Киин куораппытыгар урут оптуобус тохтобулларыгар сылаас маҕаһыыннар баар буолааччылар. Манна оптуобус кэтэһэргэр киирэн иттэн, таарыйа тугу эмит атыылаһан тахсыахха сөбө. Ол эрэн, аҕыйах сыллааҕыта куорат дьаһалтатын быһаарыытынан, маҕаһыыннары оптуобус тохтобулларыттан көһөртөөн кэбиспиттэрэ.
Кэнники кэмҥэ куорат Уокуруктааҕы дьаһалтата анал сылаас тохтобуллары тутар былааннаах. Сотору кэминэн, Дьокуускайга 17 сылаас тохтобул баар буолуоҕа. Итинтэн аҕыһа Элбэх дьайыылаах информационнай киин диэн ааттанан номнуо үлэлии турар. Маннык анал тэрилинэн хааччыллыбыт тохтобуллар Гимеиҥҥэ, «Үрүҥ күөлгэ» (Можайскай уул.), «Строительнай» ырыынакка (Жорницкай уул.), Тулагыга, «Лена» киинэ театрыгар, «Киин» киинэ театрыгар, «Крытай» ырыынакка (Ф.Попов уул.) уонна Каландаришвили уулуссатыгар тутуллубуттара. Автовокзалга, «Столичнай» ырыынакка уонна «ЯКСМК» тохтобулугар тутуллан баран, билиҥҥитэ ититиитэ, уота тардылла илик.
Маннык тохтобулларга киһи иттэрин таһынан, оптуобус сырыытын, бэл, төһө чугаһаабытын кытта, анал мониторунан көрө олорор. Төлөпүөнүн ииттэриитэ бүппүт буоллаҕына, манна киирэн ииттэриэн сөп. Босхо wi-fi өҥөтүн ордук оҕо, ыччат сэҥээрэр. Суотабайга харчы угар терминаллар үлэлииллэр. Итии чэй, кофе атыылыыр аптамааттар тураллар. Манна өссө хаһыат атыылаһыахха, ыксал буоллаҕына, суһал көмөнү, полицияны ыҥырыахха эмиэ сөп.
Онон былырыын кыһын куорат олохтоохторо бу саҥа киллэриини бэркэ биһирээбиттэрэ.
Сир-уот сыһыаннаһыыларыгар агентство салайааччыта Ирина Членова иһитиннэрбитинэн, 2016 сылга Новопортовской тохтобулугар, 1№-дээх поликлиникаҕа (Киров уул.), 1 №-дээх ДЮСШ (Дзержинскэй уул.), Билибин, Стадухин уулуссаларыгар уонна Хатаска тутуллуохтара. Онтон «Водоканалга», Доҕордоһуу болуоссатыгар уонна Лермонтов уулуссатыгар тутуллуохтаах тохтобулларга билиҥҥитэ сир учаастагын чопчулуу, быһаарса сылдьаллар.
Сылаас тохтобуллары тутууну куорат олохтоохторо да, урбаанньыттар да өйүүллэр. Онон чааһынай-муниципальнай бииргэ үлэлэһии чэрчитинэн, сылаас тохтобуллар куорат кытыытынааҕы бөһүөлэктэргэ кытта баар буоллулар.
– Киин куоракка маннык сылаас тохтобуллар элбииллэрин туһугар биһигиттэн тутулуктааҕы барытын оҥоруох тустаахпыт, – диэн Дьокуускай куорат Уокуруктааҕы дьаһалтатын баһылыга Айсен Николаев этэн турар.
Онон биһиги тыйыс усулуобуйабытыгар саамай наадалаах, доруобуйаҕа туһалаах, араас туһалаах өҥөлөрү оҥорор элбэх дьайыылаах информационнай кииннэр, ол эбэтэр сылаас тохтобуллар элбии турдуннар.
12+
Комментарии
Авторизация на сайте через социальные сети