Ол туһунан түмсүү салайааччыта Софья Александрова маннык кэпсээтэ:
– Саха тыллаах бары бэркэ билэр, ытыктыыр киһибит Дмитрий Наумовы көрсүһүү буолла. Өр кэмнэргэ Амма улууһун баһылыгынан, СӨ Судаарыстыбаннай Мунньаҕын (Ил Түмэн) депутатынан, СӨ тыатын хаһаайыстыбатын миниистиринэн үлэлээбит улахан политическай деятель айар үлэтин, олоҕун-дьаһаҕын туһунан кэпсээтэ. Ааҕааччылар элбэх ыйытыыларыгар эппиэттээтэ, олус интэриэһинэй уонна аһаҕас кэпсэтии буолла. Салгыы драматург «Бүгүн эбэтэр хаһан да» пьесатын улаханнык сэргээн көрдүбүт.
Ону сэргэ аммалар киэн туттуубут, биллиилээх драматург, Саха сирин Суруйааччыларын сойууһун чилиэнэ В.Е.Васильев-Харысхал айар үлэтигэр аналлаах уонна үбүлүөйдээх дьоро киэһэтин үөрэ-көтө бэлиэтээтибит. Харысхал Саха сирин киэн туттар дьонун олохторун киэҥник сырдаппыт, норуот көрүүтүгэр таһаарбыт киһинэн биллэр. Аммалар уонна Дьокуускай куорат олохтоохторо бу күн Харысхал айар үлэтин кытта билистилэр, бэйэтин кытта ирэ-хоро кэпсэтэн улаханнык астыннылар. Кэпсэтии кэнниттэн «Учуутал» испиктээкили долгуйа-кэрэхсии көрдүбүт.
Оттон Литература сылын түмүктүүр тэрээһиҥҥэ Амматтан төрүттээх бэйиэт кыргыттарбытын кытта көрсүһүү буолла. Биэчэри «Далбар Хотун» сурунаал кылаабынай эрэдээктэрэ, эдэр, кэскиллээх бэйиэт Зинаида Архипова иилээн-саҕалаан ыытта. Бу күн Саха сирин Суруйааччыларын сойууһун чилиэнэ Саргылана Гольдерова ахтыыларын, саҥа хоһооннорун ааҕааччыларга билиһиннэрдэ. Соморсун нэһилиэгиттэн төрүттээх бэйээт Люба Горохова-Сүүмэх айар талаанын сэргээтибит. Эмистэн төрүттээх, элбэх ырыа буолбут хоһооннордоох ааптар Екатерина Новикова-Дьулуура уонна оҕо хоһооннорун ааптардара, учуутал идэлээх Екатерина Сидорова айар үлэлэрин көрөн-истэн улаханнык биһирээтибит.
Бу киэһэ Амматтан төрүттээх бэйиэттэр айымньыларын, кинигэлэрин быыстапката буолла.
Талааннаах дьоммутун көрө олорон, аммалар киэн туттуу иэйиитигэр куустаран, дууһалыын манньыйдыбыт. Кинилэр талааннара өссө да арылла турарыгар, элбэх интэриэһинэй айымньылары дьоҥҥо-сэргэҕэ бэлэхтииллэригэр, тапталлаах Аммабыт аатын ааттата туралларыгар баҕара хааллыбыт.
Комментарии
Авторизация на сайте через социальные сети