ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
1 декабря 2015, 15:07

Көҥүлэ суох тутуулар көтүрүллүөхтэрэ


Дьокуускай куоракка Покровскайдыыр суол 10 – 16 км хаҥас уонна уҥа өттүгэр арыый да удамыр сыанаҕа учаастактары атыылаабыттара ыраатта. Ол эрээри гааһын, уутун, уотун боппуруоһа быһаарылла илик. Бу да үрдүнэн саҥа дьиэлэр дьэндэһэн эрэллэр. Аны Покровскайдыыр суол 10 – 12 км уҥа уонна хаҥас өттүнэн «ГРС2 – Хатас» магистральнай гаас ситимэ ааһарынан, бу сир ураты хонтуруолга сылдьар учаастагынан (охранная зона) ааҕыллар. Онон, араас эбийиэги тутуу сокуонунан көҥүллэммэт.

Хас да сыллааҕыта куорат Думатын депутаттарын быһарыыларынан, Покровскай тракт 10 – 16 км уҥа өттө куорат саҥа микро-оройуонун статуһун ылбыта. Онон, тутатына хаһыат, телевидение нөҥүө чэпчэки сыанаҕа учаастактары атыылыыбыт диэн биллэриилэр хойдон барбыттара. Бастаан утаа, Хатас дуу, куорат дуу бас билиитигэр сылдьара биллибэт учаастактары атыылаһартан дьон туттунара. Эбиитин сыаната да чэпчэкитэ киһини сөхтөрөрө. Өскөтүн куорат кытыытыгар баар даачалар иһин 1 мөл. солк. итэҕэһэ суох харчыны көрдүүр эбит буоллахтарына, куораттан аҕыйах хардыылаах сиргэ – Хатас чугаһыгар баара-суоҕа 150 – 200 солк. атыылыыллара.

Иккиһинэн, бу киэҥ нэлэмэн сир уруккута «Хатас» сопхуос балансатыгар сылдьар буолан, аны хас сылынан уот линията, ону ааһан гаас турбата тардыллара биллибэт этэ. Арай атыыһыттар уора-көстө: «Магистральнай гаас ситимэ ааһар буолан, дьиэҕитигэр начаас күөх төлөнү киллэриниэххит», – дэһэллэрэ. Дьиҥэр, өрдөөҕүтэ докумуоҥҥа киирбитинэн, Хатас сирэ тыа хаһаайыстыбатынан дьарыктанарга аналлаах этэ. 90-с сыллардааҕы ыһыллыы-тоҕуллуу кэмигэр сопхуос эмиэ эстии суолугар үктэнэн, сири пайщиктаахтар үллэстибиттэрэ.

Бүгүҥҥү туругунан, 10-с килэмиэтиртэн саҕалаан 16-с килэмиэтиргэ диэри 4500 учаастак баара биллэр. Учаастактар ортотунан 10-нуу суотайдаахтар.

Саҥа микро-оройуон анал генеральнай былаана суох буолан, учаастактары ойута-быһыта тыытан атыылаабыттар. Уулусса, бэл диэтэр, уот линията ханан барыахтааҕа чопчу биллэ, быһаарылла илик. Аны маны ааһан, өссө биир саҥа кыһалҕа үөскээтэ.

Покровскайдыыр суол 10 – 12 км уҥа уонна хаҥас өттүлэрэ «ГРС2 – Хатас» магистральнай гаас ситимэ ааһарынан, ураты хонтуруолланар учаастагынан буолар. Гаас ситимэ Птицефабрика оройуонуттан саҕаланан Покровскай тракт уҥа өттүнэн ааһан, салгыы Хатас хонуутун нөҥүөлээн Хатас сэлиэнньэтигэр баар АГРС-ка тиийэр. Бу ситим Хатас, Табаҕа, Владимировка бөһүөлэктэрин, Муусука үрдүк оскуолатын уонна Мэҥэ-Хаҥалас, Хаҥалас, Чурапчы улуустарын гааһынан хааччыйар.

«Правила охраны магистральных трубопроводов» быраабылатын быһыытынан, гаас ситимин икки өттө (25 миэтэрэҕэ диэри) харыстанар зонанан буолар. Ол аата бу устатынан туох да тутуллуо суохтаах.

«Сахатранснефтегаз» АУо магистральнай гаас ситимнэрин управлениетын линейнэй-производственнай техническэй-производственнай салаатын начаалынньыга Айсен Жирков ураты хонтуруолга сылдьар зона таһынан, тутуу нуорматыгар олоҕуран, гаас ситимин икки өттүгэр 150 миэтэрэҕэ диэри тутуу ыытыллыа суохтааҕын туһунан өйдөбүл баарын этэр. Бу нэһилиэнньэни магистральнай гаас ситимигэр саахал тахсар түгэниттэн харыстааһын, ол аата куттал суох буолуутун хааччыйыы.

Билигин Покровскайдыыр суол 10 – 12 км учаастактар күн бүгүнүгэр диэри атыылана тураллар. Өссө төһө учаастак атыыламмыта биллибэт. Онон генеральнай былаана оҥоһулла илик микро-оройуонтан чэпчэки эрэ диэн учаастагы ылбычча атыылаһар табыллыбат буолла. Кэлин эрэйи көрбөт курдук. Билигин бу боппуруоһу Дьокуускай куорат архитектордара уонна «Сахатранснефтегаз» АУо хонтуруолга ыллылар.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 658 Источник: Газета "Саха Сирэ" Автор: Анивера Акимова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ