Уураахха этиллэринэн, улуус окко быйылгы былаана 36 тыһ.т, 2 тыһ.тонна сиилэс, 1300 тонна сенаж. Нэһилиэк баһылыктара, тыа хаһаайыстыбатын бары тэрилтэлэрин салалталара от үлэтин туох баар тэрээһинин, техническай хааччыллыытын күннэтэ хонтуруолга ылар сорудахтаахтар. Улууска былааннаммыт дороххой уонна сүмэһиннээх аһылыгы кэмигэр бэлэмниир, хаачыстыбатын тупсарар сыалтан оттоһун технологиятын, хомуур үлэлэрин графига булгуччу тутуһуллуохтаах; оттооһун тэтимин түргэтэтэр сыалтан окко маассабай тахсыылары тэрийии; кураан күннэр турар кэмнэригэр түүн оту охсуу ньыматын маассабайдык киллэрии;
Окко улаханнык хаалбыт нэһилиэктэргэ мобильнай этэрээттэри тэрийэн үлэлэтэр сорук турар. Оттооһун сводкатын чуолкайдык хомуйан кэмиттэн-кэмигэр хойутаппакка туһааннаах тэрилтэлэргэ тиэрдэн иһэри ситиһиллиэхтээх. Миэстэтигэр суһал дьаһаллары ылынар, хонтуруоллуур сыалтан оттооһун штабын нэһилиэк уонна улуус дьаһалталарыгар түмэн, сүбэлэһэр итиэннэ тэрийэр-дьаһайар, толорор-толотторор мунньахтары, тэрээһиннээх бары үлэлэри былаан быһыытынан ыытан иһэргэ сорудах турар. Тыа хаһаайыстыбатын специалиһа пресс-подборщиктаах дьон өҥө иһин от рулоннааһыныгар үлэлэһэллэрин тэрийиигэ уонна хонтуруоллааһыҥна үлэни ыытыахтаах.
Окко киирии уурааҕын билиһиннэрии кэннэ «Аанньаах» ТХПК балаһыанньатын туһунан кэпсэтиһии буолла. Улуус баһылыга А.В.Григорьев бу боппуруоска бэйэтин санаатын маннык эттэ:
- Билиҥҥи туругунан бу хаһаайыстыба хайдах да гынан сайдар кыаҕа суох. Бириэмэтигэр сөптөөх докумуоннары, отчуотун туттарыллыбатыттан, тустаах бырагыраамаларга кыайан киирсибэккэ, субсидиялартан маппыккыт,ол түмүгэр маннык уустук балаһыанньаҕа ыктарбыккыт. Онон олохтоох дьон бэйэҕит санааҕытын этэн, куоластаан «Аанньаах» хаһаайыстыбаны «Кириэстээх» ТХПК-ҕа сыһыарыллара ордук буолуо.
«Кириэстээх» ТХПК салайааччыта В.С.Егоров нэһилиэнньэҕэ билигин хайдах үлэлии олороллорун, инники былааннарын сырдатта. Олохтоохтор сөбүлэһэр буоллахтарына, ыанар ынахтары тутуоҕун туһунан уонна хамнастара хайдах буолуоҕун, үлэ хайдах барыаҕын туһунан билиһиннэрдэ. Бастатан туран, үлэлиэн баҕалаах дьону испииһэктииллэригэр сүбэлээтэ, ол кэннэ кинилэргэ собеседование ыытыахпыт диэн иһитиннэрдэ.
Мунньах түмүгэр куоластаан “Аанньаах” хаһаайыстыба Крестях ТХПК отделенията буоларыгар сөбүлэстилэр.
Улуус баһылыгын экономикаҕа солбуйааччыта М.М.Прокопьев нэһилиэнньэ үгүстүк мунаарар боппуруостарыгар - пенсия уонна босхо айан суола, чэпчэтиилэр хайдах сөптөөхтүк туһаныллалларын киэҥник сырдатта.
Нэһилиэнньэни кытта көрсүһүү кэнниттэн хотоннору, үүт тутар дьиэлэрин, сайылыгы кэрийэн көрдүлэр.
Маннык сырыылар хайа да өттүнэн көдьүүстээҕин бэлиэтээн туран, баһылык ходуһалары, сайылыктары миэстэтигэр кэрийтэлээн билсэр наада диэн сорудахтаата.
Комментарии
Авторизация на сайте через социальные сети