Култууралар алтыһыылара
Кытайга Саха сирин делегациятын Ил Түмэн бэрэссэдээтэлэ Александр Жирков салайан сырытта. Александр Николаевич Пекиҥҥэ буолбут тэрээһиннэртэн үс түгэҥҥэ тохтоото. Бастатан туран, саха народнай суруйааччыта Николай Лугинов «Улуу хуннар” кинигэтин кытай тылынан тылбаастаммытын бэлиэтээтэ. «Бөдөҥ философскай айымньыны Кытайга олорор саха кыыһа Мира Ушканова үрдүк литературнай таһымҥа тылбаастаата. Бу өрөспүүбүлүкэ тас өттүгэр үөрэнэр, атын омук култууратын кытта алтыһар ыччаппытыгар үтүө холобур буолар», -- диэтэ спикер.
Иккис түгэн -- Суорун Омоллоон Опера уонна балет театрын труппата «Кинээс Игорь» спектаклы Пекиҥҥэ 2 тыһ. тахса миэстэлээх театрга көрдөрдө. Далааһыннаах бырайыак табылынна, Андрей Борисов туруоруутугар саҥалыы тыыннанна. Александр Жирков этэринэн, артыыстарбыт толорууларын кытайдар улаханнык сэҥээрэн көрбүттэр, биһиги театрбыт Россия искусствотын аан дойду таһымыгар үрдүк таһымнаахтык көрдөрөр айар кыахтааҕын кэрэһилиир. Манна даҕатан эттэххэ, «Культура» федеральнай телеканалга Саха сирин күннэрин туһунан сюжет кэпсээбиттэригэр, «Кинээс Игорь» спектаклы кытай норуотун улуу салайааччытын Мао Цзэдун кыыһа хайҕаан санаатын тиэрпитэ.
Үһүс түгэн – драматургическай айымньыларынан атастаһыы барда, ол эбэтэр сценаҕа икки өттүттэн улуу эпическай айымньылары туруордулар. Кытай Кунцюй театрын артыыстара «Туналҕаннаах ньуурдаах Туйаарыма Куону» бэйэлэрин тылларынан оонньоотулар. Олоҥхо театра «Пионовая беседка» спектаклы сахалыы тыыннаата. Александр Жирков бу курдук этэр: «Биһиги артыыстарбыт ураты иэйиилээхтик кытай көрөөччүлэригэр кинилэр үйэлээх айымньыларын итэҕэтиилээхтик тиэртилэр. Бу бырайыак бииргэ үлэлээһиҥҥэ историческай суолталаах буолла, суолу арыйда. Билигин өрөспүүбүлүкэбитигэр омуктар икки ардыларыгар эпическэй айымньылары атастаһыыга үлэ барар, онуоха биир улахан хардыы, сонун саҕалааһын оҥоһулунна», -- диэтэ.
Делегация Пекиҥҥэ норуоттар икки ардыларынааҕы искусство колледжыгар сырытта. Бу колледжка Саха сириттэн аан бастаан 1997 сыллаахха биһиги оҕолорбут үөрэнэ барбыттара. Билигин үһүс көлүөнэ ыччат үөрэнэр. Циркэ артыыһын үйэтэ кылгас, төһө да эдэрдэрин иһин, бастакы сүүмэрдэммит бөлөх номнуо пенсияҕа тахсар кэмэ чугаһаабыт, онон көлүөнэ солбуһуута баран эрэр. Александр Жирков санаатынан: “Биһиги өрөспүүбүлүкэбит циркэ искусствотыгар илиҥҥи туһаайыыны ылыммыта, саха циркэтигэ ураты холбоһугу (синтеһы) үөскэтэр – европейскай, илиҥҥи уонна сахалыы бэйэбит фольклорбутугар, үгэстэрбитигэр тирэҕирии, Саха циркэтэ Россия ханнык да циркэлэригэр майгыннаабат ураты буочардаах».
ЮНЕСКО уонна ХНТ таһымынан
Саха сирин делегацията Санкт-Петербурга сырыыта, бастатан туран, икки субъект экономическай, социальнай, культурнай, үөрэх, наука боппуруостарыгар бииргэ үлэлээһини кытта сибээстээх. Урут-уруккуттан, сэбиэскэй былаас инниттэн, Санкт-Петербург административнай, үөрэх, научнай-чинчийэр киин быһыытынан Саха сирин кытта үтүө үгэстэри салгыыр. Ил Дархан Егор Борисов салалтатынан делегация 2018 сылга диэри үлэ былааныгар боротокуолга илии баттаата. Ити күн Ил Түмэн Санкт-Петербург парламенын кытта сокуоннары оҥорууга сөбүлэһии түһэристэ.
Эмиэ ити күннэргэ IV култуура форумугар Ил Дархан, Ил Түмэн бэрэссэдээтэлэ форум пленарнай мунньаҕар кытыннылар. Быйылгы форум ЮНЕСКО 70 сыллаах үбүлүөйүгэр ананна, ЮНЕСКО-ны кытары биһиги өрөспүүбүлүкэбит ыкса үлэлэһэр.
Форум чэрчитинэн ХНТ научнай-консультативнай сэбиэтэ буолла. Бу мунньахха Ил Түмэн спикерэ кытынна. Бу сэбиэт соторутааҕытаХНТ генеральнай сэкирэтээрэ Пан Ги Мун көҕүлээһинэнэн тэриллибит. Аан дойдуга ааттаах-суоллаах 26 учуонай манна түмсэн, судаарыстыбалар салайааччыларыгар тыын суолталаах боппуруостарга сүбэ биэрэр боломуочуйалаахтар. Санкт-Петербурга буолбут сэбиэккэ ЮНЕСКО генеральнай сэкирэтээрэ Людмила Бокова, Россияттан Нобелевскай лауреат Жорес Алферов кытыннылар. Мунньаҕы РНА парезиденэ Владимир Фортов ыытта.
Култуура форумугар өрөспүүбүлүкэ биир ситиһиитинэн саха норуотун улуу талаана Сергей Зверев-Кыыл Уола төрөөбүтэ 115 сылын бэлиэтиир тэрээһиннэри, ол иһинэр норуоттар икки ардыларынааҕы конференцияны А.Герцен аатынан университекка ыыттарда.
Александр Жирков: “Саха сирин делегациятын Кытайга уонна Санкт-Петербурга сырыылара уһун болдьоххо экономическай, уопсастыбаннай, култуурнай, научнай ситими олохтуурга көдьүүстээх буолаллара саарбаҕа суох. Хатыламмат ураты култуурабытын, үгэстэрбитин билиһиннэрбиппитин сэргэ, КНР-ы уонна Россия биир бөдөҥ промышленнай, научнай субъегын -- Санкт-Петербургу кытары сибээһи чиҥэттибит», -- диэтэ.
Комментарии
Авторизация на сайте через социальные сети