрөөбүт Ньурбабыттан хайдах кэлбиппин, Томпо, Ыччат ыһыаҕын уонна сэрии туһунан ыллаатым. Үс бастыҥнар ахсааннарыгар киириэм дии саныырым. Кыайыым туһунан аан бастаан ийэбэр телефоннаан биллэрдим.
Норуодунай суруйааччы Егор Неймохов «Ильмень үрдүнэн туруйалар» айымньытынан араатардар куонкурустарыгар 23 киһи кытынна. Манна эмиэ Ньурба бэрэстэбиитэлэ кыайда. Алексей Хараланов 28-һа, Дьаархан с. библиотекарынан үлэлиир. Кини бу маҥнайгы кыттыыта уонна маннык ситиһиилэммит. Биһиги корреспондеммытын кытта Алексей санаатын үллэһиннэ:
- Миигин бу айымньыга Көстөкүүн бэбиэскэни тутара, дьонун, уолун кытта бырастыылаһара уонна сэриигэ барара ордук таарыйбыта. Мин бэйэм аҕабын, онон кини миэстэтигэр хайдах буолуохпун санаатым уонна ытамньыйан ыллым. Мин 17-ис № этим, олус долгуйан илиим салҕалыыра, тугу этэрбин умнан кэбистим, хата текси ылары көӨүллээбиттэрэ. Кыайыылааҕынан биллэрбиттэригэр соһуйдум, кэргэммэр төлөпүөннүү оҕустум.
Комментарии
Авторизация на сайте через социальные сети