Покровскайга “Түөлбэ олоҥхоһуттарын үйэтитии” семинар-практикум ыытылынна

Ахсынньы 4 күнүгэр Покровскайга Г.В.Ксенофонтов аатынан музейга норуот айымньытын киинин үлэһиттэрэ олоҥхо декадатын чэрчитинэн улуустааҕы “Түөлбэ олоҥхоһуттарын үйэтитии” диэн семинар-практикуму тэрийэн ыыттылар.

Семинарга Россия НА Сибиирдээҕи салаатын гуманитарнай чинчийии уонна аҕыйах ахсааннаах хотугу норуоттар проблемаларын үөрэтэр институт үлэһитэ, РНА наукатын үтүөлээх үлэһитэ, үлэ ветерана Рожина Лидия Филипповна, Дьокуускайдааҕы Оҕо дыбарыаһын уһуйааччыта, Саха Өрөспүүбүлүкэтин култууратын туйгуна Мордовская Наталья Иннокентьевна кыттыыны ыллылар.

Тэрээһиҥҥэ Өктөм оскуолатын библиотекара Гаврильева Галина Максимовна Припузов Николай Прокопьевич, Кардашевскай Егор Ильич, Лукин Егор Егорович, Лиханов Афанасий Васильевич, Егоров Семен Иванович айымньылаах үлэлэрин сырдатта.

Нөмүгүттэн олоҥхонон утумнаахтык дьарыктанар Семенова Полина Петровна Саввин Михаил Иннокентьевич-Чолбон олоҕун туһунан кэпсээтэ, уһуйар уолаттарын -- 5-6 кылаас оҕолорун -- Пермяков Спартагы, Арьянов Толяны, Елизаров Родигы кытыннаран «Бөҕө Мүлдьүрүүн, Мүлдьүөт Бөҕө» олоҥхоттон быһа тардан олоҥхолотто.
Тиит Эбэттэн Дьячковская Мария Григорьевна Яковлев Еремей Петрович-Той Дьэримиэй олоҕун сырдатта. Күөрдэмтэн Ефремова Феврония Ивановна Яковлев Е.П-Той Дьэримиэй «Чэмэриллэ Чээчик» олоҥхотун 2013 сыллааха народнай театрдарын көмөтүнэн туруорбуттарын туһунан кэпсээтэ. Тиит Арыытааҕы «Эркээйи» Култуура киинэ Кампеев Егор Степанович «Тойон Лабыдьа» тойугун үрдүк таһымнаахтык туруорбутун иһиттибит. Улахан Аантан «Кыымчаан» оҕо саадын үлэһитэ Олесова Айна Михайловна олохтоох олоҥхоһуттар Семенов Платон Саввиһы-Ырыа Былатыан, Абрамов Николай Дмитриевыһы-Куойка тустарынан сырдатта уонна оҕотунаан Уйгулаана Ивановалыын «Бөртө Боотур» олоҥхолорун хайдах, туохха олоҕуран суруйбуттарын, кинигэ буолан тахсыбытыгар кимнээх көмө буолбуттарын долгуйан туран кэпсээтэ.Норуот айымньытын киинин үлэһитэ Лидия Харитонова бастакы Малдьаҕартан төрүттээх олоҥхоһут Алексеев Афанасий Николаевич «Хаҥалас Боотур» олоҥхотун сценаҕа туруорууга кимнээх кыттыбыттарын, күүс-көмө буолбуттарын сэһэргээтэ.
Салгыы Рожина Лидия Филипповна Гуманитарнай институкка харалла сытар Хаҥалас улууһун олоҥхолорун кытта билиһиннэрдэ. Семинар кыттыылаахтара сорох дьон ааттарын сонургуу иһиттилэр.
Дьокуускайдааҕы Оҕо дыбарыаһын уһуйааччыта Мордовская Наталья Иннокентьевна “Уол оҕону олоҥхоҕо уһуйуу” диэн маастар кылаас ыытта.