Сорохтор кирииби дьыл туһааннаах эрэ кэмигэр биллэн ааһар, эмтэниллэр ыарыы курдук санаан, улахаҥҥа уурбаттар. Ол эрээри, ити ыарыы туһунан үчүгэйдик билбэттэн эбэтэр сыыһа өйдүүллэриттэн тахсар.
1. Олохсуйбут санаа:Кыраадыс тахсыбат буоллаҕына, ыарыһах атын киһиэхэ сыһыарар куттала суох.
Эмчит: Ыарыы бэлиэлэрэ биллибит – титириир, былчыҥыҥ, уҥуохтарын ыалдьар, сэниэҥ суох буоллаҕына, номнуо ыарыыны сыһыарар кутталлааххын.
2. Кирииптэн харыстанар быһыы икки сылга дьайар, онон сыл аайы быһыы ылар наадата суох.
Эмчит: Оннук буолбатах. Кириип вируһа уларыйа турар. Ыарыы өрө туруутун аҥардас биир кэмигэр үөскүүр мутациялар ахсааннара олус элбэх. Ыарыыны утары охсуһар күүс намтыы турар. Ол иһин, аан дойду вируһу үөрэтэр сүрүн лабораториялара сыл аайы атын быһыылары айаллар. Ол аата быһыыны сыл аайы ылыахха наада.
3. Саастаах киһи быһыы ылара булгуччута суох.
Эмчит: Аҕамсыйбыт киһи кирииптэн быһыы ылара ыарыыттан өлүү кутталын намтатар. Кини кирииптиир эбэтэр сыстыганнаах ыарыыга ылларар кэмигэр стенокардияҕа тириэрдиэн сөптөөх миокард инфарктын куттала эмискэ үрдүүр. Онон кырдьаҕастар, син биир кыра оҕолор курдук, быһыы ылыахтаахтар.
4. Түргэнник үтүөрэр туһугар көлөһүнү үчүгэйдик таһаарыахха наада.
Эмчит: Эрчиллии эбэтэр ыарахан үлэ кэмигэр көлөһүнү таһаарар үчүгэй. Куйаас күннэргэ көлөһүннүрэр эмиэ туһалаах. Ол гынан баран, ыалдьыбыт, вируска хаптарбыт киһи тиритэр курдук хамсанара сатаммат. Ыарыыны, вируһу утарсар араас эмтэр туһаныллаллар. Доруобуйаҥ туругуттан көрөн, температураны түһэрэр эмтэри иһэриҥ ордук. Оччоҕо сылайар-элэйэр курдук титириэҥ, этиҥ сааһа аһыллан тоҥуоҥ суоҕа.
5. Этим суостугана наһаа үрдүгэ суох буоллаҕына, эмп испэппин.
Эмчит: Температура 38-38,5 буолбут буоллаҕына, кыраадыһы түһэрэр эмтэри иһиллэр.
6. С битэмиин вирустары өлөрөр.
Эмчит: Ити сыыһа. Аҕамсыйбыт дьоҥҥо битэмииннэр искэн үөскүүр кутталын улаатыннараллар. Битэмииннэр кэккэ ыарыылары эмтииргэ туһаныллаллар, кириип онно сыһыана суох. Оттон С битэмиин холобур, сөбүн көрөн апельсины, лимоны сиэһин аһыыр баҕаҕын улаатыннарар, настарыанньаҕын көтөҕөр.
7. Кириип кэмигэр чесногу сиир туһалаах.
Эмчит: Чеснок туһатын наука дакаастыы илик. Чесногу сиир да киһи син биир кирииптиэн сөп.
8. Таһырдьа бэргэһэтэ суох таҕыстыҥ, тымныы сиргэ олордуҥ да, хайаан да тоҥон ыалдьаҕын.
Эмчит: Эбэһээт буолбатах. Ол эрэн, оҕолор уонна кырдьаҕас дьон тымныы кэмҥэ бэргэһэ кэтиэхтээхтэр. Кырачааннар +10 кыраадыска бэргэһэлээх сылдьыахтаахтар. Тоҕо диэтэххэ, бэргэһэ сылааһы тутар. Тоҥнун да кирииптиигин диэн буолбатах эрээри, ыарыыны утары охсуһар күүһүҥ мөлтөөн, ыалдьар куттал үөскүүр.
Комментарии
Авторизация на сайте через социальные сети