Атырдьах ыйын 12 күнүгэр 1 Хомустаахха чочуобуна тутуллар сирин, онно турар мас кириэһи аҕабыыт Никон тахсан сибэтии гынна. Бу тэрээһиҥҥэ Афанасий Азаров аатынан фонда дириэктэрэ, Саха сирин народнай депутата Игорь Никитин, педагогическай үлэ бэтэрээнэ Е.Д. Азарова-Прокопьева кыыһа Тамара Никитина сиэнинээн, Афанасий, Дмитрий Азаровтар аймахтара, «Нам улууһа» МТ баһылыгын солбуйааччы Николай Степанов, «1 Хомустаах нэһилиэгэ» МТ баһылыга Василий Жирков, Нам улууһун кырдьаҕастарын сэбиэтин бэрэссэдээтэлэ Анатолий Васильев уонна Хомустаах олохтоохторо кыттыыны ыллылар.
Тэрээһин кэмигэр кыраайы үөрэтээччи Тарас Никонов Игорь Юрьевичка «Открытие церковно-приходских школ в Намском улусе” диэн улуус историятын сырдатар кинигэни, Тамара Даниловнаҕа оскуола музейын дириэктэрэ Саргылаана Николаевна архыып докумуонун копиятын уонна сибэкки дьүөрбэтин туттардылар.
Игорь Никитин: «Афанасий Азаров мин хос-хос эһэм, кини уола, мин хос эһэм Хомустаахха тутуллубут Красноярскай Покровскай таҥара дьиэтин старостатынан үлэлээбит уонна таҥара дьиэтин аттыгар көмүллүбүт. Кини кыыһа мин ийэбин, Тамара Даниловнаны, иитэ ылбыт. Онон саха ыала мин ийэбин иитэнн биһиги төрүччүбүт салҕаммыт. Чочуобунаны тутуу — историяҕа хардыы, таҥара дьиэтин сөргүтүү эрэ буолбатах — бу төрүттэрбитигэр ытыктабыл бэлиэтэ буолар. Афанасий Азаров XIX үйэ бүтүүтэ таҥара дьиэтин тутуллуутугар харчы-үп хомуйуутун тэрийбит киһинэн буолар. Маны таһынан Хомустаахха үөрэхтээһин сайдыытыгар улахан өҥөлөөх. Оскуола аһылларыгар бэйэтин дьиэтин туран биэрбит».
Комментарии
Авторизация на сайте через социальные сети