Ортотунан, аан дойду нэһилиэнньэтин 2 бырыһыана бу ыарыыттан эмсэҕэлиир.
Ыарыы туһунан өрөспүүбүлүкэтээҕи тирии-венерологическай диспансер үрдүк квалификациялаах дерматовенеролог-бырааһа Анастасия Иосифовна ХОЮТАНОВА кэпсиир:
Туохтан үөскүүрүй уонна сытыырхайарый?
Псориаз тахсарыгар бэйэ-бэйэлэрин кытта сибээстээх төрүөттэр элбэхтэр. Онон үксүгэр ымынахтар тахсар төрүөттэрин чопчу быһаарар кыаллыбат.
Бу ыарыыга тириэрдиэн сөптөөх элбэх чахчыны аҕалыахха сөп:
Физическэй дьайыылар:
– Тирии эчэйиитэ (хайа быһыы, хайа тардыы, күн уотуттан эбэтэр термическэй бааһырыы, эпэрээссийэ кэмигэр хайа быһыы, укуол, иннэнэн анньыы уо.д.а.);
– Тириини аалыы;
– Быһыы ылыы;
– Уотунан тыктарыы (УФ эбэтэр рентгент).
Химическэй дьайыылар:
– Уокка сиэтии.
Ис дьайыылар:
– Сыстыганнаах ыарыылар, ордук стрептококковай инфекциялар (ангина) уонна ВИЧ-инфекция;
– Эмтэр (пенициллиннээх антибиотиктар, бета-блокатордар, интерфероннар, малярияны бопсор препараттар);
– Хат буолуу уонна төрөөһүн;
– Арыгыны иһии;
– Стресс;
– Атын ыарыылар (саахарынай диабет, уойуу).
Хайдах биллэрэрий?
Бу ыарыыга псориатическай пауллар – тирии үрдүнэн баастар тахсаллар. Оруосабай эбэтэр кып-кыһыл өҥнөөх баас түргэнник сахсархай, үрүҥ көмүстүҥү-маҥан хаҕынан бүрүллэр. Ардыгар кыһыйар. Ыарыы өрө турдаҕына, ымынах кээмэйэ улаатан баран, кыһыйара күүһүрэр.
Ымынах үксүгэр тоҥолоххо уонна тобукка, төбө баттахтаах өттүгэр («псориатическай хоруона»), хоҥхочох уҥуоҕар тахсар. Ол эрээри, тирии хайа баҕарар чааһыгар тахсыан сөбүн бэлиэтиир тоҕоостоох. Ардыгар киһи этэ-сиинэ бүтүннүү бааһырар.
Псориаз бэлиэтинэн сытыытык киирэ-киирэ уонна ханнык эрэ кэмҥэ уҕарыйа-уҕарыйа (ремиссия) өр бааһырара буолар. Ремиссия – ымынах тахсыбат кэмэ. Псориазтаах дьон 25 бырыһыаннара тыҥырахтара бааһырара бэлиэтэнэр. Тыҥырах лоскуйа халыҥыыр эбэтэр тэҥэ суох буолар, кирдээх өҥнөнөр. Ардыгар тыҥырах анныгар араҕастыҥы-күрэҥ бээтинэ баар буолар. Ыарыһахтар 3-5% cүһүөхтэрэ эмсэҕэлиир. Псориаз ити көрүҥэ ордук ыараханынан биллэр уонна үксүгэр инбэлииккэ тириэрдэр.
Эмтэнии
– Кыһыйар буоллаҕына, тыҥыраххын кылгастык кырын.
– Арыгыны иһимэ. Тоҕо диэтэххэ, эмтэнии көдьүүһүн намтатар.
– Баанньыкка тириини күүрдэр, ол иһигэр охсунар миинньиктээх, сылдьыма.
– Тириигин туохха да эчэппэт буола сатаа.
– Табахтаама.
– Атын ыарыылар уонна инфекциялар баалларын бэрэбиэркэлэт.
– Өй-санаа күүрэр ноҕуруускатын ылыныма;
– Быраас эрэ хонтуруолунан эмтэн.
Тиһигин быспакка эмтэннэххинэ уонна уустуга суох быраабылалары, быраас этиитин тутустаххына, ыарыы хонтуруолланыан сөп. Псориазтаах киһи толору уонна актыыбынай олоҕунан олорор кыахтаах. Ити үөрэтэр бырагырамаалары (оскуолалары) киллэриинэн ситиһилиннэ. Оннук «оскуолалар» өрөспүүбүлүкэтээҕи тирии-венерологическай диспансер поликлиникатыгар (Богдан Чижик уул, 3) ыытыллаллар.
Комментарии
Авторизация на сайте через социальные сети